(AFP)—Iran a bisa diaranson cu no lo habri Estrecho di Hormuz mientras blokeo naval di Merca ta keda na vigor, yamando esaki un “violacion evidente” di e tregua entre e dos enemigonan.
Mientras tanto, e Guardia Revolucionario di Iran a bisa cu nan forsa naval a confisca dos barco di container cu tabata purbando di crusa e estrecho strategico.
Vocero di ministerio di Exterior Esmaeil Baqaei a bisa cu republica Islamico ta aprecia esfuersonan di Pakistan pa pone fin na e guera den Medio Oriente, pero no a comenta riba extension di tregua anuncia pa Merca.
Presidente di Merca Donald Trump a bisa diamars cu e ta extendiendo e tregua despues di un peticion di mediadornan Pakistani y pa duna mas tempo pa e negociacion di paz.
“Un tregua completo solamente tin sentido si e no ta ser viola door di un blokeo naval,” presidente di parlamento di Iran Mohammad Bagher Ghalibaf a bisa diaranson.
“Habri Estrecho di Hormuz no ta posible mientras tin un violacion evidente di e tregua.”
A pesar di e ultimo serie di atakenan riba trafico maritimo den Golfo, un segunda ronda di negociacion entre Merca y Iran por tuma lugar den e proximo tres dia, New York Post a reporta, citando Trump y fuente Pakistani.
“E ta posible!” segun Trump a skirbi den un mensahe ora a puntr’e tocante e fuente di Pakistan, cu a bisa cu un segunda ronda por pasa den dos pa tres dia.
Trump tambe a afirma cu Iran a para e supuesto plan pa ehecuta ocho muher deteni pa protestanan contra gobierno, despues cu el a pidi Teheran pa libera nan.
Pero husticia di Iran a describi e comentario como “noticia falso”, bisando cu e muhernan nunca no a enfrenta castigo di morto.
Barconan confisca
Monitor di seguridad maritimo basa na Reino Uni a confirma cu tres barco comercial a reporta incidente cu boto arma den Estrecho di Hormuz, e entrada internacional pa industria di petroleo y gas di Golfo, unda forsanan di Merca y Iran ta bringando pa control.
“Forsa naval di Guardia Revolucionario Islamico awe mainta a identifica y a para dos barco den Estrecho di Hormuz,” Guardia a bisa.
“E dos barco culpable di violacion… a ser confisca pa forsa naval di IRGC y dirigi pa costa di Iran.”
Nan a identifica un barco como MSC Francesca cu bandera di Panama y otro Epaminondas cu bandera di Liberia. Pagina di rastreo Marine Traffic a mustra e ultimo ubicacion di ambos mas cerca di costa di Iran, noordoost di Oman.
Anteriormente, monitor maritimo Britanico UKMTO a bisa cu un barco di container a reporta cu un boto di Guardia Revolucionario di Iran a tira riba dje 15 miya nautico noordoost di Oman, causando daño na cabina pero sin victima.
Separadamente, un tercer barco a haya tiro riba dje y a para ocho miya nautico oost di costa di Iran, UKMTO a bisa, sin identifica e agresornan.
Compania di seguridad Britanico Vanguard Tech a identifica esaki como container Euphoria cu bandera di Panama, cual nan a bisa tabata “saliendo di Estrecho di Hormuz”.
US Navy ta purbando di blokea embarcacionnan cu ta bay y bin di wafnan Irani, mientras Teheran a bisa cu embarcacionnan mester pidi permiso pa sali of drenta e Golfo door di e estrecho, un ruta pa un quinta parti di petroleo mundial y gas natural likido durante tempo di paz.
Departamento di Defensa di Merca a bisa diamars cu forsanan di Merca a intercepta y subi riba un barco “sin estado y sanciona”. AFP a identifica e barco como uno liga cu actividad Irani. Ambos banda ta acusa otro di viola e tregua.
Iran practicamente a cera e estrecho durante siete siman desde cu Merca y Israel a lansa un gran atake contra republica Islamico cu a manda Medio Oriente den guera.
Frente di Libanon
E destino di negociacionnan di paz organisa pa Pakistan ta keda incierto. Un ronda anterior a collapse cu Teheran acusando Merca di haci demanda excesivo riba Estrecho di Hormuz y su programa nuclear.
Na Libanon, cual a ser hala den e guera ora Hezbollah a lansa racket na Israel den represalia pa e morto di lider supremo di Iran, atakenan Israeli a mata cuatro hende diaranson, media estatal Libanes a bisa.
Presidente di Francia Emmanuel Macron a anuncia cu un segundo soldad Frances, herida den un emboscada fin di siman contra forsa di paz di UN na Libanon cu ta culpa riba Hezbollah, a muri.
Un prome soldad a ser tira mata den e emboscada diasabra, pa cual Hezbollah a nenga responsabilidad.
Corant Libanes Al-Akhbar a bisa cu un atake aereo Israeli a herida dos di su periodistanan diaranson mientras nan tabata trahando cerca di e frontera cu Israel.
Un otro tregua separa di 10 dia a ser acorda entre Israel y Libanon diabierna y tabata inclui Hezbollah.
Israel y Libanon, cual no tin relacion diplomatico, lo tene negociacion nobo na Washington diahuebs, un oficial di Departamento di Estado a bisa AFP.
Atakenan Israeli riba Libanon a mata por lo menos 2.454 hende desde comienso di guera, segun ultimo cifranan di gobierno Libanes.
