WILLEMSTAD – Durante e ultimo dos aña e actividadnan comercial entre Corsou y Venezuela incluyendo refinamento di petroli a bay atras cu mas di 50 porshento. E volumen comercial a baha di 2.2 miljard florin na 2015 pa algo menos cu un miljard florin na 2017. Asina Ret Karibense ta informa.

Esaki ta sin conta e efectonan di e embargo comercial cu presidente Venezolano Nicolas Maduro a impone riba Aruba, Boneiro y Corsou dia 5 di januari ultimo y cu keto bay ta vigente.

Asina ta sali na cla for di un rapport cu minister Steven Martina di Desaroyo Economico a laga traha riba e impacto cu e situacion na Venezuela tin riba nos economia. “Si e produccion abou di refineria Isla mester sigui, esaki lo tin un impacto negativo di alrededor di 500 miyon florin riba e Producto Interno Bruto (GDP) di Corsou”, sr. Matina a duna di conoce. Te cu algun siman atras refineria Isla tabata draai apenas riba 30 porshento di su capacidad di produccion.

Stock pa tres luna
Entretanto e planta Crude Distiller 3 (CD-3) ta bek den operacion y por produci suficiente combustibel pa mantene un stock pa tres luna. “E produccion sinembargo no ta surpasa 60 porshento y ta keda delicado pa motibo cu e planta di Curaçao Refinery Utilities (CRU) no ta entregando suficiente vapor”, Henny Cornelia vocero di Refineria Isla ta alerta.
Curaçao Ports Authority (CPA) y Kompania di Tou Kòrsou (KTK) ta e empresanan cu mas ta keda afecta directamente pa e produccion abou di refineria Isla. Den un situacion normal e impacto di Refineria Isla riba nos economia ta entre 16 pa 20 porshento.

Suministro di crudo
Te cu aworaki e embargo Venezolano no ta afecta suministro di crudo pero e scenario aki por cambia mirando e cambio di posicion di gobierno Venezolano. Prome minister Eugene Rhuggenaath ta confirma cu e motibo real di e embargo Venezolano ta e sancionnan di Union Europeo y no e problema di contrabanda di oro manera inicialmente a bini dilanti. “Aworaki Venezuela ta bisa cu tanten tin sancionnan ta mantene frontera cera”, sr. Rhuggenaath ta bisa.

Plan di continuacion
Entretanto gobierno di Corsou a instrui Curoil y Refineria di Kòrsou (RdK) pa traha riba un plan di continuacion den caso cu refineria Isla stop di entrega combustibel. E plan ta encera cu Curoil ta cuminsa haci tramitenan pa cumpra combustibel riba mercado internacional y ta zorg pa tin suficiente reserva. Curoil lo haci uzo di un asina yama ‘floating storage’ y tambe di cierto tankinan riba tereno di refineria pa warda e reservanan di combustibel.

Ta gobierno su intencion pa ni maske Venezuela stop di entrega crudo na refineria Isla, pa mantene e refineria den operacion uzando crudo di otro fuente. Pero pa esaki por cristalisa no solamente PDVSA mester duna su cooperacion pero tambe mester busca un operador cu ta dispuesto pa opera e refineria den un periodo transitorio te ku 2019. Prome minister Rhuggenaath ta confirma cu a haci peticion na Shell pa yuda busca un partner strategico pa opera refineria Refineria tanto pa largo plaso como pa e periodo transitorio denomina como ‘early step in’.