Instituto di Israel pa Investigacion Biotecnologico, dependiente di Ministerio di Defensa, a anuncia cu a desaroya un anticuerpo pa coronavirus, cu ta preparando e registro di e patente y cu proximamente lo tuma contacto cu compania farmaceutico pa produci esaki na escala comercial.
Den un comunicado conhunto cu Defensa, e centro di investigacion ta sigura cu e anticuerpo desaroya ta ataca e virus di hende enfermo y ta neutralisa esaki. “Segun investigadonan di e instituto, dirigi pa profesor Shmuel Shapiro, e fase di desaroyo di e anticuerpo a finalisa”, segun e comunicado. Minister di Defensa Israeli, Naftali Bennett, a bishita e laboratorio di e instituto na Ness Ziona, sur di Tel Aviv, unda a mustr’e e anticuerpo, ‘cu ta ataca e virus di forma monoclonal’, y a califica e hallazgo aki como un ‘logro asombroso’.
“Mi ta orguyoso di e personal di Instituto di Biotecnologia pa e gran avance aki. Su creatividad y e mente hudiu a conduci na e logro asombroso aki. Henter estado di siguridad lo continua operando na frente (di e lucha contra) e coronavirus”, Bennett a expresa den e comunicado. Esaki no ta precisa si a haci test den humano di e anticuerpo. Oficialnan di halto rango den siguridad a declara na e emisora estatal Kan cu e descubrimento ta e prome di su tipo na nivel mundial.
Segun e corant digital Times of Israel, rond mundo tin alrededor di cien team di investigacion buscando un vacuna pa SARS-CoV-2 cu a provoca un pandemia cu a paralisa mundo, di cual un decena ta den prome etapa di test den humano. Na maart, expertonan a adverti cu si desaroya un vacuna, esaki lo dura sikiera 18 luna pa keda disponibel, maske algun calculo ta mas pesimista.
E instituto di Israel pa Investigacion Biotecnologico ta dedica, entre otro, na investigacion riba armanan kimico y na busca antidoto pa esakinan. Na maart, e corant Haaretz a publica cu e centro aki a logra avancenan serio den su buskeda pa un vacuna, pero Defensa a desmenti esaki y a sigura cu lo informa na momento cu esaki ta e caso.
Desde cu a detect’e na China na cuminsamento di e aña aki, coronavirus a expande na henter planeta, cobrando bida di alrededor di 250mil persona, contagiando sikiera tres miyon y mey, y a cera na cas un gran parti di humanidad, paralisando economia mundial.
