(TMZ) – Kanye West aparentemente ya a supera su divorcio y ex-pareha Kim Kardashian cu ayudo di e modelo Irina Shayk.

West y e modelo famoso a ser mira den e region di Provence na Francia, unda cu nan tabata celebrando West su 44 aña cu algun amigonan y tambe nan so aparentemente como pareha na un hotel luhoso.

TMZ a confirma cu Kanye West y Irina Shayk ta 100% pareha, pero fuentenan no por saca afo con serio e relacion ta, mirando cu recientemente West a caba di sali di un matrimonio cual tabatin efectonan fuerte riba su salud mental, y despues un divorcio, pues e comienso di e relacion cu Irina no ta conoci y pa e motibo aki no por constata con serio e relacion entre West y Shayk ta.

E revelacion ta bin casi inmediatamente despues cu Kim Kardashian y su familiarnan a publica riba nan rednan social felicitando Kanye pa cu su hacimento di aña.

Tumando na cuenta cu apenas 4 luna pasa Kim Kardashian a pidi West e divorcio, e revelacion di e relacion nobo aki ta uno impactante ya cu no hopi tempo pasa West tabata papiando di tur loke el a pasa aden durante su matrimonio. Kim Kardashian ta esun cu a pidi y cuminsa e proceso di divorcio despues di un tempo separa, pero te ainda no tin señal di a tuma e siguiente paso y cuminsa un relacion nobo, por lo menos no publicamente.

Mientras cu Kim Kardashian tabata hopi vocal y a expresa hopi tocante e divorcio durante y despues, mas tanto riba e serie di television “Keeping Up With The Kardashians” bisando cu e ta sinti su mes culpabel y como un fracaso mirando cu esaki ta su di 3 matrimonio cu no ta funciona. West tabata e contrario, y no a comenta tocante e matrimonio te cu recientemente na un entrevista tocante e divorcio.

West y Shayk, ken tin un yiu muhe cu Bradley Cooper, tin un pasado profesional cu otro: Irina a modela pa West den un show di moda pa su coleccion di paña Yeezy cu e vestuario principal na Francia y West a yega di menciona Irina den algun cantica cu el a saca anteriormente, demostrando cu prome cu e relacion ya nan tabata conoce otro for di basta tempo atras.

LEAVE A REPLY

Please enter your comment!
Please enter your name here