WILLEMSTAD – Insel Air a tuma e decision di no bula mas cu nan MD 80. Esaki nan a confirma den prensa local. Un fuente ta confirma esaki na Bon Dia y cu ya 6 siman pasa a cuminsa cu e proceso di retiro di pilotonan.

 Un otro fuente ta bisa cu e intencion ta pa e compania principal di Insel Air na Corsou tambe lo pidi pa bay bancarota. Sinembargo esaki no ta confirma ainda pa e gerencia. Y segun director Edward Heerenveen e situacion ta status quo. Insel Air na Aruba ya a bay bancarota.

Manera conoci gobierno di Corsou a fia e aerolinea 33 miyon florin. Awor sr. Heerenveen ta bisa cu gobierno a nombra dirigentenan robes. Un di nan Gilles Filiatreault a kita su trabou. E nombramento di representantenan di gobierno ta forma parti di e deal entre Insel Air y gobierno pa haya e financiamento.

Ayera e sindicato UGTK/Cadmu tabatin un reunion cu conseho di minister pa entre otro comparti nan preocupacion bou personal di Insel. Kico e resultado di e reunion aki ta, no ta conoci ainda.

Un di e problemanan cu a conduci na e situacion financiero malo di Insel, ta Venezuela. Nan ta debe e compania di aviacion ainda alrededor di 100 miyon dollar. E problema aki a caba cu mas aerolinea cu mester a para nan operacion pa motibo cu no por a saca nan placa for di Venezuela. Na Aruba Tiara Aira a bay bancarota pa motibo di esaki. Awor cu e frontera cera di Venezuela tin un problema adicional cu su efecto negativo pa e entradanan di Insel pero tambe Aruba Airlines.