Despues di e di tres y ultimo anochi di Prefinals, Stichting Musica ya caba ta den pleno preparacion pa e Caiso Finals y Super Saturday Soca Finals di Aruba Caiso & Soca Monarch 2023. E anochinan final lo tuma lugar riba 27 y 28 di januari 2023.

Stichting Musica a anuncia cu e finalistanan cu lo pasa pa e Finals di Aruba Caiso & Soca Monarch 2023, lo wordo divulga riba diaranson, 11 di januari 2023. Esaki ta nifica cu tur participante di prefinals, lo ricibi amplio oportunidad pa promove nan produccion desde awor te cu e fecha aki.

E di tres anochi di Prefinals a tuma lugar na Centro di Bario Brazil y a wordo dedica na e locutor popular, tambe conoci pa e “walking encyclopedia”, sr. Roberto Geerman (dfm) cu tabata un ferviente amante di musica Soca y Calypso y residente di districto di San Nicolas.

Atrobe por a mira un bon combinacion di banda y artista cu un trayectoria impresionante, combina cu cantantenan cu a participa na e festival pa prome biaha. Melvin Garcia a guia e anochi como Maestro di Ceremonia y e elenco di hurado a consisti di: sr. Vale Boekhoudt, sr. Kenny “Mighty Heads” Meijers, sr. Franklin Arrindell, sr. Irvin “Mighty Reds” Hazel y Presidente di Hurado, sr. John Hassell.

E siguiente banda y artistanan a presenta durante e di tres anochi prefinal:

MUSICAL TIME cu e Caiso di Roland “Mighty Chicho” Kock: Different Culture (compositor: Roland Kock / areglista: Markkeys Maduro). E Soca di Roy “Long Roy” Ellis: (compositor: Roland Kock / areglista: Musical Time).

HOT ONES BAND a presenta cu e Caiso di Soilo “Lord Lally” Sanchez: One Blessed Island (compositor: Soilo Sanchez / areglista: Emil Krozendijk). E Soca di Tania “Queen T” Granger: It In We (compositor:

Angelo Richardson / areglista: Emil Krozendijk). E Caiso di Angelo “The Soca Mafia” Richardson: It’s Up To Us y tambe e Soca di Angelo “The Soca Mafia” Richardson: I’m On My Way (ambos composita pa Angelo Richardson y aregla pa Emil Krozendijk).

AZUCAR pa prome biaha riba escenario di Aruba Caiso & Soca Monarch, cu e Soca di Robert Jr. “Mighty Whopper” Maduro: It’s About Time (compositor: Robert Maduro / areglista: Mark Maduro) y e Soca di Robert “Mr. Culture” Maduro: Wait For Me (compositor: Robert Maduro / areglista: Mark

Maduro)

GROOVE MASTERS a sacudi nan bario cu e Soca di Travis “Tip Toe” Tucker: Free Again (compositor: Travis Tucker / areglista: Markkeys Maduro) y e Soca di Mervin “Blacky” Baptise: Ah Got This Feeling (composita pa: Ashrock Gario, Wilfred Gario & Mervin Baptiste / aregla pa: Markkeys Maduro y

Wilfred Gario).

Tur grabacion oficial di e produccionnan cu a wordo lansa durante e Prefinals di Aruba Caiso & Soca Monarch 2023, lo wordo distribui na plataformanan di media y riba rednan social di Stichting Musica desde dia 29 November 2022. Stichting Musica ta invita un y tur pa sigi tur desaroyo relata na Aruba Caiso & Soca Monarch 2023 riba e Facebook page di Stichting Musica y ta ansioso pa anuncia e resultado di e finalistanan riba diaranson, 11 di januari 2023. Tickets pa e anochinan di Finals lo ta obtenibel pronto via Pay.aw.

Stichting Musica ta gradici e partners oficial di Aruba Caiso & Soca Monarch: Setar NV, Balashi y Aruba Bank y ta sumamente contento cu e sosten di Departamento di Cultura di Aruba, Elite Productions & Entertainment hunto cu Thunder & Lighting y Telearuba.

E organisacion ta gradici pueblo di Aruba pa nan asistencia na e Prefinals y ta gradici e voluntarionan cu a traha pa haci tur tres anochi posibel. Un palabra di exito ta bai pa tur participante!