(EFE) – Den un rapport nobo publica dialuna ultimo pa Instituto di Estadistica di Unesco y Rapport di Siguimento di Educacion na Mundo ta conclui cu e mayoria di paisnan no lo logra e obhetivonan mundial den area di enseñansa pa 2030, incluyendo Latino America y Caribe.

Basa den referencia y datonan di cada pais, e rapport ta establece cu Obhetivo di Desaroyo Sostenibel 4 (ODS 4) di garantisa un educacion di calidad cu inclusion y igualdad, ademas di garantisa oportunidadnan di aprendisahe di bida pa henter e poblacion, lo keda leu pa aña 2030, incluso prome cu lo tuma en consideracion e consecuencianan di pandemia.

Den particular, Latino America y Caribe, hunto cu Asia Central y Meridional, “lo ta den via pa logra educacion di prome infancia universal”, pero paisnan como El Salvador, Haiti, Jamaica y Surinam, lo yega na 80% di alumno na etapa di kleuter pa 2030.

Tocante e cifra di hobennan sin scol den edad di educacion secundario, e region ta kere cu lo por reduci di 19% pa 12%, un punto unda e meta tabata pa logra alcansa tur di nan.

“Ta un paso berdadero pa bay dilanti, cu dos tercio di e paisnan ta evalua di forma real nan posibilidad di logra nan obhetivo di ODS 4. Sinembargo, den casi e mita di nos plaso, e proceso a mustra cu, incluyendo nan mesun evaluacion, e mayoria di e paisnan no lo acerca na meta di 2030”, e director di Instituto di Estadistica di Unesco, Silvia Montoya a señala.

Na nivel global, ta espera cu un 26% di studiantenan no lo tin habilidad pa wiskunde basico den e prome añanan di enseñansa, un 32% lo finalisa enseñansa primario y un 34% lo finalisa prome ciclo di secundario.

Paraguay tin e cifra mas halto, unda 74% di e muchanan no lo tin hablidad basico pa wiskunde pa finalisa scol primario, e porcentahe mas halto di e paisnan den e region cu datonan disponibel, despues ta sigui Uruguay cu 65%.

 

LEAVE A REPLY

Please enter your comment!
Please enter your name here