Tin un proyecto adandando cu ta treciendo hopi alegria cerca mucha y docente y esey ta e lesnan di musica y instrumento cu Leerorkest Aruba ta organisa na scolnan piloto. Y pa Johnny Croes, iniciado di e proyecto, su deseo ta cu pronto ya no ta papia di scolnan piloto sino di programanan di musica structural na tur scol, pa tur mucha. “Pasobra musica ta pa tur mucha,” ta e dicho di Leerorkest.

Leerorkest Aruba a bira realidad cu sosten di Marco De Souza di Leerorkest Amsterdam, kende despues cu Johnny a tuma contacto cu n’e pa percura cu Aruba tambe por haya un programa asina. Tabata de Souza kende a logra haya e subsidio di Ministerio di Husticia y Siguridad di Hulanda pa Aruba. E Ministerio ta carga e programa di Leerorkest Amsterdam. Pero, pa Johnny, e tabata un soño cu e tabatin pa Aruba.

Crece memey di musicante

For di tempo cu el a haya tino, musica tabata domina bida di Johnny. El a lanta memey di musicante. Su omo Chommi tabatin su trio, su tata mes tabata toca guitara y su mama, piano.

“Pues for di chikito ma lanta den ambiente di musica, y semper curioso pa siña toca instrumento.” Como mucha, e tabata usa tur obheto como instrumento, for di poef te skeiro. Su prome instrumento tabata un cuarta, a siña su mes toca guitara, pero tabata su mama a cumpra un piano p’e y Johnny.

E hoben di 11 tabata impresiona pa e canticanan cu Frere Alexius tabata toca riba piano. “Nos tabata haya les di cantamento y e tabata toca. Difunto Hildward tabata cumi den klas y nos dos tabata haya les di piano di Frede Alexius. Hildward nunca tabata train, pero asina mes e tabata asina bon,” Johnny ta corda. “Frere Alexius tabatin un orgel masha bieu mes den otro klas, y tabata pone Hildward practica su les. Pero Hildward, enbez di e les, tabata toca, por ehempel e cantica di Hudas di ‘Jesus Christ Superstar.’”

E caminda di e dos musiconan hoben a separa y despues di les cu Rufo Odor, Johnny a bay Muziekschool, pero banda di su piano, el a siña su mes toca steelpan y a toca den  steelband y tambe den brassband, Moondogs. E interes den musica tabata domina su bida y scol a sufri. El a caba MAVO, y a bay MAO, pero no a caba e educacion, particularmente pasobra el a haya su prome trabou professional na Manchebo, pa toca durante Happy Hour.

Como hoben di 19 el a dicidi cu musica ta bay ta su profesion. El a forma un banda pa toca na De Palm Island, y un aña despues a forma parti di e banda di the Golden Tulip,  compañando gruponan conoci cu a bin Aruba manera The Drifters, the Platters cu tabatin pa e shows. “Eynan mi a haya un ‘on the job training’ con pa ta un musico profesional.” Tur dialuna mester siña e musica, e partitura “riba riba, como 20 cantica, y show ta cuminza e mesun anochi. E tabata un angustia. Ta cuestion pa lesa e musica, cambia pa otro. Pero e tabata un experiencia con profesionalismo realmente ta.

Sinembargo e shownan a cuminza stop. “Nos tabata e ultimo di e era di toca shows y sequencers a cuminza reemplaza mayoria musico. Machinenan a kita trabou di musiconan y sin show, ma dicidi cu mi mester desaroya mi mes academicamente.” Johnny tabatin 29 ora cu el a haci un ‘audition’ pa Berklee College of Music na Boston, e mesun scol unda Hildward entretanto a bay y termina, mescos cu otro musico Arubiano. “Mi no a haya prestamo di Gobierno, pasobra mi tabata mucho grandi. Pero e bon ta cu mi a haya un beca di UNOCA y mi a usa e fondonan cu mi a spaar durante tur e añanan.” Su obhetivo tabata pa agrega e aspecto academico na su carera. “Pa prome biaha ma mira asina hopi hende hunto cu tabatin e mesun interes pa bira profesional den musica.” Johnny Croes a logra caba su estudio academico, unda el a enfoca riba varios area, for di produccion te na areglo, skirbi musica pa dirigi orchestra.

Bek na Aruba, Johnny a toca cuater aña na Tierra del Sol, y tabata na 2000 a haya oportunidad pa bira docente na Arubaanse Muziekschool. “Mi mes no tabata mucho interesa pa bay den educacion di musica, pero mi tabata kier un trabou mas fiho. Pero ora ma cuminza duna les, mi a ripara cu mi tabata bay bon cu mucha. Pasobra mi mes ta un mucha, semper.” Johnny a usa su sentido di humor pa stimula e muchanan y esey a traha. Y for di e momento ey, a nace e docente, director cu tabata kier mira mucha contento y alegre, practicando musica. “Haci un mucha contento ta algo increibelmente bunita. Si un mucha ta contento, e ta bin les tur siman y asina e ta siña. No tur mucha tin e mesun talento, pero tur por siña.”

Musica Clasico

Tabata un concierto Famoso dirigente di orkesta di Venezuela Simon Gollo, organiza na Aruba como recaudacion di fondo pa Aruba Clyde Harms cu a inspira Johnny Croes , kende tabatin su mesun ‘big band,’ pa cuminza pensa riba un orkestra simfonico di hoben pa Aruba, unda muchanan en particular ta siña conoce musica clasico y haya interes pa toca tur e tipo di instrumentonan. El a uni cu Harms, pa organisa Joe Aruba Symphony Festival cu hobennan musico di rond mundo cu tabata bin Aruba pa duna concierto y tayer. E meta tabata pa crea amor y stimula hobennan di Aruba tambe den e mundo aki. E festival a cana pa algun aña, danki na sosten di varios ciudadano cu a kere den e pensamento y Chucho Hoek di Director di Muziekschool. “Aki tabata hobennan di 16 pa 17, di Colombia, Venezuela, Peru, tocando musica di Bach, Beethoven, Mozart. Increibel. Y mi a sinti cu nos muchanan tambe por.”

Leerorkest Aruba

Y aunke cu e festival lo mester a yuda cu formacion di hobennan Arubiano interesa den musica clasico, e ruta tabata largo. Tabata Gerald Kross, tata di otro musico talentoso Chris, kende a bis’e di Leerorkest Corsou, dirigi pa su ruman homber kende ta e tata di e famoso cantante Tania Kross. Asina Johnny a acerca Leerorkest Corsou y e Director di Leerorkest Amsterdam, Marco de Souza. E prome reunion tabata via Facetime, hunto cu Minister Rudy Lampe. Johnny a bula bay Corsou hunto cu Miniser Lampe pa topa cu directiva di Leerorkest Corsou cu a mustra tur kico nan tabata haci, esta ofrece les di musica na scol. Marco de Souza entretanto a dicidi pa pa ofrece su sosten, pero tabata kier a reuni cu tanto Minister Lampe y Minister Andin Bikker di Husticia, ya cu e programa di Leerorkest ta subsidia pa Ministerio di Husticia di Hulanda. E reunion a tuma luga na Aruba na 2019 y e resto ta historia (recien). A firma un MoU entre e dos Ministernan di Aruba y Leerorkest Amsterdam, y Johnny Croes hunto cu sr. Bart Kool a haci e trabou di sondeo pa mira e posibilidad di un Leerorkest. Difunto Grace Maduro a uni e grupo despues, y a bira e prome Presidente di e fundacion y e resto ta historia. Cu e sosten di coordinado Juliette van Romondt, Leerorkest Aruba a bira un proyecto ooncreto cu ta brinda les di musica online ademas di les di diferente instrumento na varios scol piloto. Pero pa su Director, kende porcierto a dicidi cu e mes kier ta un piloto di berdad y ta completando su preparacion, pronto Leerorkest Aruba lo habri su hala hancho pa sigura cu berdad musica ta pa tur mucha.

LEAVE A REPLY

Please enter your comment!
Please enter your name here