Diasabra anochi partido AVP a tene un reunion di contacto den Theresita Center na San Nicolas pa asina duna informacion y scucha preguntanan relaciona cu e MARCHA NACIONAL cu ta bay tuma luga diabierna awo, dia 12 di April. E reaccion di pueblo di San Nicolas, Cura Cabay, Brazil, Savaneta y Pos Chikito tabata grandi. Pa 7:30 ya e sala grandi di Theresita Center tabata full yen y mester a pone stoel extra. Henter e anochi e sala tabata yen mientras cu hende tabata bin, scucha, haci pregunta y cumpra Tshirt pa e Marcha Nacional.

E oradornan, entre otro Melvin Tromp, Sandra Brown, Giovanny Arends, Kamilah Dammers, Mike de Meza y lider di partido AVP, Mike Eman, tabata masha satisfecho cu e entusiasmo, preguntanan y comentario di esnan cu a sali di nan cas diasabra anochi pa atende e reunion aki.

Lider di partido Mike Eman a splica despues cu pueblo di San Nicolas y vecindario a responde den masa. Esey ta nifica awor cu na San Nicolas, Cura Cabay, Brazil, Savaneta, Pos Chikito, Dakota, Playa, Paradera, Santa Cruz, Noord, pueblo ta preparando pa e MARCHA NACIONAL. Por mira cu e indignacio den pueblo cu e gobernacion actual ta creciendo y cu esey tambe e deseo den pueblo ta aumenta pa expresa su sentimento di desaprobacion pa e gañamento, e aumento barbaro di costo di bida y abuso di poder di e gobierno di MEPORED.

Mike Eman: “Nos comunidad ta sinti su mes defrauda y engaña pa e coalision di tres partidonan MEPORED. Nan ta sinta den gobierno a base di loke nan a gaña pueblo. Awor pueblo ta wak y sinti cu nan a wordo gaña! Pa e motibo aki pueblo ta bisa cu nan kier un eleccion nobo, pa pueblo mes dicidi, cu preuba di e gañamento di MEPORED riba mesa, ta ken e kier pa goberna nos pais. E sentimiento aki a wordo refleha hopi bon diasabra anochi den e presencia masal na San Nicolas.”

Diabierna, Eman tabata na Cura Cabay y na Dakota y eynan e por a sinti mesun sentimiento den pueblo. Den e proximo dianan ta bay tin reunionnan di contacto pa duna informacion y haya comentario di pueblo den e bario di Noord, Pos Chikito, Santa Cruz, Ayo y Playa. Loke ta sosodiendo ta cu di tur e reunionnan ta crece un union nacional pa percura pa e sentimiento di a wordo defrauda cu e pueblo ta sinti, por wordo traduci den un eleccion nobo. Ta esey ta loke ta sinti tur rond di Aruba: e deseo di eligi un gobierno nobo a base di echonan y realidad. No uno a base di gañamento y informacion falso.h