“Ken por a soña cu e dia aki por a yega asina lihe pa Leerorkest Aruba.” Asina Director y fundador di Leerorkest Nederland Marco de Souza a bisa ayera mainta na oficina di SKOA. De Souza tabata invitado special pa firmamento di un acuerdo entre SKOA y Leerorkest Aruba, unda ta bay brinda alumnonan di tur scol basico di SKOA acceso na e libreria digital di e fundacion cu ta lanta pa brinda educacion di musica na tur mucha di Aruba.

Marco de Souza, kende a percura cu Ministerio pa Husticia y Siguridad di Hulanda a aloca 30 mil euro inicialmente pa Aruba tambe por a lanta su fundacion Leerorkest, tabata kier ta presente na e firmamento di diferente acuerdo entre directivanan di scol. Presidente di Leerorkest Aruba Grace Maduro den presencia di Director di Leerorkest Aruba Johnny Croes y miembronan di e fundacion a firma acuerdonan cu DPS, SPCOA y tambe scol Montessori, banda cu e acuerdo cu SKOA. E cooperacion ta nifica cu mas mucha haya formacion general di musica y hasta haya oportunidad pa siña toca instrumento.

E acuerdo ta encera cu Leerorkest Aruba lo percura pa lesnan di AMV (Algemene Muziekale Vormingslessen) na forma digital na e scolnan pa e aña escolar 2021-2022.

Leerorkest Aruba a cuminza e lesnan aki den un forma di proyecto piloto na cinco scol y e tabata hopi exitoso. Tanto e alumnonan como e docentenan ta gosa tur siman di lesnan cu Director Johnny Croes y Coordinador Julliette van Romondt ta graba hunto cu docente Jadrick Croes.

E deseo di Leerorkest ta pa eventualmente brinda tur mucha na Aruba les di musica y e cooperacion cu e directivanan di scol ta permiti pa e soño haya forma. E siguiente aña escolar e lesnan di AMV lo ta den klas 2, pero lo amplia despues pa kleuter te na ultimo aña di scol basico. Tur cu ta participa lo haya e acceso na e banco di data unda tin e lesnan, cu nan por usa pa medio di un link den tur e klasnan.

Banda di esaki, dos scol piloto ta brinda lesnan di musica cu instrumento. Ta trata di Colegio Laura Wernet Paskel y Prinses Amalia. Pa e siguiente aña escolar, e lesnan di musica riba instrumento, 10 en total, lo amplia pa scolnan Graf von Zinzendorf, St. Paulusschool y Adventist Academy Aruba. E muchanan lo haya les di viool, cello, contrabas, trompet, trombone, hoorn, clarinet, harpa, dwarsfluit y drums. Tur ta instrumento di orkesta cu speranza cu un dia e scolnan lo tin nan mesun orkesta.

E Directiva di Leerorkest Aruba ta presidi pa Grace Maduro, tesorero Stanley Looman, Secretario Janice Poeran y miembronan Dilma Arends Geerman y Johnny Croes. Croes ademas ta encarga cu ehecucion di e proyecto grandi. Tur ta orguyoso pa locual Leerorkest Aruba a logra den e ultimo dos añanan, specialmente durante e periodo di e pandemia, cu a brinda oportunidad pa innova y crea e lesnan digital, “pasobra musica ta pa tur mucha.”