Fiscalia Italiano a duna ordo diamars e beslag temporal di e barco humanitario Spaño ‘Open Arms’ y e desembarke, na e waf di Lampedusa (Italia), di e alrededor di 90 migrante cu ainda tabata abordo; poniendo un fin asina, pa aworaki, na e agonia slow cu e tripulacion a pasa aden durante casi tres siman.

Fiscal di Agrigento (Sicilia), cu ta cay bou di Lampedusa, Luigi Patronaggio, a tuma e decision despues di a bay abordo di e barco Spaño, compaña pa varios dokter pa verifica e estado di e migrantenan y e situacion cu ta reina abordo, describi dor di e tripulacion como desespera.

Minister di Defensa, Margarita Robles, a expresa su satisfaccion pa e decision di e Fiscalia Italiano di duna ordo pa e inmigrantenan di ‘Open Arms’ desembarca na Lampedusa, y a afirma cu Gobierno Spaño ta spera di wak con e situacion ta sigui desaroya post e decision hudicial.

Robles a reacciona asina ora el a ser puntra riba e decision cu su Gobierno lo tuma pa loke ta e barco di Armada cu tan a caminda pa Lampedusa pa compaña e ‘OpenArms’ den su biahe pa Palma, caminda, prome cu e decision hudicial Italiano, e inmigrantenan lo mester a bay desembarca.

E Prome Minister Italiano, Giuseppe Conte, a renuncia ayera cerca President di Republico, Sergio Mattarella, despues di e crisis di Gobierno cu tin na e pais, y for di mañan mes, e Hefe di Estado lo consulta e Partidonan Politico riba e posibilidad di forma un gabinete nobo, of di yama eleccionnan anticipa.

Presidencia di Republica a emiti un comunicado indicando e fechanan di e consultanan aki, cu lo cuminsa mañan cu e President di e Camaranan y cu representantenan di algun partido chikito, y diahuebs Mattarella lo sinta cu e partidonan grandi.

 

LEAVE A REPLY

Please enter your comment!
Please enter your name here