Ley di herencia nobo; Cambionan importante y e importancia di un testament

Despues di mira preguntanan y peticion pa informacion tocante herencia ta circula, notaris mr. C.M.A Helmeyer a comparti un biaha mas di manera accesible y simplifica, un serie di splicacion detaya y completo tocante herencia cu ta brinda claridad y conocemento riba un topico cu ta carga un gran importancia.

Prome cu tur cos, mester pone gran enfasis riba e hecho cu tur esaki ta informacion general y ta necesario pa tur hende acudi na nan notaris pa informacion aplicabel na cada caso specificamente.

Notaris Helmeyer a splica cu despues di 1 di september 2021 a bin cambio den e ley di herencia en general. Esaki ta haci cu awendia nos ta conta cu loke ta yama e ‘wettelijk verdeling’, y esaki ta nifica cu ora un persona fayece, ley mes “ta haci un division di su herencia. En general, e diferencia di mas grandi ta, si por ehempel, laga nos coy un geval hopi simpel. Bo tin un señora, bo tin un meneer y nan tin 2 yiu y e personanan aki ta casa cu otro y e yiunan ta hunto, dus tur dos yiu ta di nan dos hunto, no tin yiunan di un previo matrimonio, no tin yiunan di e otro banda tampoco di un previo matrimonio of relacion … si e mama fayece y e no a traha testament, ley ta stipula cu e casa, e partner sobreviviente y e yiunan, den mi caso e dos yiunan, nan ta heredero. Pero, e cambio di mas grandi ta cu tanten cu e persona aki ta na bida, e partner sobreviviente, e ta ricibi tur e activa, e assets nan di e herencia, y e tin e obligacion di paga tambe tur e debenan di e herencia. No ta nifica cu e yiunan no ta heredero, pero e persona sobreviviente tin e autoridad y tin e disposicion di por maneha y dispone di tur locual cu a keda den e herencia di e persona cu a fayece.”

E caso di wettelijk verdeling ta stipula claramente e puntonan cu mester tene na cuenta, manera por ehempel cu “e pareha na momento cu 1 di nan a fayece no ta ‘van tafel en bed gescheiden’, kiermen e peticion aki no a keda entrega ainda na hues” y tambe “e yiunan ta di nan conhuntamente.”

Notaris Helmeyer a comparti cu den caso cu e persona kier desvia di locual cu ley mes ta stipula, e persona “mester traha un testament y bo por desvia di esaki. Banda di esaki, si pa bo e wettelijk verdeling aki no ta aplicabel, bo lo por pidi pa e ta aplicabel toch pa bo. Pero esaki atrobe, bo mester haci via un testament. Kiermen e ta un tiki mas complica pero na mesun momento simpel pa persona cu ta mama, tata cu yiu y un di nan a fayece y no a regla nada. Dus awendia nos ta bisa e derecho di e pareha ta mas fuerte cu e yiunan.”

Esaki ta trece dilanti e di dos punto, cual ta ilustra un di e diferencianan mas grandi. Notaris Helmeyer a splica cu “awendia e porcion legitimo ya no ta existi, locual hopi hende conoce como ‘legitieme portie’, e porcion cu un yiu por a reclama semper riba e herencia di e ouder cu a fayece.”

Pa compronde esaki miho, notaris Helmeyer a duna un gran ehempel; “Si ami, si mi no ta casa, pero mi tin dos yiu y mi a fayece y mi a traha un testament unda mi a laga tur mi herencia pa un otro persona, mi yiunan no tin un porcion legitimo, of ban pone asina, e base pa bay reclama e otro persona. Esaki ta un diferencia hopi grandi paso aunke semper bo tabatin libertad pa por stipula den bo testament pa ken bo ta laga un cierto goed, un cierto bien pa un cierto persona of full bo herencia pa un cierto persona, semper semper e notaris tin e obligacion di corda bo, corda bon si bo tin yiu bo tin un porcion legitimo cu bo no mag di dispone vrijelijk over di dje.” Un biaha mas, mester enfatisa cu esaki simplifica pa un miho comprension, pero pa tur hende e situacion ta diferente y pa por haya informacion cu ta mas aplicabel na bo situacion specifico, semper acudi na bo notaris.

Un di tres diferencia, relaciona cu algo cu tabata presenta hopi den preguntanan den pasado, ta e derecho di e ‘samenwoner’, e persona cu a biba pa hopi tempo cu un pareha cu na dado momento a fayece. Den e caso aki, hopi biaha ora di bay notaris, e persona sobreviviente ta ser bisa cu e no ta un heredero of no tin derecho di nada pero notaris Helmeyer ta splica cu “e verschil mas grandi, atrobe, simplifica pa boso, informacion general, ta cu si e pareha por demostra, e mester haci un peticion na hues, si e por demostra cu e tin mas cu 10 aña cu ta bibando como concubinato cu su pareha, e lo por ser poni igual, su status poni igual, como e persona cu ta casa cu e persona (fayecido) aki.” Esaki ta algo util pa motibo cu por ehempel, kisas por pidi pa haya ‘vruchtgebruik’ di e cas unda e persona cu su pareha tabata biba.

“Prome cu esaki, e no tabata stipula met zoveel worden den e ley y hopi biaha hende tabata ser poni riba e pia robes y no ta compronde e parti aki. Dus dicon despues di 30 aña cu mi ta bibando cu mi pareha, mi no tabatin ningun derecho of no por a haya nada di e herencia,” notaris Helmeyer a comparti.

Declaracion di herencia, of asina yama e ‘verklaring van erfrecht,’ ta algo cu ta hunga un rol importante, y mas di loke nos por pensa.

Pa cu esaki, notaris Helmeyer a splica cu antes esaki tabata un declaracion unda e notaris ta declara kendenan ta e heredero. “Aworaki e ta un notarieele acte, un acta notarial. Kiermen e notaris ta bay exigi bo pa bo entrega mas documento. Hopi importante ta, pasobra e notaris mester sa con bo ta bay acepta e herencia aki. No ta zomaar yega ‘mi mama a fayece’, ‘mi tata a fayece, mi mester un declaracion’. Corda cu e notaris mester semper check si tin un testament traha si of no, maske cu ta e mes a traha e testament, e tin di verifica cu e testament aki no a ser cambia. Kiermen nos mester verifica esey, nos mester wak documentonan di censo … y tambe nos mester wak con e persona aki ta acepta e herencia prome cu nos por keda cla cu nos declaracion di herencia,” notaris Helmeyer a splica.

“Esaki tambe bo ta bay wak un diferencia entre personanan cu kisas 10 aña pasa tabata pidi un declaracion di herencia y awendia e tramite ta mustra un tiki mas largo of cu ta bay tin mester di mas documento pa e notaris por traha su akte, unda ta stipula y determina kendenan ta e herederonan di un persona cu a fayece,” el a agrega.

Notaris Helmeyer a pone enfasis riba e hecho cu esakinan ta maneranan sumamente simplifica y general pa duna informacion tocante herencia, splicando cu “nos lo por papia dia y dianan largo di e topico aki y mi ta kere cu, semper mi ta bisa, ‘si tin 100.000 hende ta 100.000 caso’. Pa cada un persona e consecuencianan si bo fayece, cu lamentablemente ta toca nos cada un, un famia cercano, un colega, un amistad, un ex pareha, bo kier sa kico ta bo derechonan, semper bo por acudi na bo notaris.”

El a sigui comparti cu e notaris ta e persona cu mester tin e conocemento di por tambe domina e “parti di herencia bieu y e nobo pa por bisa bo tambe e diferencia entre kisas un testament cu a ser traha den e ley bieu pero aworaki e persona a caba di fayece y tambe sa cu no ta tur geval ta mescos.”

“E pareha, manera mi a bisa aworey, simpel di e mama cu e tata cu e dos yiunan, si e no tin un testament traha, e wettelijke verdeling ta mesora van toepassing. Pero no lubida, e casa cu ta esun cu eigenlijk ta protegi mas cu tur, tin momentonan cu e por desvia di esaki y bisa cu e no kier pa esaki pasa, e ta esun cu eigenlijk tin autoridad pa tuma e decision si e ta duna e yiunan, e ta deel toe n’e yiunan algo di awo caba den e herencia. E no ta un exigencia di e yiu, pero e ta e autoridad, e ta e pareha cu tin e chens aki, cu tin e decision aki pa tuma si acaso e kier desvia di e leynan.”

Importante ta pa corda tambe cu den un testament, nos por amplia e momentonan den cual nos yiunan por reclama nan parti, di manera cu nan no mester “warda te ora e persona mester fayece, of si e persona aki bay failliet. Kiermen, bo por puntra bo notaris semper ‘OK, mi kier amplia e momento cu mi yiunan mag di claim, mi casa cu a keda atras, pa nan parti di mi herencia.”

Via e splicacionnan aki, notaris Helmeyer ta dunando nos conocemento sumamente importante y poniendo den nos man e hermentnan necesario pa nos por tuma decisionnan informa y na tempo cu ayudo di nos notaris.