Ladronnan ta bolter altura di Kapel di Alto Vista, despues di un persecucion di parti polis

Diabierna madruga net ora cu un patruya atento tabata pasando dilanti di Sherwin Williams na Boegoeroei a tende glas kibra y alarma a bay on.

Mesora nan a bira pa bay wak y ta haya un pick-up ta core sali bay, e patruya a bira bay su tras. Asina a start cu un persecucion cu a bay termina riba e caminda pa bay Kapel Alto Vista, ora cu e chauffeur di e pick-up a perde control den un bocht baha caminda dal contra un baranca y a bay bolter.

Despues di a bolter e chauffeur a core bay, den e boltermento e pasahero a resulta herida na su man y cabez.

Polis a avisa e pasahero cu e ta keda deteni bao sospecho di kiebro. Varios patruya mas a yega y tabata busca e otro sospechoso cu a huy na pia den e mondi, e agente cu a bay tras di e sospechoso den e mondi a pasa dal su curpa den e mondi yena cu tuna y hubadacaminda e tambe a resulta herida.

Despues di busca basta rato y sin resultado e patruyanan a stop cu e buskeda den e mondinan. Ambulance a presenta na e sitio y a atende e victima y transporte pa hospital acompaña cu polis. Na e sitio di kiebro polis a nota cu nan a kibra un glas pero a dal riba un rekki pues tabata un poco dificil pa drenta y como cu polis a pasa e sospechosonan a core bay sin drenta. E pasahero tin di bay bisa awor ta kende tabata na stuur.