Legalisa no ta nifica legal pa hoben

ORANJESTAD – Diabierna mainta den un conferencia di prensa conhunto di varios instancia a papia tocante e tema di marihuana. A trece informacion di e parti medicinal y recreacional y encuanto e proyecto riba cual FADA ta trahando.  

Emmeline Webb trahado social di fundacion Maneho di Adiccion Aruba a splica cu e ta trahando directamente cu hoben. El a menciona cu e ta duna servicio na e hoben pa stop e uso di droga. “Di e hobennan cu ta bin pa yudansa di adiccion y abuso di marihuana, por bisa cu 1% ta uza cocaina.”

Sra. Webb ta agrega cu a laga 317 hoben haci drugtest. E instancia of scol di e hoben cu a sali positivo, ta haya ofreci yudansa riba diferente aspecto di uso di droga, pa duna nan educacion di e desbentaha di marihuana y ta discuti locual e hoben ta haya sa via internet.

Segun Webb, hopi pais a legalisa uso di marihuana, pero no pa hoben. Si gara nan ta cumpra marihuana, bao di 25 aña, esey ta ilegal; “legalisa no kiermen legal pa cumpra.” E ta bisa tambe cu locual e ta nota riba medionan social ta cu ta legalisa pa tin control di ken ta bende e marihuana, pa motibo cu nan sa cu e ta malo pa hoben. E ta bisa cu cannabis medicinal ta positivo, pero no e humamento cu ta haci daño na cerebro.

E ta bisa cu e informacion aki ta general pero den tur caso e resultado cerca e hoben ta varia. “Tin hoben cu ta cay mas lihe cu otro bao di ‘peer pressure’. E nivel di educacion di hoben ta hunga un papel tambe, mescos cu caracter di e persona tambe. “E hoben cu ta mas dificil pa maneha ta esun unda na cas uso di marihuana ta normal.”

Un punto importante ta e mayornan. Den e seccion di ‘begeleiding’ (guia) ta haci uso di simulacion di papel unda e mayornan por siña investiga pa haya sa ki ora un hoben ta usa droga.”

Por ehemplo, por ripara cu e hoben ta comiendo mas cu normal, wowo ta cora, tin falta di motivacion, punto di scol a cuminsa baha. Como mayor bo mester bati na porta, sea pa informacion tocante droga, of busca ayudo cerca un psikiatria o psicologo.

Ruliënne Arends ta trahado preventivo. E ta bisa cu FADA su tarea ta di guia y principalmente ta bay den prevencion pa pone enfasis riba guia na scol. E ta agrega cu esey ta e grupo mas grandi pa atende. “No bay warda te ora en hoben ta usa of ta gar’e cu marihuana.” Agregando cu na cualkier momento FADA t’ey pa duna informacion.

E ta bisa cu hobennan ta mas habri pa papia di uso di droga, tin hoben cu ta conta nan experiencia na cas, tin cu ta lanta cu familiar cu ta huma droga. “Mayornan ta usa anto pakico lo e ta malo, nan ta conta nos kico nan kier sa. No na nivel secundario, nos ta papiando di e nivel mas abao, cu ta puntra tur esey.”

Arends ta bisa cu ta duna informacion, pa nan compronde.

Nan lo bay tin programa tambe pa mayornan, pa asina nan compronde cu kico nan mester tene cuenta. E programa ta prepara nan como mayornan pa por papia y duna informacion na nan yiu.

Tambe Arends ta bisa cu lo cuminsa tambe pa drenta den bario. “Nos a purba esaki caba un tempo. Nos no a logra cu e mayornan a bin, pero nos ta bay drenta atrobe pa asina nan por tin e informacion corecto di marihuana.

Lito Lacle, vocero di cuerpo policial a bisa cu tanten marihuana ta ilegal “nos tin cu traha riba esaki.” El a conta cu a duna charla na scol pa mucha di 6 pa 18 aña. E ta bisa cu edad ta importante. “Edad basico di 6 pa 12 ta pa mucha haya confiansa. Di 12 pa 18 nan ta busca nan identidad.”

Segun Lacle, tin mucha cu no tin presente identidad y confiansa, anto nan ta busk’e di otro caminda, sea na caya, cerca otro hende cu por tin mal influencia.

El a agrega tambe cu informacion di CAA (Consulturia di Addicion Aruba) ta mustra cu 66% di mucha cu tin problema di adiccion ta di mama soltero.

Ora mucha bin papia cu mayor, e mayor mester por tin e conocemento pa asina por papia riba e tema. “Hopi di e muchanan ta haci nan investigacion y nos ta keda kens banda di nan. Tin cu enfoca como mayor pa haci e parti ey, pa asina otro no yega y duna mal informacion.

 

 

You May Also Like

Den cuadro di carnaval 65 Minister Bikker kier pa tur hende celebra den forma responsabel

ORANJESTAD – Cantidad di incidente a tuma luga durante e fin di siman di ...

Dr. Horacio Oduber Hospital ta un berdadero hospital di 5 strea

Recientemente Minister Mike Eman hunto cu su colega di minister dr. Alex Schwengle a ...

gerald 33.jpg

Asunto di PR pa Inmigracion cu salario halto no ta berdad

Hefe di Inmigracion, sr. Gerald Vingal a duna un declaracion breve na Bon Dia ...

aruparking (1).JPG

Reduccion di tarifa parkeermeter

Den e conferencia di prensa unda prome minister Mike Eman a reacciona riba e ...

Investigacion interno di corupcion na DOW ainda den proceso

Tin un investigacion interno di corupcion andando den DOW pa algun luna caba y ...

Presupuesto destina pa proyecto innovacion den enseñansa a baha cu 59%

ORANJESTAD- Ayera, tanto minister di enseñansa, ciencia y desaroyo sostenibel, Rudy Lampe, como su ...