Despues di a pospone e reunion dos biaha, diamars proximo, dia 16 di februari, Parlamento ta bay trata e cambionan den Codigo Civil cu tabata pendiente pa wordo introduci desde september 2016. Banda di actualisacion di derecho civil den su totalidad, e proposicion di gobierno no ta inclui tur derecho pa parehanan cu registra nan relacion (geregistreerd partners). Nos ta ofrece un bista riba e derechonan di union civil y e cambionan mas grandi banda di esaki.

Manera Bon Dia a subraya caba, gobierno kier haci un distincion entre cierto derechonan cu parehanan di mesun sexo lo haya si nan registra nan relacion. Esey ta trece cune cu parehanan di mesun sexo no lo tin derechonan social manera acumulacion di pensioen conhunto, pensioen di viudez, areglonan di indole fiscal, pero tampoco e posibilidad pa tin custodia riba muchanan. Banda di esaki, parehanan cu registra nan relacion lo por bay regla nan herencia por medio di traha un testamento na un notario.

E derechonan complementario lo wordo implementa “despues”, aunke no ta mucho cla na ki momento esaki lo tuma luga. E pregunta lo keda pa algun parlmentario por hacie. Den casonan concreto, un hues lo por brinda un solucion na un pareha cu ta sufri a base di no tin tur e derechonan, segun e proposicion di ley di gobierno.

Pero anteriormente docente hefe di derecho priva na Universidad di Aruba Carlos Bollen a pone duda na esaki, mirando cu e docente a observa cu den practica cambia ley na Aruba ta tuma por lo menos 10 aña. Esaki, segun su observacion, ta bin pasobra tin recursonan pa legisla limita, pero den e caso di e derechonan pa parehanan cu registra nan relacion, e ta subraya cu ta un falta di madurez politico.

Mas aleu, Bollen a opina cu den su wowo, e ta haya cu e proposicion actual unda no ta otorga tur derecho, no ta bay suficientemente leu. Bollen ta haya cu e conseho di Hof cu ta menciona den e proposicion di gobierno ta di un banda, un manera pa anda cauteloso cu e actualisacion di Codigo Civil y di otro banda e ta mustra di ta un conseho laga na mita.

El a splica den nos ultimo articulo tocante e topico aki, cu e por compronde cu Hof lo kier pa e cambionan pasa sin mucho controversia pa via di union civil, mirando cu tin hopi mas cambio cu ta importante pa ta actualisa den ley.

Mester remarca cu originalmente a declara union civil igual cu matrimonio cu Desiree Croes su amienda controversial, pero consecuentemente Andin Bikker (POR) a entrega un mocion kitando Croes su ‘schakelbepaling’, y introduciendo union civil den su propio titulo, manera na Hulanda. E diferencia ta cu den 2016 a schuif e consecuencianan legal (lesa: beneficionan) di union civil den e aanpassingsverordening cu lo wordo trata diamars otro siman. Prome cu Bon Dia a trece esaki dilanti, ningun minister a menciona nada cu lo a kita cierto derechonan.

RED y POR ta kere den derecho igual pa LGBT+ pero no a saca cara pa nan

Desde 2016 union civil a keda den un fase di bay-bin entre parlamento y gobierno sin niun comentario of declaracion di kico ta bay para di e derechonan igualitairo pa parehanan di mesun sexo. Mester remarca cu partidonan RED y POR, cual a declara publicamente durante temporada di eleccion cu nan ta apoya derechonan igualitario pa personanan LGBT, no a haci ningun pregunta of trece e topico aki dilanti desde eleccion. Ora ta trata di RED, e partido ta menciona explicitamente den su programa di partido cu e ta apoya derechonan igualitario. POR mientrastanto no ta menciona e punto aki explicitamente, pero si ta menciona cu e partido ta kere den igualdad pa tur persona, y durante un di e debatenan den temporada di eleccion e partido a fiha su posicion pa ta pro derechonan igualitario pa personanan LGBT+. Si e parlamentarionan di e partidonan aki lo bay apoya derechonan completamente igualitario, lo mustra den transcurso di dia.

Solucion pa herencia di tereno

Banda di e aspecto di union civil, den e propuesta di ley cu parlamento lo vota riba dje diamars otro siman, ta introduci un par di articulo den Codigo Civil unda ta haci posibel pa terenonan cu no tin doño cla of cu ta bira poco practico pa parti entre varios heredero wordo parti. E punto di bista ta cu den varios situacion, na Aruba no ta cla di kende un tereno ta y esey por haci cu e propiedad ta bira economicamente morto. Tambe tin situacionnan unda un tereno tin varios heredero cu ta acumula despues di tempo, y na cierto momento por bira dificil pa haya tur e herederonan back pa asina parti un tereno, conduciendo na e mesun situacion unda e tereno ta bira economicamente morto.

E solucion ta cu lo por duna e tereno na personanan cu lo bay mantene nan, of den caso cu nan no por carga e peso financiero aki, por otorg’e na gobierno of un fundacion cu ta representa e interesnan di e herederonan.

Mayornan por des-hereda nan yiunan

E otro cambio mas grandi ta encera kitamento di e ‘porcion legitimo’ (legitieme portie). Esaki tin e efecto cu mayornan por des-hereda nan yiunan si nan ta desea, algo cu anteriormente no tabata posibel.

LEAVE A REPLY

Please enter your comment!
Please enter your name here