Como ex-minister encarga cu Meteo, mi tin cu informa bo lo siguiente:

Trabou di un prome ministro ta pa informa bo pueblo corecto. Fuera di esey, abo ta e Ministro encarga cu Oficina di Calamidad, y ta dirigi reunionnan en special ora un ciclon tropical ta un peligro pa Aruba, pues bo mester sa miho. Ta di lamenta cu bo no sa cu Aruba ta na e parti zuid di e faha di horcan pues no pafo manera bo a mal informa den exterior y despues TeleAruba ta pas’e tambe. Fuera cu bo ta pone expertonan den exterior kere cu tur hende na Aruba tin e mesun nivel abou di educacion cientifico manera bo, bo ta haci bo mesun pueblo mas bobo cu bo mal informacion. Danki Dios cu awendia, hopi data ta disponibel pa tur persona educa su mes y asina por cuestiona, ora algo ta zona straño.

Durante mi periodo como Minister encarga cu Meteo, mi a puntra e director e tempo ey (unico meteorologo na Aruba) pa confirma cu National Hurricane Center e ponencia di Hurricane Belt, esaki pasobra hopi informacion confuso tocante faha di horcan tabata bay rond riba internet. E advies di Hurricane Center tabata mescos cu loke Meteo Aruba y antes Meteo Antias a indica. Pues cu Aruba, Corsou y Boneiro ta na parti zuid di e faha di horcan y no pafo ! Pues e teoria nobo cu bo kier impone ta eroneo!

Adhunto mi ta pone un imagen di tur depresion tropical y tormenta tropical y horcan cu a pasa den vecindario di Aruba, pa bo mes por wak. E data ta obtenibel riba https://coast.noaa.gov/hurricanes/. E data aki ta indica tur ciclonan- tropical cu a pasa dentro di 65 miya nautico di Aruba desde aña 1842. Pues si Aruba lo ta pafo di e faha di horcan, anto lo nos no a wak niun data pa Aruba. Masha facil Prome Ministro por a bay wak riba website di Meteo Aruba, y tuma nota cu Meteo Aruba ta indica cu Aruba ta na e parti zuid di e faha di horcan ( http://www.meteo.aw/climate.php).

Tambe por a haci uzo di e website di Meteo Korsou, unda tin un rapport extenso cu tambe ta indica cu e islanan ABC ta na e parti zuid di e faha di horcan y no pafo (http://www.meteo.cw/Data_www/pdf/pub/Hurricanes%20and%20Tropical%20Storms%20DC_2018.pdf). Mas ainda den e mesun website tin data climatologico cu ta indica cu cada 25 aña un tormenta tropical fuerte ta pasa dentro di 75 miya nautico di Corsou i cada 46 aña un horcan por pasa dentro di 75 miya nautico di Corsou. Pues claramente e islanan ABC no ta pafo di e faha di horcan.

Awo e pregunta ta cu si pa algo asina simpel, bo a dicidi di bay gaña den exterior, Dios lo sa ki mas bo ta gaña o imagina tur dia. Un conseho di mi, na bo persona cu no tin niun educacion cientifico, lo ta miho pa bo informa bo mes corectamente prome bo papia locura/bobedad den exterior y tuma contacto cu bo expertonan na Aruba. Lamentablemente e director di Meteo cu ta un experto meteorologo a wordo poni un banda. Bo colega Ministro Romero a dicidi pa pone un persona cu un dienstverleningscontract como hefe interino, pa motibo personal. Mi a tuma nota tambe cu un proyecto grandi cu fondonan di TPEF pa simulacion di lama a muri un morto forsa dor di Minister Romero. E pregunta ta keda e ora cu si esaki ta considera como un acto integro, unda hopi placa di pueblo pa un proyecto pa alerta tempran y cientifico ta wordo elimina paso e ta un Proyecto di gobierno anterior.

Na final, segun mi miho bo keda Aruba den luga di bo bay gasta placa di Aruba den exterior y pa bay papia bobedad. O manera nan ta bisa na Hulandes, “Schoenmaker blijft bij je leest” bo no ta un experto cientifico!