cantidad di cliente impuesto.jpg

Aunke ainda no tin un fecha fiho, pronto Servicio di Impuesto di Aruba (SIA) lo habri un localidad den edificio multi funcional (MFA) na Noord. 

Cu hopi entusiasmo vocero di SIA, sra. Meverly Romano a anuncia na publico en general  y specialmente na nan clientenan,  cu departamento di Impuesto ta trahando pa realisa pronto e apertura di e facilidad aki ampliando asina nan servicio den e districto aki.  E no ta tribi pa duna un fecha ainda pero sra. Romano a laga sa cu den un termino hopi cortico nan lo cuminsa duna servicio den e facilidad di edificio MFA na Noord. 

“Pa e publico cu ta di Noord y bisindario denter di poco nos lo cuminsa duna servicio akinan y asina nos por mehora tambe e tempo di spera cu normalmente aworaki nos tin un cantidad di cliente cu ta bay Camacuri”, el a bisa. Pero tambe nan tin cantidad di cliente cu ta bay sucursal di SIA na Paradera, Santa Cruz,  Savaneta y San Nicolas.  

SIA nan cantidad di cliente –segun sra. Romano- ta bira aña pa aña mas hopi. Pa tal motibo si nan por duna servicio na un localidad adicional manera na Noord, mas cu claro cu esaki ta pa departamento di Impuesto hopi satisfactorio, ya cu asina nan por yuda nan cliente mas lihe. 

Facilidad na Noord

Sra. Romano a bisa cu departamento di Impuesto ta consciente cu Noord ta un districto grandi. Nan ta premira cu unabes cu nan ta habri nan servicio den MFA, esaki lo yuda pa trece fluho grandi di clientenan. 

Nan cantidad di cliente ta hopi grandi y  SIA ta haya cu e edificio grandi di MFA ta brinda e facilidad cu ta cuadra cu nan deseonan . Despues cu oficina auxilia di gobierno a cera na Noord y edificio moderno di MFA  a habri,  departamento di Impuesto a suspende temporalmente su servicio den e districto aki. 

Denter di poco SIA lo habri servicio di caha.  Pero ta nan intencion  tambe di bin cu otro servicionan pa nan clientenan pa loke ta trata areglonan di pago, declaracion di impuesto, entrega di declaracion o cualkier otro documento di belasting.

E disponibilidad di e tipo aki ta un necesidad den e districto aki, ya cu sr. Richard Tromp kende ta gerente di edificio MFA-Noord ta haya peticion diariamente pa nan ofrece e servicio di pago di belasting tambe. 

 

 

 

LEAVE A REPLY

Please enter your comment!
Please enter your name here