Minister di Extranheria ta sigura cu el a sigui LTU, pero cu por tin interpretacion diferente pa casonan di excepcion

Mester bin claridad riba e proceso pa otorga carta di reingreso na personanan cu no tin permiso pa ta na Aruba. Y pa tal motibo mes Minister di Energia, Labor, Integracion y Extranheria, Glenbert Croes ta haya bon cu Ministerio Publico ta bay haci un ‘feitenonderzoek.’

Ministerio Publico mes a emiti un comunicado ayera cu ta bay haci un ‘feitenonderzoek,’ esta un investigacion di hechos riba dos caso unda miembronan di Inmigracion di Aruba, IA, a entrega keho pa cartanan di reingreso cu Minister Croes lo a otorga di forma no usual.

E investigacion ta bao encargo di Procurador General Ter Steege y textualmente ta bisa recientemente trahadonan di Inmigracion di Aruba, IA, a ripara iregularidad durante control di documentonan di biahe di dos persona cu tabata saliendo di Aruba. Hefe di Inmigracion a avisa r General riba e casonan aki, kende a duna landsrecherche ordo pa cuminza e ‘feitenonderzoek.’

Di su banda, Minister Glenbert Croes ta bisa cu su bufete berdad a emiti cinco carta di reingreso na personanan cu no tin permiso vigente pa ta na Aruba, pero cu tur tabata pa motibo humanitario. Cuater tabata pa motibo di salud. E personanan tabatin mester di e carta di reingreso di forma urgente pa asina Colombia por a permiti nan drenta.

Aunke cu e relato di prensa di Ministerio Publico ta papia di dos caso, Minister Croes mes a bay den detaye di un di cinco caso, cu ta trata di un señora Venezolano, casa cu un Arubiano. E señora tin un cas na Aruba y yiu di nacionalidad Mericano cu ta atende De Schakel College. Ademas di tin su cas na Aruba y ta casa cu Arubiano, e señora tin un visa Mericano. Segun areglonan, Venezolanonan mester di visa pa drenta Aruba, y ta acepta visa Mericano.

Pero, pa un of otro motibo, inmigracion no a permiti e señora drenta Aruba na momento di a bolbe y aki su abogado a yama bufete di Minister Croes, unda a dicidi pa duna un carta di reingreso.

Procedura normal carta reingreso

Bon Dia Aruba a busca mas informacion pa sa kico ta e proceso normal pa haya un carta di reingreso, pa asina por haya bista kico a pone cu personal di Inmigracion a dicidi pa involucra Ministerio Publico. Tin dos tipo di procedura pa personanan stranhero drenta y biba na Aruba. Hendenan cu mester permiso mester haci esaki pa medio di DIMAS, y e proceso tin un comienso y fin. Ora cu e permiso caduca y ta pidi prolongacion, pero kier biaha, nan por pidi declaracion cu nan por bolbe Aruba pasobra ya nan ta residente, y nan ta bolbe Aruba pendiente e decision riba peticion. Si permiso a caduca, y no a pidi prolongacion of no tin permiso, DIMAS no ta emiti un carta di reingreso.

Un proceso di carta di reintegracion ta bay man den man cu control di e personanan en cuestion a paga e sumanan cu ley ta prescribi. E mester paga 40 florin pa por entrega e peticion y ta haya su contesta den dos dia. E ora ta haya e carta di reingreso cu ta inclui potret y vigencia, e fecha cu a emiti e carta y firma. Asina aki ta evalua si tur e proceso a cana su caminda.

E discusion awor ta e forma di actua di e Minister, door di emiti e cartanan di reingreso for di su bufete, sin cu ta haci e asina yama ‘toetsing,’ sin cobra e 40 florin cu tur otro mester paga segun ley. Ta e casonan aki ta locual Inmigracion di Aruba a señala di no conoce y pa tal motibo a bay Minsiterio Publico. Ademas, si bay tras di e un caso cu Minister mes a splica di dje, cu ta e señora Venezolano casa cu Arubiano, e pregunta ta pakico e señora no a cana e caminda via DIMAS pa haya su permiso di estadia cu e tin derecho riba dje.

Otro hurista a bisa Bon Dia Aruba cu na momento cu un ambtenaar ta bati na porta di autoridad hudicial ta pasobra tin un ‘red flag,’ esta cu indicacion cu algo no ta bon. E solo hecho cu Procurador General ta inicia un ‘feitenonderzoek’ ta pasobra a reconoce e ‘red flag’ aki, ya cu no ta bay haci investigacion si tur cos ta na ordo.

LTU

Di su banda, Minister Croes ta bisa cu e ta sinti su mes sigur den su decision, pero cu e ta mira cu locual a sucede aki ta ambtenaarnan cu ta confronta un diferente maneho. Croes ta bisa cu e ta trata cu casonan individual, pero semper teniendo cuenta cu e Ley Expulsion y Admision, esta e LTU. “Ami kier pa e berdad sali, pa sa kico tabata e miho paso pa sincronisa ora e situacionnan asina mester pasa.”

Locual Minister Croes a lamenta ta cu e personal di Inmigracion no a yama su despacho pa haci pregunta, pero ta sigura cu e investigacion lo saca e hechonan na cla y lo tin “claridad riba algo mas grandi cu ta sucede na Aruba.” Den concepto di Croes, tin un ambiente di antagonismo contra stranhero, particularmente personanan cu no tin e documentonan apropia.

El a ilustra e maltrato cu un miembro di Warda Nos Costa a haci cu un señora. “Tin un problema mas grandi, unda mi coleganan ta bisa cu mester lubida di papia di e palabra ilegal, sino usa indocumenta. Pasobra bisa cu un persona ta ilegal ta kita nan derecho humano fundamental. Na Aruba mester trata tur hende cu humanidad, hasta ora e ta fout, hasta ora e mester deporta. Tin un sentimento di odio y resentimento cu ta cushina y e ta inaceptabel den un comunidad chikito cu ta conoci pa trata hende bon.”

Ora ta trata asuntonan di extranheria mester trata cu rectitud y humanidad, y cu sentido comun, e Minister a sigui bisa

Interpretacion diferente

Den concepto di Minister Croes, e señora Venezolano casa cu Arubiano no tabatin mester di un carta di reingreso. Pero ta interpretacion cu mester di claridad cu awor lo bin cu e investigacion di Ministerio Publico. “Un di e origen di e interpretacion diferente ta cu Ministerio di Integracion y Extranheria tabata cay bao Minister di Husticia. Awor a separa nan y inmigracion kizas ainda mester aclimatisa cu mi maneho di admision di stranhero. Nan a bisa mi cu antes cos tabata wordo regla via email. Pero awor e mester bay segun un formato delinea pa e Ministerio nobo cu tin su maneho nobo y nos tin un tarea pa haci pa percura cu tin bon comunicacion. Nan por a yama nos despacho pa sa si e documento a drenta via Ministerio.”

Croes a expresa un frustracion pa e proceduranan di DIMAS cu ta tuma tempo, cu a haci posibel pa den pasado Ministernan corupto por a tuma placa pa haci excepcion. “Nos maneho ta honesto y limpi. Cuidou e (investigacion) trece rabonan cu ta yega otro caminda.”

Glenbert Croes ta enfatisa cu su maneho ta pa atende casonan individual pasobra na final e ta yuda e colectivo, pero ta sigura cu e ta sigui e LTU y maneho di admision. “Ami lo prefera pa inmigracion atende e casonan segun LTU. Pero ora un caso keda escala na e Minister, e tin e discrecion pa busca solucion na interes di ciudadano. Si tin aspecto cu a bay robes, e feitenonderzoek lo trece esey dilanti,” Croes a enfatisa.

E LTU berdad ta duna Minister cierto discrecion y por tuma decisionnan individual, pero esakinan mester sucede pa medio di un decreto nacional cu medidanan general, esta un landsbesluit houdende algemene maatregelen, lbham. Un decreto nacional asina mester pasa haya autorisacion di Gobernador. Minister Croes a bisa Bon Dia Aruba cu su despacho y su consehero huridico a prepara e cartanan pa e firma.