(AP) — Produccion ilegal di droga riba tera Europeo a aumenta durante pandemia di coronavirus aña pasa, mientras lockdown a yuda move benta di droga for di caya na plataformanan codifica online, segun un analisis di tendencia di droga continental, revela ayera.
E Reporte di Droga Europeo 2021 ta bisa cu gruponan criminal tambe a adapta na restriccionnan di biahe y ciere di fronteranan door di depende menos riba transporte humano, y bay pa containernan y cadena di suministro comercial pa trafica substancianan ilicito.
E reporte ta produci anualmente pa Centro Europeo di Monitoreo pa Droga y Adiccion, usando data di e 27 pais miembro di Union Europeo, Turkia y Noruega.
Su autornan ta bisa cu mientras ordennan estricto pa keda cas (shelter in place) a afecta benta di droga riba caya, e mercado a move na mensahenan codifica y plataformanan di rednan social pa negocia compra, y servicionan di entrega na cas pa distribucion.
“Esaki ta pone atencion riba si e impacto a largo plaso di e pandemia por ta mas digitalisacion di mercado di droga”, e reporte ta declara.
Tabatin 46 droga nobo detecta na 2020 so, incluyendo cannabinoids y opioids sintetico, segun e reporte.
Comisionado Europeo pa Asuntonan Interno, Ylva Johansson a bisa cu ‘e substancianan altamente puro y potente’ haya den e paisnan investiga tabata un causa special pa preocupacion.
Uso di droga ilegal en general, el a adverti, tin riesgonan ambiental, di salud y di seguridad pa UE. E problema ta ‘corumpi e tela di nos sociedad, impulsando violencia y poniendo den riesgo e seguridad y salud di nos ciudadanonan’, Johansson a bisa den un declaracion.
EMCDDA a describi e mercado di droga Europeo como ‘dinamico y adaptivo’, como tambe ‘resiliente pa restriccionnan di Covid-19’, cu patronchinan di uso di droga ‘cada bes mas compleho’. E reporte ta lanta preocupacionnan specifico tocante e maluso di benzodiazepines, cu ta receta pa trata ansiedad pero ta vincula na venenamento y morto pa uso no autorisa.
Produccion di amphetamine y methamphetamine ta den aumento, segun e reporte. Disponibildiad di cannabis no a reduci durante e pandemia, segun data preliminar di 2020. Maske uso di cannabis a keda stabiel na nivelnan halto, autoridadnan na Europa a confisca un record di 235 ton di cocaina na 2019, un aumento riba e 195 ton e aña anterior.
