Inspeccion di salud promesa eterno? Tabatin inspeccion bao di e ley bieu caba…

image.jpeg

Ministro y Direccion di Salubridad Publico ta comenta riba actitud intransigente di hospital. Director di hospital cu ta contesta di un manera desafiante… Ta kico ta pasando den e pais aki? Esaki ta e manera cu e autoridadnan na ambos banda tin pensa di trata otro? Anto nos como ciudadano cu ta desea di mira nos interes den un cuido medico di calidad garantisa, mester para presencia tur e bataya verbal aki, y cu cual resultado positivo pa nos? Por lo pronto ningun; e unico cos cu nos a mira cu a cay dos morto recientemente y ni resultado di un investigacion drechi ni e famia, ni publico en general a haya di tende. Den e situacion aki, kico ta realmente nos por spera den sentido di mehoracion?

Desde su entrada como ministro, nos ta tende di e mandatario concerni cu ta trahando riba introduccion di un inspeccion di salubridad, regla den un cuadro legal adecuado. E introduccion di e ley a tuma luga algun tempo pasa caba. E ley manera nos por haye riba website di gobierno ta carga fecha di 15 di december 2014. E no ta regla solamente e inspeccion pero ta duna e cuadro di regla pa tur entidad den e tereno di cuido di salud. Manera su nomber ta bisa:”Landsverordening kwaliteit in de gezondheidszorg” (AB 2014 no. 74). Nos lo no bay den tur detaye di e ley aki, pero lo limita nos na algun aspecto relevante pa e tema  aki. Un prome aspecto ta e inspeccion cu e ley ta describi. Kico ta e inspeccion? Segun definicion di e ley nobo e ‘Inspectie’ ta e organisacion gubernamental cu ta keda designa via un Decreto nacional. E ‘inspecteur’ ta e ‘inspecteur gezondheidszorg’. Pero, esey no ta bisa cu den e ley bieu no tabatin un inspeccion, solamente cu e tareanan tabata cay pa Departamento di Salubridad Publico directamente. 

Ta dificil pa comprende cu ta bisa cu tanten e inspeccion nobo no ta ‘in place’, no por actua manera den e caso actual di hospital. Straño pasobra basicamente e facultadnan di e inspeccion bao di e ley bieu (Gezondheidsverordening) ta mescos pa loke ta e poder pa drenta y exigi tur informacion y documentacion al caso, si mester hasta cu ayudo di ‘de sterke arm’,  esta cuerpo policial. Den e ley nobo e podernan aki ta un poco mas amplia y ta abarca tambe e derecho di entre otro envolve instancianan di otro pais den Reino den un investigacion. No ta berdad cu den e situacion bieu un entidad manera hospital ta liber di duna cuenta.

Awor,  kico ta e responsabilidad di un entidad cu ta duna cuido, den e caso aki por ehemplo hospital? Articulo 8 inciso uno di e ley nobo aki ta bisa cu e dunado di cuido ta notifica inmediatamente na e inspector: a. Cualkier evento inespera of no premira cu ta relaciona cu e cuido cu e ta duna y cu a hiba na morto of lesion serio di un cliente; b. Violencia den e relacion di cuido. E dunado di cuido ta obliga di duna e inspector den caso di un notificacion manera menciona den e inciso anterior e datonan cu ta necesario pa e investigacion relaciona cu e notificacion cu a haci. Si den e caso actual hospital ta haya cu no ta un caso di ‘evento inespera of no premira’, keto bay e inspeccion si por haya cu esey ta asina y por ordena un investigacion. Of nos mester supone cu hospital ta haya cu e morto di mama y yiu recientemente tabata ‘spera y/o premira’?

Ademas e ley nobo di 2014 pa tur claridad ta contene un stipulacion di transicion cu e ley bieu ta mantene vigencia te cu e stipulacionnan di e ley nobo drenta na vigor . Es decir cu no tin un bashi entre e abolicion di e ley bieu y entrada na vigor di e ley nobo y sigur no pa loke ta inspeccion di salubridad. Ta p’esey ta bira mas incomprendibel ainda cu regularmente ta tende cu ‘no por haci nada pasobra e inspeccion no ta in place ainda’. Semper tabatin un inspeccion, cu e tabata haya e debido espacio pa traha independiente ta otro pregunta…

Resumiendo nos mester conclui cu no tin ningun motibo pa bisa cu no por tin un inspeccion di salubridad den operacion cu e debido autorisacion pa investiga y haya tur cooperacion di esnan envolvi, y ademas sanciona tur caso di falta di cooperacion. Tambe mester  ta posibel, si e ministro cu tempo ta desea di crea un inspeccion completamente pafo di e direccion di Salubridad actual, pa encarga por lo pronto e departamento aki cu e autoridad y responsabilidad y nombra e ‘inspector’ pa nan haci nan trabao. Si falta di placa ta stroba creacion di un inspeccion completamente autonomo, por lo pronto por resolve e asunto aki asina. Pa loke ta e obligacionnan di hospital den e asunto di duna cuenta den caso di evento grave, esakinan ta na vigor caba (y ainda)y no ta mira pakico hospital ta asumi e actitud desafiante aki.

You May Also Like

Banco Central moderadamente positivo

Banco Central a publica ayera su Economic Outlook pa aña 2018 y ta importante ...

Atrobe promesa di apertura di refineria?

Despues cu algun tempo pasa a haya e noticia di Citgo (cual di nan?) ...

Aruba ainda na un paso di ‘junk status’

Manera bisa na Hulandes: “geen nieuws, is goed nieuws.” Gobierno ta contento cu e ...

Den decision strategico ta mustra amor patrio…

Cu dia di Himno y Bandera tras di lomba, unda nos tur por a ...

Nos salario minimo ta miho cu di Corsou?

Depende con bo mir’e Entrante 1 di januari 2018 a adapta e salario minimo ...

editorial 2_40.jpg

KICO POR PAGA UN CONSEHERO? The sky is the limit?

E debate continuo na Colegio Arubano tabata trata tambe e asunto di salario di ...