Instagram lo paga un ‘bounty’ na investigadonan di siguridad pa haya evidencia cu appnan tercero ta haciendo mal uzo di bo data personal. E programa tin como meta pa curasha expertonan pafo di Instagram y su doño Facebook pa enfrenta un problema cu e red social ta enfrenta: appnan cu ta raspa data di usuario, of ta purba gaña bo pa comparti password y otro informacion sensitivo.

E programa yama ‘Data Abuse Bounty’, y ta un variacion di un programa ‘bug bounty’ tradicional, cual tipicamente ta paga investigadonan ora nan identifica vulnerabilidadnan cu hackernan por uza pa horta informacion.

“Nos meta ta pa proteha e informacion cu hende ta comparti riba Instagram y curasha investigadonan di siguridad pa reporta abuso potencial pa nos por tuma accion lihe”, manager di ingenieria di siguridad di Instagram, Dan Gurfinkel, a skirbi dialuna. E compania no a specifica con hopi lo paga e investigadonan, pero a bisa cu lo basa e bounty riba e impacto y calidad di nan reporte.

Facebook a lansa un programa similar na april 2018 durante e scandal di Cambridge Analytica, den cual un compania di consulta politico na Reino Uni a obtene record di miyones di usuarionan di Facebook for di un app tercero. E data a ser comparti den violacion di politica di Facebook, pero e compania no tabatin un manera pa track kico a pasa cu e data despues cu e app tercero a colecta esaki. Como reaccion na e scandal, Facebook a expande su programa di ‘bug bounty’ pa inclui abuso di data.

E anuncio dialuna ta un continuacion di e esfuerso ey, segun hefe di ingenieria di e compania, Nam Nguyen a bisa. “Expandiendo y construyendo for di e programa ‘bug bounty’ di Facebook ta un desaroyo clave den nos esfuersonan continuo pa siguridad, y nos ta gradici e comunidad di siguridad pa tur locual nan ta haci pa tene nos plataformanan sigur”, Nguyen a bisa.

E compania tambe ta pidiendo desaroyadonan pa yuda identifica fayonan den su ‘checkout’, cual ta permiti usuarionan haci compras sin sali di e app. E servicio actualmente ta disponibel pa usuarionan Mericano y den forma beta pa negoshinan, cual ta nifica un cantidad limita di retailernan por uza esaki pa bende na Merca.

 

LEAVE A REPLY

Please enter your comment!
Please enter your name here