Ayera mainta sindicato di e compania WEB Aruba NV a tene un accion di protesta pa mustra nan mal contento y disgusto tocante e recorte di salario di 12.6%.

Richard Frank presidente di Asociacion di staf di WEB Aruba N.V a splica cu na mei di aña 2020 a implementa un protocol na unda boluntariamente nan a acepta pa motibo di e crisis cu pandemia Covid-19 a trece cune, Aruba tabata den un lockdown na unda nan a dicidi manera otro companianan tambe a haci pa yuda y asina entrega 12.6% cu e condicion cu e lo termina dia 31 di december di aña 2020.

Asina mes, Frank a conta cu na luna di november di aña pasa a yega un carta na unda nan a wordo informa cu e cortamento aki lo sigui ‘tot nader order’ igualmente na aña 2021, pa via di esaki a bin un caso sumario den Corte di Prome Instancia na unda Frank a menciona cu desafortunadamente esey no a sali den nan fabor y aworaki esey a bay pa Hoger Beroep y bono procedure tambe pa e cuenta di decision unilateral cu gobierno a haci di 12.6%.

Un aña despues, despues di e anuncio di CAFT na unda nan a indica cu nan no ta mira e necesidad pa programa di ayudo FASE y Loonsubside mester wordo continua pa via cu situacion economico na Aruba ta mehorando, Frank a bisa cu e ‘tot nader order’ por ta mañan of den mil aña tambe y cu algun companianan cu mester a entrega pa cumpli cu esey no a entrega, entre otro preocupacionnan cu nan tin.

“Nos tin e derecho di sali, protesta y manifesta nos disgustonan pa e abuso cu ta pasando aworaki, aña pasa na mei e tabata necesario e cos tabata frega, pero na e momento aki e no ta make sense mas, nos no ta di acuerdo pa prolonga e 12.6% mas”, Frank a comenta.

E accion aki ta uni na e otro desaroyonan cu a bin tumando luga den dianan aki hunto cu otro sindicatonan na unda cu ayera a tuma luga un manifestacion y diaranson ultimo den oranan di atardi manera a keda conoci, diferente sindicato y organisacionnan civil a haci yamada na trahadonan di sector semi-publico, publico y priva pa asina yega na compleho deportivo Frans Figaroa pa un anochi informativo tocante cortamento di salario di 12.6%.

LEAVE A REPLY

Please enter your comment!
Please enter your name here