E luna aki, minister di Defensa na Hulanda, Dilan Yeşilgöz-Zegerius, a entrega un rapport titula Kiezen zonder Verliezen? — Strategische Monitor Defensie den cual a describi con e ambiente politico ta cambiando rond mundo y ki sorto di efecto esaki por tin pa Reino Hulandes. A pesar cu e rapport ta analisa e impacto riba interes di Reino, no tin ningun mencion directo di e islanan CAS den Reino Hulandes.
E monitor strategico a ser entrega dia 1 di september na Eerste y Tweede Kamer como tambe prome ministernan di Aruba, Corsou y Sint Maarten. Encarga pa minister Yeşilgöz-Zegerius y prepara pa Instituut Clingendael, e monitor ta forma parti di un obligacion di e mandatario Hulandes bao Articulo 3 di Wet financieele defensieverplichtingen. E ley aki ta provee un base pa establecimento di reglanan pa defensa y proteccion di interesnan di Reino y ta obliga un minister di Defensa di gobierno Hulandes entrega un monitor di strategia nobo cada cuatro aña. E ley aki tambe ta relevante pa islanan den Caribe Hulandes, ya cu e ta crea un marco di defensa pa henter Reino y no solamente Hulanda. Es mas, si un monitor di strategia trece cambio den politica di defensa, e memorandum di defensa cu ta resulta di esaki lo toca e responsabilidadnan comparti di Hulanda y islanan CAS pa desvia menasanan regional y protege nos interes.
E Wet financieele defensieverplichtingen a bira operativo apenas e aña aki, pues no a resulta den cambionan tangibel pa nos isla. Sinembargo, su beneficio por ta mas structural: evaluacion strategico di Hulanda y transmision di esaki na gobiernonan di CAS por duna nos un oportunidad pa drenta den dialogo tocante e retonan di seguridad.
Di e manera aki, un monitor di strategia pa defensa ta keda relevante pa islanan den Reino. Pues pakico no tin ningun mencion di Aruba, Corsou ni Sint Maarten?
Puntonan relevante pa Caribe Hulandes
Investigadornan di e monitor strategico a yega na varios conclusion cu por ta importante tambe pa islanan CAS. Por ehempel, nan a menciona un cambio significante den entorno politico global. Segun e rapport, e clima politico ta mirando cambionan cu no por predici, unda potencianan grandi ta keda competi pa influencia. Den region Caribe y Sur America, nos a mira con Merca a implementa su politica contra narcotrafico. Por recorda ainda e captura y aresto di ex-presidente Venezolano Nicolas Maduro cu a bira un punto di debate fuerte tocante derecho internacional y Merca su campaña pa amplia su influencia den Occidente.
E aresto di e ex-lider di Venezuela a bin despues di un serie di atake riba botonan cu Merca a acusa di ta transportando droga pa estadonan Mericano via un ruta den Caribe. E atakenan aki tambe a causa preocupacion for di varios pais den Caribe, specialmente pasobra e bombardeo di e botonan aki no tabata sosteni pa evidencia concreto cu personanan riba e nave por ta narcotraficante. Esaki a pone hopi pensa tocante e seguridad di piscadornan cu ta pasa oranan riba lama habri ta pisca pa sostene nan famia.
E dos operacionnan di Merca a pone parlamento di Hulanda reconoce e peligronan cu ta existi specialmente pa Aruba, Boneiro y Corsou cu ta situa hopi cerca di e peninsula Paraguana di Estado Falcon na Venezuela.
Durante un debate den Tweede Kamer tocante e operacionnan di Merca, minister di Asunto Exterior David van Weel a enfatisa cu e incidentenan no tabatin ningun consecuencia directo pa Aruba, pero a bisa cu a realisa planificacion extenso di emergencia cu teritorio Caribense den Reino. Tweede Kamer tambe a reconoce durante e debate otro riesgonan di un posibel crisis politico den region, entre otro migracion na gran escala, interupcionnan na suministro di cuminda y combustibel, of aumento di actividad criminal.
Un otro topico interesante den e rapport ta conecta cu seguridad maritimo. Mirando cu islanan CAS ta rondona pa centenares kilometer di lama, e tema aki tambe ta relevante pa Caribe Hulandes. E rapport ta analisa varios riesgo y vulnerabilidadnan dentro di e sector di defensa maritimo. Mencionando entre otro con infrastructura maritimo ta birando mas vulnerabel, con desaroyo tecnologico ta cambiando e panorama di defensa maritimo y con logistica maritimo y waf ta cada bes mas bao presion, investigadornan ta enfatisa e importancia pa tin un sistema di seguridad interconecta pa mantene acceso maritimo, protege infrastructura y mantene operacion di rednan maritimo durante intento di disrupcion. Sinembargo, ningun di e puntonan treci dilanti ta haci mencion di e parti Caribense di Reino y e vulnerabilidadnan cu ta existi den e sistema di seguridad maritimo den region. Manera ta conoci, seguridad maritimo di Aruba ta cay bao maneho di wardacosta di Caribe, cual tin infrastructura critico ambos na Aruba y Corsou y ta forma parti di un responsabilidad comparti di Hulanda y e islanan. Fuera di esaki, infrastructura di Aruba y Corsou ta conecta cu defensa di islanan BES (Boneiro, Saba y Sint Eustasius). Pues un analisis riba e strategia Hulandes pa seguridad maritimo mester inclui tur pais den Reino Hulandes pa asina percura cu tin cooperacion estrecho den e sector.
Cambio di clima tambe ta un asunto cu a bin dilanti den e monitor strategico. Den e rapport, investigadornan ta caracterisa cambio di clima como un asunto pa seguridad y defensa. Un di e argumentonan principal tabata con clima extremo por pone presion riba operacion y preparacion militar, señalando un necesidad pa adapta infrastructura y ekipo entre otro. Cu cambio climatico, defensa di Reino Hulandes tambe lo por mira un aumento den demanda pa atende cu desasternan natural. Investigadornan ta señala cu infrastructura y ekipo militar ta hunga un rol specialmente importante den respuesta na crisis humanitario, y pues lo mester ser adecuadamente adapta.
Islanan den Caribe Hulandes tambe a mira un evaluacion similar for di Nacionnan Uni. Na 2024, UN a publica su “2024 Annual Results Report for the Dutch Islands” cual publica na juli 2025, e organismo global a conclui cu Aruba, Corsou y Sint Maarten mester di medidanan di adaptacion na cambio climatico, preparacion pa posibel desaster natural y resiliencia comunitario. Pa esaki, UN ta enfatisa cu mester mas inversion pa protege comunidadnan vulnerabel y recursonan natural mientras riesgonan climatico ta aumenta tur aña.
A pesar di a trece dilanti varios asunto cu tambe toca interes di Aruba, Corsou y Sint Maarten directamente, e scala di e investigacion Hulandes ta laga di desea. Ta parce cu e metodologia di e rapport tabata concentra mas riba e posicion di Hulanda memey di tendencianan mayor rond mundo, en bes di un evaluacion di seguridad den Reino Hulandes. Y esaki ta trece algun pregunta dilanti: Ki balor e rapport aki tin pa Caribe Hulandes e ora? Un analisis riba strategia di defensa Hulandes ta nifica automaticamente un analisis riba scala Caribense? Kico e ausencia di Caribe Hulandes den un rapport supuestamente den interes di Reino ta bisa tocante e posicion di islanan CAS den Reino?
