Potret juan gabriel (2).jpg

No a pasa mucho cu Juan Gabriel a bin Aruba pa realisa su concierto di despedida den e mundo musical… Y el a bira berdaderamente un despedida ora cu e noticia di su fayecimento repentino a wordo plama internacionalmente, y muy particularmente den medionan specialisa den farandula.

Diadomingo morto a sorprende Juan Gabriel su existencia di 66 aña, despues cu el a cumpli un compromiso musical na Santa Monica, California. Awe pueblo Mexicano y  su fansnan  y amante di su musica den henter mundo ta sinti su partida, ya cu Juan Gabriel su gran talento y composicion musical a marca un echo den nan bida personal…. Cada un di nan tin recuerdo personal asocia cu Juan Gabriel y su amplio repertorio musical.  

Un infarto fulminante a pone fin na e bida di e cantante di “Querida”.   A wordo informa cu no a realisa niun autopsia, mientras cu su famia a duna di conoce pa medio di un comunicado cu nan lo duna mas detaye di Juan Gabriel su morto den e dianan venidero. Pero di otro banda, nan a pidi pa medionan di comunicacion y nan fans  lo duna nan “un espacio chikito pa yora e perdida di Juan Gabriel”.

Filantropico

Pero Juan Gabriel no solamente tabata un excelente artista sino un gran ser humano masha comprometi cu obranan social.  E tabata un filantropo cu a traha mas tanto riba e tereno di muchanan menos fortuna.  E tabata protector di un centenar di mucha menos fortuna di e programa social den scolnan  na Ciudad Juarez. E tabata un gesto di gradicimento, ya cu e tambe tabata un mucha menos fortuna cu a wordo lanta den e seno di un famia di cunukeronan hopi humilde.  E tabata esun mas chikito di un famia di 10 ruman. Tempo cu e un mucha di apenas 5 aña a wordo interna den e scol yama Centro di Mehoracion.  Eynan el a conoce un maestro cu a siñe musica. Danki na su don musical, talento, perseverancia y calidad humano, el a bay dilanti.

Un ciudad cu lo rindi un homenahe postumo ora cu su resto lo wordo entrega mañan, ta  Ciudad Juarez. Un ciudad cu a cay den e luz negativo pa e ola di violencia causa pa e guera di e narcotraficantenan. Pero un ciudad cu Juan Gabriel a bira solidario cu nan na momento cu e ciudad aki na noord di Mexico a sufri su pio momento di violencia.

Tabata existi un laso estrecho entre Juan  Gabriel y Ciudad Juarez. E tabata e ciudad di recuerdonan no mucho grato di Juan Gabriel su infancia tempo cu e tabata Alberto Aguilera Valadez.  Pero e tabata e ciudad di recuerdonan mas alegre ora cu el a cuminsa formalmente su carera exitoso como cantante mas cu cuater decada pasa y el  a transforma su mes artisticamente como Juan Gabriel…  A wordo bisa cu el a traha su nomber artistico cu e prome nombernan di su mayornan y tambe cu e nomber di su maestro di musica.

Su composicion “Noa-Noa” a wordo inspira riba e bar caminda el a haci su debut como artista na Ciudad Juarez. P’esey el a wordo batisa artisticamente como “E Divo di Juarez”.

Mundo musical

El a compone un  gran cantidad di  composicion  mas cu 1.800cu a transcende cualkier frontera fisico y di idioma. Te hasta el a yega di canta na Papiamento;  y su  tema musical “Me he quedado solo”, el a canta esey na Hapones. E tabata un di e compositornan Hispano mas interpreta musicalmente na nivel mundial.

Un cancion di Juan Gabriel cu a bira un clasico y casi un himno pa esunnan eternamente namora ta “Amor Eterno”. Ta wordo bisa cu el a skirbi e cancion aki ora cu su mama, Victoria Valadez Rojas a fayece na aña 1974.  Sinembargo otro version ta indica cu e cancion aki el a trahe pa Rocio Durcal, caminda el a duna bida artistico na Rocio Durcal.

 Un punto cu semper prensa sensacionalista a referi na dje tabatin di haber cu Juan Gabriel y su sexualidad, si e tabata gay of no. Durante un di e poco entrevista cu el a referi riba e topico aki tabata na aña 2002 den e programa “Primer Impacto”. E biaha ey e no a duna relevancia na e pregunta ey, pero si el a bisa: “Uno no ta bal pa e personalidad cu otro hende ta tira riba bo….” Y berdaderamente Juan Gabriel tabata un “show men”. E tabata un berdadero espectaculo riba escenario cu un estilo masha original y conkistado. Y cu apesar di su apariencia e no tabata gay sino “todo un varón”.

 E tabata cantante, actor, compositor, musico, productor di disco…  El a duna un contribucion grandi na e musica popular Latino Americano, den diferente ritmo musical, entre nan, balada, ranchera, bolero, musica norteño, salsa, etc… E tabata un di e artista Latino cu mas a yega di bende ticket durante e presentacionnan cu el a haci na Merca.

LEAVE A REPLY

Please enter your comment!
Please enter your name here