Segun un comunicado di Camara di Comercio y Industria Aruba (KvK), e entidad aki y demas gremionan comercial a sinta cu Minister encarga cu medio ambiente pa papia tocante maneho di desperdicio. E gremio a para riba cu eliminacion di Parkietenbos y demas dumpnan ilegal ta necesario, sugeriendo tambe pa revisa si bin cu insinerado lo ta e solucion mas duradero. Di su banda, Minister Otmar Oduber a conta gremionan cu e ta habri pa otro solucion banda di insinerado.

Minister di Infrastructura y Medio Ambiente a invita e gremio pa presencia e presentacion di e plan integral pa maneho di desperdicio na Aruba. Tambe tabata presente na e reunion aki ATIA, AHATA, ATSA, SNBA, WEB y Serlimar. Como representante di sector priva, KvK su rol durante esaki ta pa crea espacio empresarial atractivo y atrae inversionnan cu ta contribui na economia di Aruba. KvK ta para tras di e desaroyo di un miho legislacion y reglanan stipula door di gobierno cu ta yuda na brinda miho servicio di e sector publico.

KvK ta hopi gradici pa e oportunidad cu Minister a ofrece na e diferente gremionan pa asina por dialoga y den un forma transparente yega na loke ta e miho solucion pa e maneho di desperdicio. KvK ta para tras di comercio na Aruba y esey ta inclui cu na Aruba nos tin un sistema basa riba “free enterprise” y cu e mercado mester keda habri den un forma competitivo. Banda di esey KvK ta apoya e idea di gobierno actual caminda cu ta propaga solucionnan sostenibel y na bienestar di nos medio ambiente.

Elimina Parkietenbos, dump ilegal y pensa bon si insinerado ta bon
Pa KvK e ta importante cu e enfoke mester keda na elimina e dump di Parkietenbos y otro dumpnan ilegal rond Aruba, haya solucion pa tur e buraconan habri unda hende ta tira sushi, y bin cu solucionnan circular. KvK a acerca e Minister pa mira si Minister Oduber ta habri pa otro alternativanan banda di e solucion di un insinerado pa asina evalua kico berdaderamente ta e miho solucion. Minister ta compromete su mes cu e ta habri pa ricibi otro solucionnan cu no ta e insinerado. E ta importante si cu mester bin cu un solucion cu ta factibel, sostenibel y practico entre otro. Via KvK sector priva por bin dilanti cu su sugerencianan. Pais Aruba kier atrae inversionistanan y cualkier accion cu wordo tuma caminda por crea e percepcion cu sector publico kier afecta con negoshi internacional tin cu tuma luga por afecta e confiansa y credibilidad den Aruba y comercio di Aruba lo sinti e consecuencia di esaki.

E propuesta cu a wordo presenta ta un decision cu a wordo posponi pa mas cu 19 aña caba y KvK ta conseha cu prome cu bin cu cambio den ley encuanto maneho di desperdicio, ta bon pa considera tur e aspectonan y tene un participacion habri cu tur gremio concerni. Un decision den cambio di ley aki lo afecta futuro generacionnan di Aruba den su totalidad y esey ta inclui e pueblo, consumidornan y nos turistanan.

Minister a indica cu e ta compromete su mes cu prome cu tuma cualkier decision encuanto maneho di desperdicio y cuanto e “tipping fee” lo bira, e lo sinta atrobe cu e gremionan comercial. KvK ta boga cu mester cobra den un forma indirecto, den forma di impuesto na frontera. Asina tin 100% conformidad di impuesto y e ta hopi mas facil pa maneha. KvK ta boga cu e punto aki mester forma parti di e reforma fiscal cu gobierno lo introduci. KvK kier mira cu tin transparencia den loke ta e solucion pa maneho di desperdicio y cu na fin di dia e ta un inversion cu ta crea un situacion di “win-win” pa sector publico y sector priva.

 

LEAVE A REPLY

Please enter your comment!
Please enter your name here