E ta un hoben cu den ultimo lunanan su talento a surpasa e limitenan na unda el a pone baila for di e mas chikitinnan te esnan mas grandi cu e frase ‘Feeling good…feeling nice’, den entrevista special aki Bon Dia Aruba a papia cu Jair  Dijkhoff  ‘Casper’ e rey di Aruba Caiso and Soca Monarch 2023, Artista di Aña pa diferente medionan di comunicacion y ganado di Roadjam 2023.

Jair Dijkhoff  cu awor tur hende ta conoc’e como Casper, ta un hoben cu a lanta na Tanki Lendeert, Noord, Madiki y Dakota a expresa cu el a cuminsa cu e parti di cantamento for di chikito, despues el a hunga baseball, ora e tabatin 13 of 14 aña a bay den area di tocamento den brassbrand loke a bira un parti di su bida, na unda cu den un edad di 20 aña el a hinca su mes den varios actividad boluntario pa asina ey habri un base pa e por haci hopi cos, segun el a conta, na e momentonan aki e ta traha na WEB den e parti di Receipt.

Igualmente el a bisa cu aña pasa el a drenta den area di medionan di comunicacion como esun di radio na unda e tin un espacio como locutor tur dia di 5pm pa 7pm cu su programa “Jaigoo’s Groovyhour” como tambe e ta na television y na aña 2022 el a dicidi di participa den un di e eventonan di musica mas grandi di Aruba su “Caiso and Soca Monarch” loke a duna un origen na su historia den mundo di soca y cu na 2023 el a haya e titulo di honor di Roadjam, Rockie of the year y Radio Jam Artista di Carnaval di aña 2023.

“Semper ma gusta soca, pero door di un locura e idea aki a bira uno realidad danki na mi Mighty Campo cu a yuda mi, Sergio Barros, Jeromin Lampe, Hubert Thiel pa asina nos a logra haci e soño pero tambe un idea di locura, bira un realidad, soca ta algo cu semper ma gusta y ta un di mi generonan faborito” el a bisa.

Ora el a subi stage pa prome biaha interpreta e cantica cu awor tur hende ta pidi p’e na radio, Jair a señala cu el a sinti hopi nervio “mi curason tabata bati masha duro mes pero ora ma subi stage y wak tur e publico mi nervio a baha y mi tabata hopi excited mes.”

Ora Jair a gana e titulo absoluto di Caiso and Soca Monarch tabatin cierto rumornan den caya na unda a bin dilanti un discusion si Caiso and Soca ta un genero di districto San Nicolas na unda esey a causa hopi reaccion riba rednan social y hasta cierto personanan den medio a yega di papia di dje tambe.

Di esaki Jair a bisa cu “mi a haya hopi critica di parti di hendenan cu nomber grandi hopi conoci di San Nicolas cu nan ta mir’e algo manera cu no ta bon, pero tur hende tin nan opinion, mi ta respeta tur hende y mi ta keda cu e carisma y e amor pa tur hende, mas cu claro e respet y mi ta respeta tur opinion, nan decision ta nan ta tum’e y nan tin derecho di expresa nan mes pero no cu esey ta afecta mi, pasobra mi no ta enfoca riba cosnan negativo, a mi ta enfoca riba cosnan positivo so.”

Ademas el a afirma cu aworaki ta e chens pa e hobennan manera Jair cu apenas tin 20 aña pa “asina cuminsa engrandece nos carnaval y nos Caiso and Soca Monarch, mi no ta haya cu ta na su luga pa caba cu otro asina aki si nos na Aruba mester uni den musica, nos por logra hopi mas cosnan mas grandi en bes di critica otro.”

Awor cu temporada di carnaval a pasa Jair a informa cu su persona ta bay sigui cu par di proyectonan cu e tin den mente y cu durante transcurso di aña e pueblo lo haya sa sigur kico ta bay ta su proximo paso, “nos lo bay saca sino ta dos, maximo tres cancion e aña aki cu Dios duna nos bida y salud y oportunidadnan sigui habri pa nos logra saca maximo tres cancion.”

Pa finalisa, Jair a trece su mensahe dilanti “pa nos keda apoya otro, show respet, show love, no pa engrandece nos carnaval so sino pa nos cultura tambe, mi ta spera di mira mas hobennan positivo cu ta willing pa logra nan soñonan den bida of si ta un idea di locura pero bay p’e, mi ta spera nos por mira un Aruba uni, un Aruba cu hopi bendicion y logro den futuro no solamente pa mi so, sino pa nos tur.”