Campeonato Heineken Fast Pitch di Aruba Softball Bond, dedica na dos baluarte Jacobo Jansen y Gilbert ‘Nando’ Maduro, a continua riba veldnan na Pos Chikito. Den categoria AA, e fuerte ekipo di Jay’s Tire a bounce bek di un derota, y a baha fuerte riba Spuiters MIPA.
Jay’s Tire ta sali score 8 careda den cabes di brommer inning contra e pitcher habrido, Edmar Boekhoudt di Spuiters, kende a ricibi relevo den brommer inning pa Gerald Werleman, kende tambe tabata tin problema pa paga e candela.
Jay’s Tire ta amplia cu 7 careda mas den cabes di dos inning, y aki tur cos tabata skirbi. Spuiters ta purba rally y ta anota 1 careda den bom di 3, y 1 careda den bom di 4, pero ta keda hopi cortico.
Boxscore final
Jay’s Tire 18 careda, 8 hit, 0 eror y ta laga 6 coredo na base.
Spuiters MIPA 2 careda, 4 hit, 3 eror y ta laga 6 coredo den circulacion.
Miho batiadonan pa Jay’s Tire ta Jayson Orman 3-2 cu 3 careda anota y 2 rbi, Filbert Thiel 1-1 cu 2 rbi, Jeromin Kelly 2-2 cu 3 careda anota y 3 careda empuha, Jerwin Peña 2-1 cu 3 careda anota, Jowald de Cuba 1-1 cu 2 rbi y Sandrick Geerman di 1-1.
Pa Spuiters a destaca na bate Gerald Werleman di 3-1, Gerald Tromp, Johnrick Flanegin y Bernardo Vos tur di 1-1. Jorge Santana Cortina ta bay 2 inning y 2 tercio enfrentando 15 bateador tirando 27 bola, 36 strike pa un total di 63 lansamento permitiendo 2 careda tras di 3 hit propinando 3 ponche regalando 4 base por bola pa pone e victoria riba su nomber.
E hoben Gerald Maduro ta drenta di relevo y ta bay 1 inning y 1 tercio, enfrentando 5 batiado , no ta permiti careda y ta regala 1 base por bola, poniendo un wega salba riba su nomber.
Edmar ‘Echi’ Boekhoudt ta resulta pitcher perdedo, ricibiendo relevo di Gerald Werleman, Carlos Wester y Alexander van de Berg.
Weganan ta continua diahuebs na veld di Dragon Hitters, mientras diabierna lo tin wega tanto na Pos Chikito y Dragon Hitters. Campeonato competitivo di fast pitch ta continua.
