E mocion di Parlamento di Aruba, entrega pa MEP, unda ta pidi clarificacion pa expresionnan di Su Altesa Real Prinses Beatrix ta un asunto di Aruba na prome instante. Asina Secretario di Estado pa Asuntonan di Reino Eric van der Burg a bisa durante su recien conferencia di prensa.

Manera ta conoci, fraccion di MEP a entrega un mocion den Parlamento pa instrui Gobierno di Aruba pa pidi aclaracion riba pensamentonan di Prinses Beatrix, den su periodo como Reina, riba difunto Betico Croes. Net algun aña despues di a bira Reina, na cabez di Reino Hulandes, Beatrix a skirbi algun pensamento fuerte na 1983 contra Betico Croes kende tabata luchando pa e status aparte di Aruba for di Antias Hulandes. “Gana tempo, e lo cay afo un dia (wegvallen), warda pa esey,” ta frasenan cu Beatrix a usa refiriendo na e lider politico Arubano y cu pa MEP ta ilustra un actitud hopi negativo contra Betico Croes. Hasta su mama, Prinses Juliana kende te cu 1980 tabata e Reina, a haci anotacionnan negativo contra Croes.

Pa MEP, e ta esencial pa haya aclaracion riba particularmente e palabra ‘wegvallen’ esta cay afo, y kico su nificacion tabata e tempo y como tal kier sa ki informacion Gobierno Hulandes tabatin riba Betico Croes. Como tal, ta instrui Gobierno di Aruba pa pidi tur documento, nota di maneho di Hulanda pa clarifica e posicion Hulandes. Den un otro palabra, kier pa Gobierno di Aruba haci un investigacion profundo riba e actitud di Gobierno Hulandes riba Betico Croes. E mocion a haya sosten di henter Parlamento di Aruba y copia a bay pa Tweede Kamer tambe.

“Nos no a discuti e tema aki den Conseho di Minister di Reino,” Van der Burg a bisa, agregando cu contenido di e reunionnan ademas no ta publico. “E mocion a keda entrega e siman aki na Gobierno di Aruba y ta keda na Aruba pa reacciona. E no ta un mocion dirigi na Gobierno di Hulanda.” Van der Burg a bisa cu a tuma nota si di locual Prinses Beatrix a bisa e tempo y e forma con a papia di Aruba durante e periodo ey. “Mi a papia di esaki si cu tanto Prome Minister Mike Eman y cu Gobernador ora cu mi tabata na Aruba.”

Van der Burg tambe a reitera e colaboracion cu Merca pa control riba traficacion di droga den awanan teritorial di Corsou, Boneiro y Aruba pa medio di e tratado di Forward Operation Location, FOL, cu a keda extendi. “E ta importante pa Reino continua cu e relacion cu Merca, un relacion di largo plazo, sigur si ta trata e lucha contra traficacion rond di e islanan ABC.” Van der Burg ta reconoce si cu Merca ta hiba su propio maneho, referiendo aki na locual a sosode na 2025 unda a ataca supuesto botonan transportando droga (red. no a confirma nunca cu berdad ta trata di traficadornan y Reino Hulandes a tuma distancia na e accionnan aki). FOL di otro banda, mester opera segun e leynan di Corsou, Hulanda y Aruba.

Papiando di siguridad, Europa y Hulanda ta blanco continuo di atakenan cibernetico. E pregunta ta si den e sistema nobo aki, di agresion digital, e ta responsabilidad di Reino pa percura cu tur e paisnan ta igualmente protegi.

Aki ta unda e Secretario di Estado a bisa cu “Aruba mes ta responsabel pa contra aresta cualkier atake cibernetico, pero den caso cu mester ayudo,Hulanda ta dispuesto pa asisti.” Manera ta conoci, diferente Supermercado grandi rond Europa a confronta problema grandi cu nan sistemanan di refrigeracion, cu ta digitalisa. Hackers, te ainda desconoci ken, a logra desregula e thermostaatnan di miles di ‘coolers,’ cu consecuencia cu productonan a daña, imposibel pa ofrece na consumidornan. E perdida, incluso na Hulanda ta di algun cien miyon euro. E atake riba e sistemanan di refrigeracion di supermercadonan ta djis un ehempel di atakenan cibernetico continuo.

Na Aruba tin ehempel di atake cibernetico cu a haci impacto grandi, manera a sosode na Dr. Horacio Oduber Hospital algun aña pasa. “Siguridad cibernetico di Aruba ta un asunto nacional di Aruba,” van der Burg a bisa. “Pero, semper por pidi asistencia di Hulanda si mester.”

Eric van der Burg lo ta den Caribe entrante otro siman. E lo ta na St. Eustatius pa ‘Statia Day,’ y despues lo biaha pa St. Maarten pa e Conferencia di Reino. “Ta mi tarea pa reforsa relacionnan den Reino,” Van der Burg a enfatisa. Consequentemente, e decision di Gabinete Jetten pa reduci e cantidad di ambtenaar pa corta gasto publico no por bay contra e mision aki. Lo reduci e cantidad di trahado di Ministerio pa Asuntonan Interior, pero Van der Burg ta convenci cu esaki lo no tin impacto riba e trabounan cu mester haci pa tene e trabounan pa Reino Hulandes fuerte.

Pa loke ta Hofa, esta e Rijkswet Houdbare Financien Aruba, e ta pendiente di landsverordening pa pasa den Parlamento di Aruba y den caso cu esaki no ta bira realidad, lo no tin Hofa ni tampoco e areglo special di interes pa prestamonan.