Durante un rueda di prensa dialuna mainta, presidente di sindicato SIMAR, Josephine Albertus a reacciona ariba e carta cu CAft a manda indicando cu Gobierno di Aruba no a sigui nan recomendacionnan pa loke ta trata presupuesto 2022.

Alabes Albertus a elabora ariba dialogo cu el a tene cu sindicatonan di islanan di Corsou y Sint Maarten durante su bishita na Corsou, y a expresa su preocupacion pa e situacion di scarsedad di maestro cu tin na Aruba.

“Mi a tuma nota di e carta di CAft y en berdad nos ta bisa cu e ta lamentabel atrobe cu Gobierno di Aruba ta sali y duna informacion, y bo ta wak cu e no ta cuadra cu realidad, pasobra ora CAft manda carta nan ta bisa cu Aruba no ta cumpliendo cu locual e mes a bisa cu e ta bay cumpli cune”, Albertus a expresa.

Segun Albertus a indica, dia 24 di mei ora cu e marcha silencioso a tuma luga di parti di e grupo di sindicato, ya caba nan tabata sa esaki lo pasa. Pasobra e siman ey, na momento cu minister a sali bisa cu tin un acuerdo, nan tabata sa cu e tabata algo trece un tiki alivio y pa comunidad kere cu tur cos ta bon. Aworaki, ora cu ya yegando mas cerca di e momento cu e trahadonan tin cu haya e 5% back, segun Albertus ta señala, por mira cu en berdad loke gobierno ta bisando no ta cuadra cu realidad.

“Atrobe e ta lamentabel pasobra ya caba esnan den sector publico cu semi-publico tin mas cu dos aña ta entregando y atrobe gobierno no ta honesto y e ta lamentabel pa wak”, el a agrega.

Siman pasa, Albertus tabata di bishita na Corsou y el a subraya cu na e isla ruman, el a wak cu sikiera gobierno ta yama sindicato, ta sinta cu nan, ta dialoga, ta splica e situacion. Pero aki na Aruba, el a expresa, tin un gobierno cu no kier sinta cu sindicato na mesa y cu ta sali den rueda di prensa pa bisa cu ora cu nan ta cla nan ta informa kico e situacion lo bira. “Atrobe bo ta wak un falta di respet pa e clase trahado, un falta di respet pa e pueblo, pa e comunidad.”

Na Corsou, e presidente di sindicato SIMAR a sinta hunto cu mas sindicato den Reino y eynan Aruba, Corsou y Sint Maarten a topa otro, mirando cu tur tres isla ta den e mesun situacion den e parti di COHO, un di e condicionnan cu Hulanda a pone pa duna sosten di likides durante pandemia.

Albertus a remarca cu locual el a ripara despues di dialogo intensivo cu Sint Maarten y Corsou, ta cu esnan laborando aki na Aruba tabata esnan mas mal sirbi, pasobra na Aruba e 12.6% tabata full financieramente e trahado den sector publico y semi-publico mester a carg’e. Na Corsou y Sint Maarten por lo menos gobierno a sinta dialoga cu e sindicatonan y wak con por mitiga e 12.6%, unda cu nan no a touch e salario so, pero nan a bay wak den otro rekisitonan manera dianan di vakantie.

Na Aruba, el a sigui splica, tur cos a wordo kita for di e salario di e trahado y riba dje di e remuneracion fiho, cu a perhudica, y ainda ta perhudica e trahado den sector publico y semi-publico cu nan pensioen abao.

El a indica cu hunto nan ta bay eleva e disgusto aki no solamente pa Parlamento di Aruba, pero nan ta bay hiba esaki pa Hulanda tambe. Albertus a menciona tambe cu durante e reunionnan aki nan no discuti solamente e 12.6% pa Aruba y e 12.5% pa e otro islanan, pero nan a papia tambe di tur e medidanan cu tin den e landspakket, na unda nan ta bisa cu esakinan no ta realistico.

“E ta un falta di respet ora cu bo wak con gobierno ta trata su trahado, con e ta trata su pueblo.

Atrobe bo ta wak cu cada biaha cosnan ta bin back unda cu ta mustra cu Gobierno di Aruba no ta honesto, Gobierno no kier baha gasto. Cada biaha CAft ta bin back riba nan cu nan no ta cumpliendo”, Albertus a remarca.

Albertus a informa tambe cu SIMAR a firma un acuerdo cu e sindicatonan di e islanan bisiña, cu ta indica cu nan tur lo bay traha hunto. Na mesun momento nan a firma un carta cu lo wordo entrega na Parlamento di cada isla pa asina sigui fiha nan posicion.

Segun el a sigui splica, nan ta hasta bezig cu e sindicatonan na Hulanda pa nan tambe sostene e sindicatonan di e islanan, pasobra mirando kico e sindicatonan di Hulanda tur ta logrando y con nan ta bayendo dilanti pa nan trahadonan, na Aruba, Corsou y Sint Maarten ta bay atras financieramente.

Pa loke ta trata e problematica di enseñansa, specificamente falta di maestronan na scol, Albertus a subraya cu nan a tuma nota den e ultimo simannan cu a pasa cu tabatin hopi solicitud riba diferente vacatura den veld di enseñansa. Como SIMAR mes nan ta hayando mensahenan di maestronan cu ta kita nan miembresia pasobra nan no ta keda Aruba mas, y como sindicato nan a tende di diferente scol cu nan tabatin falta di maestro, y tin scolnan cu a vocifera basta biaha tambe caba cu tin hopi les uitval.

“Nos ta mirando cu e situacion ta bay bira pio y esaki atrobe ta pasobra nos tin un gobierno cu no tin respet pa e veld di enseñansa, no tin respet pa e pilar prominente pa e desaroyo di un pais. Nos no tin cu lubida cu tur hende cu awe tin un ofishi, cu ta traha un caminda, a sinta den banki na scol y tabata na un caminda cu un docente a brinda enseñansa”, Albertus a enfatisa.

El a remarca cu na otro paisnan por wak cu eynan si nan ta inverti den enseñansa, pero aki na Aruba gobierno semper ta bisa no tin placa. E veld mester keda creativo y teniendo na cuenta cu ya caba e situacion laboral no ta bon, e posicion huridico tampoco ta prominente.

Si compara Aruba cu Corsou y Sint Maarten riba e parti salarial, Albertus a señala, na e otro islanan e maestronan ta cobra mas cu un maestro cu ta para dilanti klas na Aruba. Y si compara Aruba cu Boneiro y Hulanda, e diferencia ta hopi mas. “Nos tin cu drecha nos situacion, pasobra si no despues di un tempo nos ta puntra nos mes con nos lo carga e pilar di enseñansa, si tur docente cuminsa bandona e isla”, el a resalta.

Na Hulanda mes, Albertus a menciona, tin un scarsedad grandi di maestro y eynan e posicion huridico di e maestro ta miho regla cu aki na Aruba. “E ta preocupante pa nos, pasobra nos na Aruba tambe kier un enseñansa di calidad pa nos yiunan, cu despues nan por continua cu nan enseñansa den exterior of na Aruba mes. Pero si nos ripara con e situacion ta bayendo, e ta preocupante pa nos”, el a indica.