Interpark Coney Island ta cla pa habri diahuebs

Instancianan concerni a keda cla cu tur inspeccion

Interpark Coney Island ta cla pa habri su portanan diahuebs awor oficialmente for di 6’or di atardi, pa e prome siman lo ta habri tur shete dia di siman.  Productor di e Interpark a clarifica noticianan cu a circula Facebook cu e parke supuestamente no lo a keda aproba na Bonaire, esaki no tabata e caso segun e propetario mes a confirma.

Productor di Interpark Coney Island, Steve Hudson  a anuncia cu e ‘coney island di mas grandi cu a yega di bin Aruba’ ta cla pa oficialmente habri diahuebs awo pa 6’or di atardi. Ayera durante un rueda di prensa hunto cu Risk Manager di APA (Aruba Ports Authority) y tambe e propetario di Interpark, a oficialmente anuncia cu diahuebs lo habri den e prome siman tur shete dia. Ta prome biaha tambe cu ta arma un coney island riba tereno di APA y asina cerca na Oranjestad. Ayera mainta definitivamente a keda cla 100% cu e inspeccion total di henter e parke aki, cu tur su 24 ekiponan. Tur ekipo a wordo oficialmente certifica por medio di entre otro DTI (Departamento di Inspeccion), Cuerpo di Bombero, Polis y otro gremionan concerni.  Interpark a haya e permiso den man oficialmente ayera pa por cuminsa draai e coney island.  E interes ta hopi grandi caba segun sr. Hudson, nan a haya cantidad di hende ultimo dianan cu tabata pasa puntra ki dia e parke lo ta cla pa habri. Cu tur respet pa tur otro promotornan, ningun otro promotor den pasado a yega di trece un coney island grandi manera esaki segun sr. Hudson a expresa ayera. E coney island lo ta na Aruba sigur pa tres luna despues cu sigui bay otro paisnan.

Tres inspeccion den total
Hudson: “El a dura mas hopi cu nos a anticipa. E motibo di e duracion no tin nada di haber cu e aparatonan, e tin mas tanto di haber cu e tardansa di trece e coney island na Aruba. Pa motibo cu el a bin di tres diferente pais; Colombia, Corsou y Venezuela. Cada biaha cu un parti bini mester a warda e otro pa nos keda cla.” Sr. Hudson a informa cu nan a pasa den tres inspeccion den total y ta contento cu tur cos a keda aproba. E forma riguroso cu nan a controla – unda segun sr. Hudson e instancianan a hinca nan nanishi na camindanan cu e mes no a pensa nan lo haci – a bay hopi positivo. “No ta nos ta sali bisa e ora ey cu e parke ta safe, pero ta e instancianan concerni cu ta carga e responsabilidad pa bisa cu e parke ta bon pa draai.  No tabata un hende, cada biaha a bin haci inspeccion a bin cu ocho pa dies experto den nan tereno, y nunca a constata nada cu tabata for di sla. Y no por ta asina tampoco si no awe mi no lo ta anunciando cu nos ta cla y nos ta bay habri e coney island,” sr. Hudson a bisa.
Tabata tin algun rumor cu a circula Facebook cu e coney island no a pasa su inspeccion na Bonaire. Esaki segun sr. Hudson ta incorecto pasobra tabata solamente un aparato cu no a pasa su inspeccion den e ultimo siman cu e mester a sigui traha na Bonaire . Esaki pasobra aparentemente e aparato su motor a kenta , y como medio preventivo, el a paga su mes mientras tabata tin hende den dje. “Anto hende a interpreta henter e asunto y haci e henter un cos grandi. Pero atrobe, si nos tin 24 aparato cu ta ‘goed ge keurd’ ta pasobra nos coney island ta bon y cla pa cuminsa,” sr. Hudson a splica. E propetario di coney island mes a splica tres siman atras na DTI kico a sosode na Bonaire y nan a compronde e situacion. Nos a puntra si e aparato ta akinan na Aruba awo y sr. Hudson a bisa cu si anto esaki tambe a keda inspecciona y aproba manera cada otro aparato cu tin eynan presente. E prijs di entrada na porta ta cinco florin na porta tanto pa mucha y adulto. Cada un aparato tin un prijs despues cumisando di 3 florin pa ticket.

 

You May Also Like

Parlamento ley (LM) (3).JPG

Parlamento a aproba Ley di CITGO y Valero

Den un ambiente tumultuoso parlamento a continua ayera cu tratamento di e ley encuanto ...

Pronto e Dama di Husticia lo haya su restructuracion

ORANJESTAD – Na luna di juli di aña 2017, un antisocial a comete acto ...

20jul FD seguro no kier cubri daño (1).jpg

Seguro Citizens no kier paga daño di accident desde october

Ciudadano hopi disgusta cu compania di seguro cu no kier cubri gasto di accidente ...

ATA: Economia internacional ta presta su mes pa pusha mas den turismo

Pa 34 biaha caba, Aruba Tourism Authority (ATA) a celebra su Annual Tourism Conference ...

5P3A0190.jpg

Dos homber arma a atraca y agredi persona na markthalen

Diabierna anochi na e markthalen cu tin pabou di ex DOW riba L.G Smith ...

trahado no sigura na Svb Br.jpg

SVb: Entrante 2017 periodo di gracia ta caba y lo bin boet

Ora cu januari 2017 habri, Banco di Seguro Social (SVb) ta bay cuminsa cu ...