Un sistema di riool central pa proteha nos lama y pais

Prome resultadonan di e barco di investigacion Pelagia ta mustra cu lama- y beachnan di Aruba y tambe e islanan di Corsou y Boneiro ta bou menasa di e bacteria Cyano, cu ta miho conoci como alga blauw, cu por haci hende y bestia malo.

E barco a sali na december for di Hulanda pa un expedicion di 7 luna unda entre otro ta investigando e lama den nos region. Un total di 100 cientifico lo subi abordo pa haci diferente investigacion.

Uno importante ta investigando (atrobe) e rifnan di coral di Caribense Hulandes. Manera conoci nan ta den mal estado. Segun un di e lidernan di expedicion Fleur van Duyl nan ta investigando pa 40 aña caba e rifnan na Boneiro y Corsou. Na comienso nan a mira cu e ta cubri (cu diferente organismo) pa 60 pa 70%. Pero awor e porcentahe ta 15% cual ta mustra e mal estado di e rifnan. Awor pa prome biaha nan ta investiga e rifnan aki na Aruba pero nan ta mira mesun situacion aki. E rifnan asina no ta crece manera mester ta.

E rifnan manera conoci ta importante pa varios motibonan: pisca ta nace y biba den dje; nan ta esencial pa e sistema ecologico y nan ta un proteccion di nos costanan. E ultimo a bira mas importante cu e cambio di clima causando e aumento di nivel di lama. “E nivel ta subi 2 mm anualmente. E ultimo añanan esaki a subi cu 10 centimeter total. Pues si e rifnan no ta crece, e lama subi tera mas frecuente”, sra. Van Duyl ta bisa. E investigadonan a traha pa prome biaha un mapa unda por mira e lamanan hundo di Boneiro cu e rifnan. Nan a ripara cu unda tin construccion y mas vivienda, cu e calidad di e rifnan ta menos.

“Si e desaroyo ta keda asina, mester tene cuenta cu construccion di vivienda, cu esaki no ta pa semper mas. Cu aki 20 aña bo mester sali bo cas como cu e lama ta drenta e prome piso continuamente”. Asina e cientifico ta mustra cu un tercer parti di Boneiro sin un bon proteccion di e rifnan, lo bay bou awa frecuentemente.

Contaminacion local
E causa na prome instante, segun sra. Van Duyl ta contaminacion local di e lama rond di e islanan. Coral no ta crece mas y asina e rifnan ta bay atras. Pero tambe nan ta mira tin un otro desaroyo negativo, esta e crecemento di e bacteria Cyano. Nan ta mustra manera matnan di alga pero nan ta un bacteria. E cientificonan a mira nan pa prome biaha na Boneiro pero awor a topa cu nan tambe den lama na Corsou. Y tambe tin un chens grandi cu por haya nan na Aruba asina e cientifico ta bisa.

“Nos no tin e resultadonan ainda. Nos tambe kier investiga e lama den e area di e hotelnan (Palm Beach) unda e suela ta baha gradualmente y tin hopi santo. E chens ta grandi cu eynan nos tambe por topa cu Cyanonan.”

E bacteria aki ta miho conoci como alga blauw cu na Hulanda durante zomer por aparece. E ora nan ta adverti hende y bestia pa no landa como cu bo por bira malo di dje. Sra. Van Duyl ta splica cu e alganan por drif te ariba anto asina hende por drenta den contacto cu nan.

Sistema di riool central
E punto cu e cientifico kier trece dilanti ta cu e islanan mester ta mas consciente di proteha nan lama. “Mester evita cu awa dushi y sushi drenta lama.” E ta bisa cu un problema ta cu no tin un sistema di riool central. Mayoria ta uza pos y nan no ta cera completo. Awa di pos ta lek e ora den e awa sub suela y finalmente den lama. Sra. Van Duyl tambe ta mira un oportunidad economico: “Awa sushi ta caro pa motibo di e proceso di traha awa dushi for di lama. Anto pa colmo e awa caro aki ta drenta lama bek. Si e islanan lo cuminsa re colecta e awa dushi despues di uzo y recicla, bo ta creando un economia di circulacion.” Y asina tin posibilidad pa produci awa mas barata.

 

You May Also Like

Plan di turismo nobo pa economia crece 1% pa 2% cada aña

  ‘Cu Mira Pa Futuro’,  no ta e slogan di niun partido politico. E ...

Basketball (NW) (5).JPG

Stealers a gana nan weganan di basketball

En conexion cu ASU Olimpiada 2016, Aruba Basketball Bond tambe tabata tin nan competencia. ...

20160328_MinAZ_P3a_sesion_Agricultura_000.jpg

Ultimo 50 añanan agricultura a bira menos, sinembargo ultimo 3 añanan generacion nobo interesa den agricultura

ORANJESTAD – P3A Conference (Public Private Partnership Aruba) ta tras di lomba. Temanan cu ...

5juliNP operacion.jpg

Salanan di operacion ta wordo uza despues di 3’or pa casonan di emergencia

Actualmente ta trahando riba salanan di operacion nobo pa hospital, pero tambe lo tin ...

1Sept EdM Problema lama (2).JPG

Cinco mucha a wordo rescata pa tripulante di compania acuatico

Diamars den careda di 5’or di atardi un persona atento a tuma nota di ...

Setar actividad himno y bandera 1.jpg

Setar lo habri 256 canal di Cable TV por nada

Den cuadro di celebracion di 40 aña di nos Himno y Bandera y 30 ...