Ayera mainta personal di DOW a cuminsa desmantela loke nan mes a lanta un par di dia prome, tanto e baricadanan y como e testnan den Harbour Arena, riba tereno di APA. Gobierno su intencion tabata pa re ubica e servicio di drive thru pa test Covid, cu Urgent Care Aruba (UCA) tabata ofrece na Noord.

 

Debi na avalancha hendenan interesa pa haci e test aki, debi na un aumento den cantidad di casonan positivo di COVID-19 y posibel contacto cu nan, e situacion aki practicamente a sali for di control. E caravana di auto di hendenan cu kier haci e test a causa molester den trafico y den e vecindario ey.

 

Te hasta un cas di cuido a vocifera nan preocupacion. Ya cu nan a percura di cuida nan clientenan grandi cu medidanan stricto, entre nan prohibi e bishita di nan sernan keri. Mientras cu tabatin chauffeur cu bentaha habri di nan auto, sin mask bisti, te hasta cu tosamento na menos di cuater meter di e cura di e cas di cuido aki. Esaki a haci cu gobierno a purba di bin cu alternativa pa asina e hendenan interesa pa haci e test aki, sin crea bottleneck ni molester.

 

Sinembargo, despues cu a wordo aloca tur cos pa realisa e drive thru na Habour Arena, gobierno a dicidi otro. Den e caso aki nan a dicidi pa laboratorio priva sigui brinda nan servicio di test via e metodo di Polymerase Chain Reaction (PCR). Pero si gobierno a dicidi cu e sistema di drive-thru a keda suspendi.

 

Sinembargo Bon Dia Aruba a wordo informa cu otro drive-thru a wordo crea na altura di The Mill Resort. Mientras cu gobierno a dicidi cu e tipo di servicio di “drive-thru” aki a wordo suspendi. Ta trata di MedCare Clinic (urgent care) cu ta brinda nan servicio den e area hotelero, muy specialmente pa nos turistanan. Pero aworaki, MedCare Clinic tambe ta ofrece nan servicio relaciona cu Covid-19 testing. Nan prijs ta 150 dollar pa test entrega den 24 ora. MedCare Clinic no tin nan propio laboratorio. Pero si nan ta haci uzo di e servicio di laboratorio di hospital (LABHOH).

 

Nan ta un intermediario of gewoon facilitado di e servicio di tuma e muestra (swab den nanishi), registra nan debidamente, entrega na LABHOH y despues nan ta duna e resultado. Aunke nan no ta cay den e grupo di laboratorio priva autorisa pa haci PCR test. Pero tur test tuma pa nan ta wordo procesa den LABHOH cu por haci e PCR testnan na Aruba.

 

E ta practicamente e mesun servicio cu Diagnostic Center tabata ofrece via AZV, sin mester di paga. Solamente cu e persona por bay test, ora cu e ta presenta e sintomanan y e mester tin autorisacion di nan dokter di cas. Mientras cu akinan esun cu kier paga no mester autorisacion di nan dokter di cas. Sinembargo pa loke ta maneho di test, DVG conhuntamente cu Crisisteam, a dicidi cu esunnan cu ta brinda e servicio aki, tin cu sigui e maneho di DVG di cumpli cu triage.

 

Eventualmente, si MedCare Clinic ta haci’e, esaki ta habri e posibilidad pa otro sorto di clinica of dokter di cas, tambe nan lo por haci mesun cos. Kiermen ofrece e servicio aki, teniendo na cuenta e reglanan di DVG y haciendo uzo di e laboratorionan autorisa, nan ta LABHOH, Laboratorio di Servicio y MedLab.

 

Maneho di testing

Ayera pa medio di un comunicado, Departamento di Salubridad Publico (DVG) a splica e maneho di testing, unda ta wordo confirma gran parti di nos informacion. Ningun momento a para laboratorio priva di sigui test, ta solamente e sistema di “drive-thru” a wordo suspendi.

 

E maneho di test ta uno stipula pa DVG conhuntamente cu Crisisteam. Durante di e dianan aki, tin un aumento den cantidad di casonan positivo di COVID-19, unda cantidad di hende ta recuri na laboratorionan priva. P’esey DVG kier informa comunidad kico ta e maneho y procedura di Departamento di Salud Publico relaciona cu Covid-19 testing.

 

Un punto cu DVG kier trece bon cla ta: Tur persona local cu tin sintoma por haci nan PCR test gratis ariba indicacion di nan dokter di cas of DVG conforme e “Case defination”. Nan ta urgi tur hende cu na momento cu ta sinti sintoma acudi na nan dokter di cas pa asina indica si mester haci e PCR test.

 

Laboratorionan priva cu ta brinda e servicio aki tin cu sigui e maneho di DVG (di cumpli cu triage) y tin e obligacion pa meld tur caso di inmediato na DVG. Ta keda na cada ciudadano pa determina pa nan mes, si nan ta desea pa paga pa haci nan PCR test of acudi cerca nan Dokter di Cas pa un test gratis.

 

E unico laboratorio cu desde inicio na luna di maart 2020 tabata encarga pa ehecuta e PCR testnan aki tabata Lab-HOH. Esaki debi na e validacion di test y metodo cu e laboratorio a ricibi door Rijksinstituut voor Volksgezondheid en Milieu (RIVM) di Huland. Tambe debi na e cooperacion intenso cu ta existi entre Departamento di Salud Publico (DVG) y RIVM.

 

Unabes cu a dicidi di habri nos frontera, hunto cu diferente actornan a sigui traha pa crea diferente protocolnan pa prepara nos isla na momento cu habri frontera bek. Un di e condicionnan indica pa Hulanda den esaki tabata ampliacion di nos capacidad local pa por ehecuta mas PCR test pa COVID-19.

 

Ta asina cu a sigui un periodo di preparacion, caminda diferente laboratorio priva a mustra interes na Gobierno di Aruba cu nan lo por contribui na amplia capacidad di PCR test pa COVID-19. Segun DVG su comunicado, mirando e importancia di mantene e calidad y siguridad di e PCR test, un exigencia di Gobierno tabata cu e PCR test di laboratorionan priva mester wordo valida pa RIVM di Hulanda, y tambe mester cumpli cu diferente criterionan di siguridad y calidad.

 

Despues di un periodo di validacion di e PCR test di laboratorionan priva door di RIVM na Hulanda, finalmente algun laboratorio priva a haya “Luz berde” di parti Departamento di Salud Publico pa por haci e PCR testnan aki.

 

Mester menciona tambe cu e PCR testnan cu a wordo valida door di RIVM di e laboratorionan priva a wordo inspecciona pa Inspectie Volksgezondheid Aruba (IVA) pa asina sigura cu nan ta cumpli cu tur e criterionan di calidad y siguridad.

 

Di e forma aki laboratorionan priva por a cuminsa haci PCR Test na Aruba. Tambe a aproba pa laboratorionan priva por traha hunto cu compania di seguro pa asina ofrece nan servicio como parti di e pakete di seguro obligatorio di COVID-19, na nos bishitantenan cu manifesta sintoma.

 

Gobierno y DVG ta aclaria cu ningun momento a stop laboratorionan priva pa haci PCR testing. Loke a wordo para te proximo aviso ta drive-thru testing. E maneho di gobierno pa PCR testing pa laboratorionan priva ta cu mester entrega resultado dentro di 24 ora. DVG ta splica cu e ultimo dianan debi na e demanda pa PCR test tabata hopi halto, no por a cumpli cu esaki y ta pone cu drive thru testing no por sigui tuma luga por lo pronto.