Ayera tardi a tuma luga e accion manifestacion pacifico di parti di e miembronan di diferente sindicato, trahadonan di diferente companianan publico, semi-publico y tambe priva cu ta protesta e recorte salarial di 12.6% ‘tot nader orde’ y tambe e recorte den sector di enseñansa.

E meta di e manifestacion aki no tabata solamente pa demostra e mal contento di parti di e miembronan di e sindicato- y trahadonan, pero tambe a haci entrega oficial di dos manifiesto na tanto Parlamento como tambe na Minister President, Sra. Evelyn Wever-Croes y Minister di Enseñansa, Sr. Endy Croes.

Presidente di Sindicato di Maestro di Aruba (SIMAR), Sra. Josephine Albertus, den nomber di tur e miembronan di SIMAR, tur persona cu ta labora den sector di enseñansa y tur cu ta compaña nan den e lucha aki, a haci entrega di e manifiesto di parti di enseñansa na Prome Minister Sra. Evelyn Wever-Croes y na Minister di Enseñansa y Deporte, Sr. Endy Croes.

Den e manifiesto, segun Sra. Albertus a lesa, sector di enseñansa ta urgi Gobierno di Aruba pa actua na un manera sincero, respetuoso, honesto y cu confiansa ariba diferente aspectonan di sumo preocupacion cerca e pueblo di Aruba henter. Esaki mirando cu ta trata di e futuro di enseñansa en general na Aruba.

Algun di e puntonan cu Sra. Albertus a menciona cu ta den e manifiesto presenta na ambos minister, tin di haci cu entre otro tereno di material y infrastructura di scolnan, cu ta falta pa motibo cu no tin placa, y asina mes gobierno kier sigui corta mas den e presupuesto di enseñansa. Ariba tereno social pedagogico ta mira un fenomeno monstruoso di alumnonan cu problemanan grandi pa funciona como persona y den area di ayudo cognitivo tambe a opta pa corta den asistencia specialisa.

Otro aspecto cu el a menciona ta e condicionnan secundario den e trabao di e maestronan. Segun el a indica pa hopi aña caba e condicion di trabao di e maestronan no ta haya e atencion debido. Tin falta di material pa duna lesnan completo y efectivamente y tin falta di cierto aspectonan di higiena na e scolnan y hopi di e maestronan ta traha den condicionnan inadecua.

“Nos ta termina urgiendo gobierno pa cumpli cu enseñansa. Nos ta para pa e derecho di enseñansa di Aruba, nos alumnonan cu ta e futuro generacion, nos maestronan, nos comunidad henter y futuro di nos pais”, Sra. Albertus a agrega.

Minister di Enseñansa Endy Croes a responde na esaki, gradiciendo Sra. Albertus pa entrega e manifiesto y el a indica cu di puntonan den e manifiesto e ta reconoce hopi di nan. “Nos tin un pasion enorme pa enseñansa sigur. Cu SIMAR nos a sinta 3 biaha caba den e ultimo 6 pa 7 siman y nos lo bay sigui sinta hunto pa resolve diferente puntonan a traves di union cu SIMAR y nos ta percura pa sigui e lista aki y tanten cu por hunto nos lo resolve esakinan y busca solucion pa nan. E tin nos atencion debido atencion y lo wordo discuti den ministerraad”, Minister Croes a bisa.

Sr. Edward Maduro, presidente di Sindicato SADA Aruba, a haci entrega di e manifiesto oficial na Minister President di parti di sindicatonan FTA, SEPPA,SIMAR, SADA SPA, STT, ALVAST, IOWUA, SCCA, SIWA, UEA, VWI y OPPA.

Segun Sr. Maduro a lesa for di e manifiesto, el a bisa cu empleadonan publico ta entregando 12.6% di nan entrada anual pa un tempo largo caba. Algo cu inicialmente a wordo haci riba e imposicion di gobierno di Aruba como acto solidario pa genera entrada pa pago di entre otro FASE pa e personanan cu a keda sin entrada pa motibo di e crisis economico causa pa e pandemia.

El a sigui indica cu teniendo na cuenta cu e motibo principal di entrega solidario no ta existi m,as ya cu a aboli Fase – pa motibo cu entre otro CAft a indica cu tin un recuperacion economico satisfactorio – e organisacionnan menciona ta di opinion cu e 12.6% di entrega cu a wordo imponi tambe mester wordo aboli; y e hecho cu Hulanda a pone esaki como condicion pa ayudo financiero no ta cambia nan opinion.

“Nos ta haci e siguiente solicitud urgente, pa di forma inmediato elimina e reduccion di 12.6% riba entrada anual di empleadonan publico, semi-gubernamnetal y pensionadonan pa asina tur condicion primario y secundario bolbe na normalidad, Di dos nos kier wordo indica por escrito e dia y ora riba cual lo drenta den dialogo di negociacion cu sindicatonan”, el a bisa.

Minister President a acepta e manifiesto aki y den nomber di Gobierno di Aruba a gradici e manifestantenan pa entrega e manifiesto di un forma pacifico y forma civico. “Nos ta compronde y nos ta sostene e lucha cu boso ta hibando pasobra na fin di dia e crisis aki a dal nos duro. Tur hende a sacrifica y nos ta comprometi y nos ta bay trat’e mañan mes (awe diabierna) den conseho di minister”, Minister President a bisa.

LEAVE A REPLY

Please enter your comment!
Please enter your name here