Den un entrevista pa Bon Dia Aruba, Josephine Albertus, directora di Sindicato SIMAR, ta elabora ariba e puntonan di prioridad cu SIMAR a presenta na Minister Endy Croes y tambe ta elabora ariba su biahe recien pa Boneiro, na unda cu el a bay observa innovacion den e sector di enseñansa.

Un di e puntonan di prioridad cu SIMAR a presenta na Minister Croes tabata e problematica di e instructornan di landamento, na cual e Minister a trece un solucion. Sra. Albertus ta splica cu aunke e ta satisfecho cu e solucion cu Croes a trece pa e instructornan, e solucion aki ta uno temporal. “Nan tabata den un situacion precario y a bin cu un solucion temporal pa aworaki, pasobra e Minister di Enseñansa anterior a duna nan OVO y den e OVO ey nan a wordo perhudica pasobra nan mester a paga hopi premie”, el a splica.

“Minister nobo, Endy Croes a trek e OVO in y el a duna nan e contract bieu cu nan tabatin. Pero e contract bieu cu nan tabatin no ta e contract ideal pasobra nan no ta bao up pension, dus nan no tin niun beneficio ora cu nan yega na un edad di pensioen, y e no ta un contract di tempo indefini. E ta un contract cu tempo defini, cu ta cada bes un aña y nan ta riba esey caba pa casi 30 aña, y esey nos tin cu cambia”, el a agrega.

El a splica cu pa perhudica e instructornan di landamento, nan a bin cu un acuerdo cu nan lo bay back pa un aña ariba e contract bieu, y durante e aña aki SIMAR lo bay sinta hunto cu Croes y DRH pa asina bin cu un contract cu no ta kita nan derechonan. “E ta un solucion temporal y den e aña aki nos mester bin cu un solucion duradero, pasobra nan mester por bouw up pensioen”, el a bisa.

E ta sigui splica cu e solucion temporal a kita e OVO y pa e fin di luna aki nan por wordo paga normal y nan lo paga 6.6% na premie y e resto gobierno ta paga. Den e OVO e instructornan mes mester a paga 26% na premie, apart di e 5% cu a wordo corta di nan salario. E ta enfatisa cu e despues di e solucion temporal aki e meta principal ta cu e instructornan mester haya un contract di tempo indefini y nan mester bao up pensioen.

Werksternan di SKOA

Pa locual ta e problematica di e werksternan di SKOA y e comision cu Minister Endy Croes a forma pa bin cu solucion, Sra. Albertus ta indica cu e no ta wak e beneficio di un comision, pasobra e Minister di Enseñansa anterior tambe tabatin un comision y ya caba tin mas cu un aña di esaki y ainda no a yega na un solucion. “Kico un comision ta bay haci aworaki? Atrobe, si ya caba nan tin mas cu un aña caba cu un comision, mester bin cu un solucion. Anto esey ta e parti pica, pasobra cada biaha ta bin cu un comision, pero ainda e situacion no a wordo soluciona; ta djis un rekmento mi ta haya di e incertidumbre cu e werksternan ta aden y cu SKOA ta aden”, el a bisa.

“Ami ta haya eigenlijk un tiki ridiculo, pasobra tabatin tanto tempo cu un comision. Aworaki bo ta bin como minister nobo y bo ta bin cu un comision atrobe, y ainda nan ta den incertidumbre y ainda nan no tin solucion”, el a agrega.

Sra. Albertus ta splica cu nan a entrega na Croes e mesun rapport cu nan a entrega na formador, unda cu nan ta duna un bista amplio di con enseñansa ta actualmente y loke mester cambia. E top tres punto cu SIMAR a presenta na e Minister ta e finanzas, e leynan anticua y e non-jaar taak, pasobra e ta indica cu e docentenan mester haya tempo pa profesionalisa nan mes. “Esey ta e tres puntonan oficial cu nos a keda elabora ariba dje.”

Bishita na Boneiro

Sra. Albertus a yega apenas dialuna back for di Boneiro. E ta splica cu e motibo di su biahe tabata pa bishita e scolnan, pasobra Boneiro a haci un innovacion grandi y e innovacion aki ta na caminda pa Aruba tambe. E ta splica cu el a bishita tur scol, Ministerio di Enseñansa, el a bishita e instancianan cu ta yuda cu e parti di cuido di e muchanan y el a bishita e institutonan cu ta yuda cu formacion di adulto y drop-outs. “Bo ta wak cu eynan e ta hopi miho hinca den otro cu akinan na Aruba, nos falta hopi”, el a indica.

El a sigui splica cu Boneiro a pasa innovacion, pasobra na aña 2010 tempo cu Boneiro a bira un bijzondere gemeente bao di Hulanda, mesora hopi placa a wordo manda pa Boneiro pa yuda nan y adelanta den innovacion. “Nan enseñansa ta por nada pa cada alumno, tur cos ta wordo paga”, el a bisa. “Aworaki cu mi a bay wak cada mucha tin un laptop di scol, cada scol tin por lo menos tres bes pa siman un trahado social cu ta yuda, cada klas tin un assistent hunto cu e maestro pa yuda, eynan e ta hopi miho structura.”

Segun Sra. Albertus a indica, na November, representantenan di Boneiro lo bin Aruba pasobra Aruba tambe mester cuminsa cu e innovacion. Hulanda a bin Aruba y a haci doorlichting, e rapportnan aki a wordo manda pa Boneiro tambe, mirando cu nan a innova caba y mirando cu e cultura di Boneiro ta hopi cerca di esun di Aruba. Y segun el a compronde, nan lo yuda Aruba den e innovacion.

“Nos no sa si e ta bay ta mescos, pasobra nan a hinca hopi placa eynan. Por ehempel pa Covid nan a haya 1.400 dollar pa cada alumno na Boneiro pa yuda cu e retraso cu e muchanan a haya den Covid. Akinan na Aruba nos no a haya nada. E aña aki nan tin un proyecto NPO unda nan a haya atrobe 900 dollar pa cada alumno pa yuda atrobe cu mas cosnan den innovacion, y eynan nan tin proyectonan despues di ora di scol, proyectonan cu ta yuda e muchanan cu e formacion social y tur esey ta por nada, scol ta regel esey”, el a agrega.

Sra. Albertus ta indica cu un di e motibonan pakico Aruba ainda no ta na e nivel di innovacion na Boneiro ta pasobra cada biaha cu papia di innovacion mester e financiamento. “Eynan ta e situacion fastioso y nos tin cosnan cu nos tin cu drecha. Cerca nos ta 240 miyon ta e averahe cu nos tin pa enseñansa, pero un parti grandi di esaki no ta wordo usa bon.”

Sra. Albertus a splica cu e ta trahando ariba un rapport cu lo bay detaya tur e bishitanan cu el a haci na Boneiro y esaki e lo entrega na Minister di Enseñansa tambe pa nan sa kico ta na caminda.