Presidente di Sindicato di Trahadornan di Setar, Jeromin Kelly tambe tabata presente den anochi informativo cu sindicatonan a haci na compleho deportivo Frans Figaroa. Aki el a trece dilanti su punto di bista tocante e performance bonus di Setar.

Kelly a menciona cu nan ta na mesa ainda y cu “no ta pasobra nos a logra un di e pasonan, esey ta nifica cu nos no ta bay sigui busca nos derecho. Pasobra nos palabra ta keda igualdad. Si un compania por a haya e bonus aki, e otro compania tambe tin e derecho di haya mescos”.

Igualmente, el a comenta cu esey ta keda un inhusticia y nan ta bay sinta back na mesa. Referiendo na e bonus Kelly a splica cu nan a hay’e danki na esfuerso cu trahadonan di Setar cu a traha aña pasa y e aña aki, na unda cu aña pasa tabata e prome aña cu Setar a draai cu perdida y asina mes den temporada di Covid-19 nan a sigui traha na 100% y dunando servicio na nan cliente. Den e aña aki Kelly a informa cu nan ta bayendo den bon direccion cu nan ta wak cifranan preto, atrobe y esey ta nifica cu nan ta bayendo bon.

Pa e motibo aki, Kelly a afirma cu nan ta negociando den area aki pa asina duna empleadonan cu a traha e tempo aki – un tempo cu tabata hopi duro pa pais Aruba specialmente ora pandemia tabata den su pio momento – unda tur empleado a traha full time compara cu otro departamentonan di gobierno. “E ta un diferencia grandi, cu anos como trahadonan di Setar si a keda traha durante temporada di Covid-19” Kelly a finalisa.

Bon Dia Aruba a puntra otro sindicatonan kico ta nan pensamento tocante e bonus aki cu Setar a haya y otro companianan no. Tocante esaki, Richard Frank presidente di Asociacion di staf di WEB Aruba N.V a comenta cu a bin dilanti un informacion falso tocante e bonus cu e compania Setar a haya. Diamars ultimo den un programa live di e portal di noticia Noticia Cla, minister di Asunto Economico Geoffrey Wever a admiti cu gobierno a permiti duna un ‘performance bonus’ na empleadonan di compania estatal Setar NV. Esaki tabata a base di e “bon resultado di e compania, cu tabata fruto tambe di e esfuersonan di e trahadornan”, manera minister Wever a indica.

E noticia aki a trece un tiki discusion den comunidad na unda cu Frank a splica cu el a compronde for di otro miembro di sindicato STT cu e manera con prensa a presenta e noticia “ta bruha tera, pasobra ainda Setar ta entregando 12.6% na unda a keda conoci cu nos a duna, STT y e otronan no ta haya. Si bo kier splica algo den prensa, splik’e bon, ni un caminda den comunicado di minister Wever a sali cu esaki no ta nada di haci cu 12.6%, pasobra nan ta entregando esey keto bay”, Frans a enfatisa.

Den reunion informativo na Frans Figaroa cu tambe a conta cu e presencia di Magaly Brito, presidente di sindicato SEPPA, el a expresa tocante e bonus perfomance di Setar cu esey ta e culminacion di un proceso cu nan a bin canando na unda no solamente sindicatonan a bin reuniendo y atendiendo asunto cu gobierno, el a sigura cu nan tambe ta reuni di manera interno cu nan delegadonan y pa indica con nan ta para cu e entrega di 12.6%. “Mi ta kere un cierto momento apart, cu tur hende ta sinti e dolor di e entrega cu esaki ta causa na entrada y na nan bienestar. E hecho si cu si cierto momento a sali informacion caminda cu un grupo si ta ricibi un compensacion pa nan entrega y un otro grupo no, esaki a trece e mal contento awor cu ta culminando cu tin manifestacionnan di protesta”, el a sigura.

Josephine Albertus presidente di sindicato di Maestronan di Aruba SIMAR a declara cu e ta contento cu Setar a haya e bonus performance pa motibo cu ta conoci cu e ta un reto e entrega di 12.6% “pero pa wak aworaki cu nan si por hayele back ta mustra atrobe cu ora cu gobierno a bisa cu nos tur mester entrega pa asina nos por haya ayudo di Hulanda no ta cuadra cu berdad, pasobra si e tabata cuadra na ni un momento nan no por a sinta cu nan y duna nan algo back”

Edward Maduro di Sindicato di Aduana SADA a declara na Bon Dia Aruba cu segun minister Geoffrey Wever a bisa esaki no tin relacion cu e recorte di salario di 12.6% sino cu ta un performance bonus, “e ora ey mi ta bisa cu berdad na kier pint’e como un performance bonus pero nos tur sa cu tras di cortina e no tin te maken, pasobra mi no ta kere cu despues cu STT siman pasa cu a demostra nan mal contento pa e trato cu nan ta ricibi mirando cu otro companianan ta haya otro trato, mi ta sigur cu si STT of su miembronan cu a pone nan pia abao, mi no ta kere cu un performance bonus a cay for si shelo, esey ta duna nos mas forsa y e ta mustra tambe cu tin un desigualdad y un desbalansa den momento di tuma decision”, Maduro a finalisa.

LEAVE A REPLY

Please enter your comment!
Please enter your name here