Un investigacion academico publica den 2026 ta señala debilidadnan den sistema parlamentario di Aruba cu ta limita supervision di gobierno. Segun e estudio, concentracion di poder na gobierno y e manera cu presidente di Parlamento ta ser nombra ta afecta independencia parlamentario. E investigadornan ta recomenda reformanan constitucional y parlamentario pa fortalece supervision democratico.
E conclusionnan ta forma parti di e investigacion titula “Institutional transplantation and democratic performance in small island territories: The case of Aruba”, publica den revista academico Small States & Territories den 2026. Den un articulo anterior, Bon Dia Aruba a informa tocante e conclusionnan di e estudio relaciona cu sistema electoral, particularmente cu 16.5% di e votonan valido durante eleccion di 2024 no a resulta den representacion parlamentario pa e partidonan cu a ricibi nan. Den e parti aki, atencion ta concentra riba e debilidadnan identifica den supervision parlamentario, concentracion di poder na gobierno y independencia di presidente di Parlamento.
E investigacion ta examina con e institucionnan democratico cu Aruba a hereda di Hulanda ta funciona den contexto di un comunidad relativamente chikito. E autornan a analisa legislacion, disposicionnan constitucional, documentonan parlamentario y practicanan politico pa evalua si e sistema actual ta cumpli cu su funcionnan principal.
Un di e aspectonan central di e estudio ta relaciona cu e responsabilidad di Parlamento pa supervisa gobierno. Segun Constitucion di Aruba, ministernan mester duna cuenta di nan actonan na Parlamento y nan por sigui den nan funcion solamente mientras cu nan ta disfruta di sosten di mayoria parlamentario.
E principio aki ta forma parti di e sistema parlamentario democratico, den cual gobierno ta encarga cu administracion di pais, mientras cu Parlamento tin e responsabilidad di controla actuacion di gobierno y exigi splicacion tocante su decisionnan.
Sinembargo, segun e investigadornan, den practica e separacion aki no ta semper ser aplica di manera efectivo na Aruba. Segun nan analisis, e relacion estrecho entre liderazgo di partidonan politico, minister y miembronan di Parlamento ta contribui na un situacion den cual gobierno por domina e proceso parlamentario.
Un di e motibonan identifica den e estudio ta e manera cu ministernan ta ser selecciona despues di eleccion. Na Aruba, frecuentemente politiconan cu a haya mas voto ta bira minister, mientras cu otro candidato di nan partido ta ocupa asiento den Parlamento.
Segun e investigadornan, esaki ta crea un diferencia den influencia politico entre ministernan y parlamentarionan di coalicion, cu por haci supervision di gobierno dificil. Parlamentarionan por evita di critica of confronta ministernan cu tin un posicion fuerte den nan partido. E autornan ta considera cu e situacion aki por debilita separacion entre poder ehecutivo y legislativo, pasobra mayoria parlamentario por funciona demasiado cerca di gobierno.
E investigacion ta señala cu esaki por resulta den un sistema den cual e supervision parlamentario ta limita, mientras cu oposicion no tin suficiente herment pa exigi responsabilidad di gobierno di manera efectivo.
Segun e estudio, e concentracion di poder aki no ta un fenomeno exclusivo di Aruba. Investigacionnan anterior tocante paisnan chikito ta indica cu gobierno frecuentemente ta dispone di mas recurso y capacidad administrativo cu e institucionnan encarga cu supervisa su actuacion.
Den caso di Aruba, e investigadornan ta considera cu e situacion ta ser intensifica door di e tamaño limita di comunidad, relacionnan personal entre politico y ciudadano y rivalidad entre partidonan politico.
E estudio tambe ta señala cu gobierno tin un influencia considerable riba agenda parlamentario. Segun e autornan, esaki por limita oportunidad pa Parlamento determina independientemente cua asunto mester ser trata y con supervision di gobierno mester ser organisa.
Otro aspecto menciona ta ausencia di un Corte Constitucional na Aruba. E investigadornan ta splica cu actualmente no tin un instancia constitucional specialisa cu por ofrece un interpretacion autoritativo di e reglanan cu ta determina relacion entre gobierno y Parlamento.
Segun e estudio, esaki ta contribui na un situacion den cual e mayoria politico tin un influencia importante riba manera cu disposicionnan constitucional ta ser interpreta y aplica den practica.
Pa atende e problema aki, e autornan ta menciona posibilidad di establece un Corte Constitucional cu por evalua conflictonan relaciona cu responsabilidad ministerial y funcionamento di sistema parlamentario.
E investigadornan ta considera cu un instancia asina por contribui na un interpretacion mas independiente di e reglanan constitucional y fortalece posicion di Parlamento.
Otro alternativa cu e estudio ta menciona ta adapta e reglanan cu ta determina e diferencia entre responsabilidadnan di minister y esunnan di miembro di Parlamento.
E meta lo ta pa reduci e influencia cu ministernan por tin riba mayoria parlamentario mediante nan posicion como lider politico.
Ademas di supervision parlamentario, e investigacion ta dedica atencion particular na posicion di Presidente di Parlamento, un funcion cu segun e autornan ta fundamental pa garantisa funcionamento independiente di e institucion.
Presidente di Parlamento tin responsabilidad pa dirigi reunionnan, organisa agenda, mantene orden durante debate y garantisa cu miembronan di Parlamento por ehecuta nan funcionnan conforme e reglanan existente.
Segun e estudio, e funcion aki mester ser ehecuta di manera imparcial, independientemente di afiliacion politico di e persona cu ta ocupa e posicion. Sinembargo, e investigadornan ta considera cu e structura actual di Aruba no ta duna suficiente garantia pa proteha e independencia aki.
Un di e aspectonan cu e investigacion ta cuestiona ta e procedemento pa nombra Presidente y Vice-presidente di Parlamento. Na Aruba, miembronan di Parlamento ta vota pa scoge e personanan cu lo ocupa e funcionnan aki. Sinembargo, segun articulo III.12 di Constitucion di Aruba, e nombramento oficial ta ser confirma mediante un Landsbesluit, basa riba e nominacion presenta door di Parlamento.
E investigadornan ta señala cu e procedemento aki ta basa riba un modelo Hulandes anterior na 1983. Nan ta considera cu, a pesar cu Parlamento mes ta determina su nominacion, e participacion formal di gobierno den nombramento ta crea preguntanan tocante independencia di e institucion.
Segun e estudio, Aruba por considera un modificacion constitucional cu lo permiti Parlamento nombra directamente su Presidente y Vice-presidente, sin necesidad di un Landsbesluit di gobierno. E autornan ta argumenta cu esaki por contribui na fortalece independencia parlamentario y separacion entre poder legislativo y ehecutivo.
Otro aspecto cu e estudio ta subraya ta duracion di e funcion di Presidente di Parlamento. Segun e investigadornan, Reglamento di Orden di Parlamento di Aruba ta contempla cu nombramento di presidente por ser reconsidera cada aña parlamentario. Na Hulanda, en cambio, presidente ta ser eligi pa henter e periodo parlamentario. E autornan ta considera cu un periodo mas largo por contribui na stabilidad y independencia di e funcion.
E investigadornan ta considera cu un periodo di nombramento mas largo por contribui na stabilidad di e funcion y permiti e presidente desaroya experiencia den direccion di debate y solucion di conflicto parlamentario.
Sinembargo, nan ta enfatisa cu un cambio asina mester bay compaña di autoridad di Parlamento mes pa determina ken ta ocupa e posicion.
E estudio tambe ta examina e influencia di coalicionnan politico riba seleccion di Presidente di Parlamento. Segun e autornan, e posicion frecuentemente ta ser ocupa door di un representante di e partido mas grandi den coalicion, mientras cu Vice-presidente ta bin di un partido socio.
E investigadornan ta considera cu e practica aki por crea e impresion cu direccion di Parlamento ta relaciona directamente cu acuerdo politico pa formacion di gobierno, en bes di cu necesidadnan independiente di e institucion.
Segun nan analisis, esaki por afecta manera cu agenda parlamentario ta ser determina, debate ta ser organisa y preguntanan critico dirigi na gobierno ta ser trata.
E estudio ta señala cu e reglanan actual ta permiti cierto espacio pa interpretacion politico den aplicacion di autoridad di Presidente di Parlamento. Den un ambiente politico caracterisa pa division entre partidonan, e situacion aki por genera desacuerdo tocante imparcialidad di decisionnan parlamentario.
Pa fortalece independencia di e funcion, e autornan ta propone revisa Reglamento di Orden y introduci disposicionnan mas specifico y neutral cu ta limita posibilidad di interpretacion politico.
Nan ta menciona tambe posibilidad di considera un presidente cu ta bin di un partido cu no ta forma parti di coalicion gobernante. Segun e investigadornan, esaki por contribui na reduci preocupacion tocante faboritismo y concentra menos poder den man di e mayoria politico.
E propuesta aki no ta nifica cu e estudio ta determina cu un presidente di oposicion automaticamente lo actua di manera imparcial, sino cu un distribucion diferente di responsabilidadnan por fortalece balans institucional.
Den su conclusion, e investigadornan ta señala cu e sistema parlamentario hereda di Hulanda no ta necesariamente funciona di manera adecua den contexto di Aruba, entre otro debi na tamaño chikito di Parlamento, relacionnan personal y concentracion di poder politico. Segun e estudio, reforma constitucional, adaptacion di Reglamento di Orden y un separacion mas cla entre gobierno y Parlamento por contribui na fortalecemento di independencia parlamentario y supervision democratico, teniendo cuenta cu e realidad particular di Aruba.
