Asina a bisa Hugo Sigman, director di e laboratorio Argentino cu lo produci e vacuna contra e coronavirus di Oxford pa Latino America cu a wordo desaroya pa laboratorio AstraZeneca den colaboracion cu Universidad Britanico di Oxford.
Di mesun manera a sigura cu a cuminsa e elaboracion di e producto pa cu lo por distribui mesora despues di su aprobacion, algo cu lo por sosode pa “luna di december of januari” y cu lo haci cu e region lo tin e vacuna “na mesun momento cu Merca y Europa”.
Durante un entrevista cu un emisora Argentino Radio Mitre, Sigman a splica cu su laboratorio mAbxience, responsabel di e produccion di e substancia activo di e vacuna, y e Mexicano Liomont, cu lo completa e proceso di formulacion y envasado, lo produci e producto “na riesgo”, ya cu si e vacuna no lo wordo aproba na final, lo perde tur e inversion.
No obstante, e empresario Argentino a mustra confia den su aprobacion ya cu, di tur e vacuna cu ta desaroya na rond di mundo, esun di AstraZeneca y Universidad di Oxford ta esun cu a duna resultadonan mas comprometido.
“Aprobacion lo bay ta na luna di december of januari y nos lo bay produci e vacuna awor” Sigman a bisa, ken a calcula desde un minimo di 150 maximo pa 200 miyon di dosis pa tur e region, cu excepcion di Brasil na unda AstraZeneca tin otro convenio.
El a sigura cu tin entusiasmo y confiansa grandi. “ E efectonan contrario a wordo descarta practicamente. Tin hopi chens cu estudio clinico lo sali bon y lo ta e prome vacuna aproba na mundo”, el a bisa .
