Ta bon conoci cu e actual gobierno ta aspira na un Aruba mas sostenibel den tur sentido, den esey un Aruba mas ‘berde’ sin cu esaki ta referi na color politico. Esaki practicamente nos tur por apoya. Ta logico pa pensa cu un Aruba miho cuida den tur aspecto ta un Aruba miho pa biba, y tambe un Aruba mas agradabel pa bishita. Ora yega na implementa e pensamento positivo aki, ta unda nos ta cuminsa diferencia di opinion. Nos ta topa cu tema manera energia alternativo, procesamento y reciclahe di desperdicio, mantenemento di paisahe, estimulo pa agricultura y cria di bestia, conservacion di costa y bida marino rond di nos isla, conservacion di flora y fauna na tera, etc. Pero, tin un luga ainda unda tur e temanan aki ta bin hunto? Tin un of mas instancia cu ta duna guia y acompañamento na plannan y progreso den e aspectonan aki?
Nos por corda cu prome cu entrada di e gobierno actual, un grupo grandi di ciudadano di tur color politico tabata envolvi den e proyecto ‘Nos Aruba 2025’. Despues cu a termina e proyecto, a cay un silencio profundo. Talbes tur hende tabata demasiado enfoca riba kico gobierno ta bay haci, loke ta bon tambe, pero no ta kita e necesidad pa e ciudadano mes sigui traha riba loke e mes, individualmente pero tambe den forma organisa, por y mester haci pa su pais.
En berdad e gobierno nobo a tuma varios iniciativa pa cu un strategia sostenibel. A bin cu iniciativa riba tereno di energia renovabel, procesamento di desperdicio den forma di gas pa uza den produccion di electricidad, a bin iniciativa den direccion di agricultura y cria, etc. Pero ora cu poco a poco e iniciativanan gubernamental a cuminsa slow down o hasta para por completo, por a ripara cu e iniciativa di e ciudadano mes ta haci tremendo falta. Ta parce manera nos a sinta, relax y warda gobierno bin haci tur cos pa nos. ‘Big mistake’ nos lo bisa na Ingles. Seis aña despues nos mester realisa cu ningun gobierno por haci tur cos, y no mester pretende esaki tampoco. Pero ora cu practicamente no tin iniciativa (mas) di e poblacion pa cuminsa traha riba e temanan aki, tur cos lo bin di iniciativa gubernamental. Y ora placa bira scars, e iniciativanan aki tambe ta move bay mas patras riba agenda.
Asina nos ta yega na e situacion actual unda practicamente nada ta sucede. Por ehemplo nos tin e proyectonan grandi cu no ta progresa, pasobra tin caso grandi den corte cu ta tarda añanan pa yega na un conclusion. Esey ta e caso cu e parke di molina proyecta na Urirama, cu ta tumando su tempo. Banda di esey mester tuma na cuenta cu e problemanan tecnico di e almacenamiento di energia cu e proyecto mester, no a keda soluciona. Esaki ta ilustra bon cla tambe cu no ta un cuestion di deseo so, sino tambe di un evaluacion cuidadoso di kico por y kico ta pas cu otro.
Nos ta presencia pa di dos biaha un proyecto di procesamento di sushi cu aparentemente no ta progresa, unda tambe e compania nacional di produccion di energia y awa tin inversionnan grandi haci. Mientras tanto e sero di sushi na Parkietenbos ta yegando na un altura inaceptable y a habri man caba pa permiti deposita desperdicio den un gran cantidad di coba di piedra. Cu esaki a aumenta drasticamente e peligro pa salud di henter e poblacion, ya cu practicamente tur caminda tin hende ta biba. Por lo tanto mester yega na e conclusion cu ningun caminda na Aruba nos por permiti almacena sushi sin perhudica algun persona. E contesta: talbes procesa tur desperdicio den forma selectivo, y exporta tur loke por exporta pa minimalisa loke ta keda aki. Si esaki ta rekeri cu nos mester cuminsa separa desperdicio na cas caba, cu diferente container pa sushi, laga nos haci’e. Awor e enfasis ta unilateral riba e aspecto di cu e ciudadano mester paga, pa gobierno keda cu mas placa pa gasta na otro cos, en bes di mira kico nos por haci conhuntamente pa mehora e situacion.
Ora nos ta keha di un prijs di coriente cu segun nos ta demasiado halto, nos ta critica e situacion cu e aventura di ‘hedging’ a hinca nos aden. Pero esey no ta tur. E parti mas facil pa economisa rond mundo ta e uzo mas consciente di energia y no mester costa tanto, y a lo largo ta nos mes ta beneficia.
Tur esaki ta señal, no tur, cu na e momento aki e discusion y combersacion riba unda nos kier hiba nos pais ta parce pega, sin un guia y caminda indica claramente. Gobierno ta grita ‘green’ y ‘sustainable’ na cualkier ora di dia o di nochi, pero no tin comunicacion y iniciativa civico cu ta mustra cu e ciudadano ta participe den esaki. Atrobe, no tur cos mester bin di gobierno, tin cos cu nos mes mester haci. Manos a la obra.
