Y esey ta bay yuda?

No cabe duda cu un mayoria di e gabinete actual ta considera e mensahe reciente di Citgo uno negativo. Nan a kere sinceramente cu e lo tabatin futuro. Nan a hasta pasa den berguensa pa nan mantene nan punto di bista cu tabata exactamente e mesun di gobierno anterior: e baina ey mester habri, y nos ta bay habri esaki. E berguensa tabata cu nan a acepta pa gobierno anterior trata nan manera mucha chikito, pone nan sinta den un camber pa nan por lesa e famoso 2000 pagina di e convenio cu PDVSA y gobierno Venezolano.

Segun nos a comprende, nan tabata considera cu vota contra no tabata un opcion, ni a base di e denuncia di nan derechonan fundamental como representante di pueblo. Asina nan a participa na e teatro pa cual gobierno anterior a organisa e tarima, votando na fabor, casi tur… Sikiera tabatin un dama den e sala di parlamento cu dos placa di tino cu no a vota contra so, pero a duna un motivacion cu lo keda como un di poco joyanan di discurso duna eyden. Oposicion den su totalidad por a abstene di vota, como protesta pa violacion di nan derecho como parlamentario, pero ni sikiera esey a considera. Y pakico no?

Pasobra simplemente nan tabata kere honestamente cu e proyecto lo tabatin bida. Y pasobra nan no tabata dispuesto tampoco di scucha berdadero experto cu lo por a pone nan riba otro pista. Y pa falta di informacion clave den e asunto aki, probablemente si bo no tin gana di tende informacion contrario, bo no ta busca tampoco. Con tal cu pa fin di 2016 ya tabata mas cu cla cu lo no tabatin placa pa inverti den e proyecto. Loke nos a mira pa casi dos aña ta un slow motion show pa duna impresion cu algo tabata pasando. E berdad ta cu nunca tabatin ni sikiera bista riba haya e placa pa haci e inversion necesario. E hecho cu e sancionnan di Merca a hunga un cierto papel, no ta kita nada di e berdad cu prome cu esey no tabatin perspectiva pa financiamento tampoco. Awor e gobierno nobo a logra haya e informacion cu gobierno anterior tabata kier a sconde y muy probablemente awor nan ta comprende loke solamente algun medio bon informa tabata trece dilanti pa varios aña caba: e refineria no tin futuro. Enfin, no tin tanto sentido pa sigui rub it in; comete eror ta humano y ta mas importante wak dilanti unda nos ta bay desde awe.

Pero awor nos ta yega na e berdadero show comico, y esey ta e papel di actual oposicion. Ta berdaderamente ridiculo cu un di e arkitectonan di e farsa mas grandi hamas construi aki, ta net esun cu ta para na banda ta conseha gobierno kico mester haci. Si tabata su persona, lo el a subi avion dia bieu bay Houston, o cualkier otro luga, pa logra cu ta bin placa riba mesa pa PDVSA logra inverti den e proyecto aki. Pa su mala suerte, si e como academico no ta lesa corant y no ta informa su mes tocante e tragedia cu ta tumando luga cerca nos bisiñanan, pero en cambio e ta haya ta normal cu nos mester deal cu un di gobiernonan mas corupto na mundo manera ta brother nan ta, tin hende na Aruba cu si ta informa nan mes debidamente. E por wel di sigui mal uza e nomber di Citgo, pero finalmente ta un proyecto e ta di PDVSA y gobierno corupto di Nicolas Maduro. Pa nos suerte nan no por a haya placa fia niun caminda, sino lo nan a bin venena San Nicolas cu mas huma y mas desperdicio cu tempo e tabata opera como refineria. Anto e parlamentario aki tin e pudor di bisa gobierno actual kita bachi, lora manga y cuminsa haci cos pa sigura bida di e refineria. Na mes momento e mes sa masha bon cu cos a caba pa e refineria. Nos ta menciona dos hecho.

Algun siman pasa PDVSA a contrata un compania Frances – Axens Performance Programs – pa diseña un tubo di gas, for di costa na Puerto Cumarebo, te na instalacionnan di refineria Isla na Curaçao. E tuberia aki di como 90 km, na un profundidad maximo di 1500 metro, mester percura pa gas natural di Venezuela por yega na Isla, pa converti pa gas como combustibel na luga di fuel oil, cu e corespondiente bentaha di menos contaminacion ambiental. Ta parce nos cu si PDVSA tin pensa di extende e contracto cu gobierno di Curaçao, cu ta termina na 2019, nan lo mester haci algo den e sentido aki. No cu nan tin placa pa haci nada, ta djis e diseño nan ta laga traha.

Nos a yega di tende algo similar pa Aruba? Anto nos no ta papia aki di 90 km, hopi menos y na menos profundidad tambe. Pero nada. Riba esey, manera anuncia anteriormente, WEB Aruba ta bay su mes caminda y ta bay importa gas pa su mes cuenta. Anto ainda e apreciabel parlamentario ta kere cu nos ta kere cu e refineria lo tin bida atrobe? A otro perro con ese hueso!