Latino America awendia ta un teritorio cu hopi movemento

Desigualdad, desaceleracion economico, kibramento di democracia debil, desconfiansa den institucionnan, ausencia di politica pa mehora e redistribucion di ingreso y calidad di bida ta algun di e motibonan pa e agitacion den e region, unda den ultimo añanan tambe a sinti fuertemente e efectonan di caida di prijs di petroleo y e guera comercial entre China y Merca..

E prome pa sacudi e vecindario tabata Peru, unda na final di september Ppresidente Martin Vizcarra a disolve Parlamento, cu e mayoria tabata fujimorista. Vizcarra a tuma e decision pa motibo cu e parlamentarionan a nenga di reforma e mecanismo cu cual ta eligi e magistrado Constitucional, loke a duna bentaha pa e oposicion cu e ocupacion di funcion den e corte aki. Asina a convoca eleccionnan pa dia 26 di januari proximo, medida cu a hiba su opositornan pa marcha riba e cayanan di Lima.

Na comienso di october, Ecuador a sinti e temblor ora Gobierno a anuncia un reduccion di subsidio di combustibel. E protestanan y explosion popular di indigena a hiba Presidente Lenin Moreno pa detene e politica cu el a acorda cu Fondo Monetario Internacional pa cubri e deficit fiscal di e pais. E fin di e subsidio tabata implica un aumento di prijsnan di combustibel, loke a causa un impacto hopi grandi cerca e poblacion.

Na Chile, cu tabata parce un di e democracianan mas stabiel y trankilo di Latino America, e fragilidad economico di clase media a sali protesta cu e decision di Presidente Sebastian Piñera di subi e prijs di e metro di Santiago, loke a converti esaki den e gota cu a basha e copi.

Argentina, cu su eleccionnan dos siman pasa a trece e peronismo bek cu e triunfo di Alberto Fernandez, a biba un aña di protesta pa motibo di e recesion economico y inflacion.

E temblornan no a para na Venezuela, unda oposicion ta sigui sali pa protesta contra e regimen di Nicolas Maduro.

Colombia tampoco ta scapa di e descontento social, cu e aña aki a mira riba cayanan marcha di studiantenan, maestro, sindicato y ONG contra e Gobierno di Ivan Duque, cu ta prepara pa un welga nacional dia 21 di november proximo.