Libertad di prensa na peligro, o algo otro?

Caso prohibicion na parlamento den corte

Awe tin un caso interesante den corte. Ta trata di e prohibicion cu un reportero a haya pa drenta edificio di Staten pa cierto tempo. Nos a tende y mira bastante opinion, hasta di abogado cu ta publica sentencia di caso parecido di pasado. E pregunta clave como medio di comunicacion ta si derecho di expresion liber ta den wega, of no.  Si esey ta e caso, no ta importa color o orientacion politico di e periodista, pero nos mester duna atencion na e caso. Y pa por husga esey lo ta necesario pone algun asunto banda di otro. Tambe pa haci comparacion cu otro pais, pa wak con aya nan lo a maneha un caso asina.

Henter e asunto a cuminsa cu e reportero a bay den sala di reunion di Staten, pa un reportahe tocante e escudo di Aruba y logo di Staten. El a sinta, pa duna e asunto un tono comico of no, den e stoel di e presidente. Algun lo mira esaki como algo comico, nada mas, pero otronan por mira esaki como un insulto y falta di respet. Aparentemente, e presidente di parlamento a tuma esaki como un insulto. A pidi e persona pa no haci esaki mas, pero despues e discusion a escala.  Segun presidente di Staten pa motibo cu e reportero a expresa ‘menasa’ na radio cual a pone e siguridad na parlamento den peliger, el a prohibi e reportero pa drenta parlamento pa un periodo di 3 luna.

Hecho ta cu e presidente ta encarga cu e edificio y por tuma medida di orden contra un persona cu e ta haya cu e no a comporta su mes manera orden y respet ta exigi den edificio di parlamento. Naturalmente mester tuma na cuenta kico ta e cosnan cu normalmente ta permisibel den un sala di parlamento y kico no. Na tur parti di mundo tur parlamento tin nan reglanan estableci pa loke ta acceso na e parti mas esencial, cu ta e sala, pasillo y e oficinanan di e diferente fraccionnan. Esaki no ta conta so pa prensa cu ta desea di topa cu parlamentario den nan ambiente di trabao, sino cu e tin di haci cu siguridad di esunnan cu ta labora eyden. Pa acceso di prensa na e area aki mester tin regla y protocol cu cual tur hende mester cumpli.

Acceso na e tribuna publico y e espacio pa prensa tambe mester ta regula di manera estricto. Na varios ocasion nos a yega di critica den e editorial aki e hecho cu practicamente tur presidente den pasado ta laga e hendenan riba tribuna haci cuanto desorden cu nan kier. Hasta nos tabatin momento cu tabata parce cu ta e partido den gobierno mes ta trece su cheerleader nan den tribuna pa apoya nan mes fraccion y stroba e parlamentarionan di oposicion di hiba palabra. Masha poco nos a tende un presidente recorda e tribuna cu nan no ta parti di e debate y cu si nan no por keda keto, por desocupa e tribuna, si mester cu brasa arma (polis). Algo cu ta masha normal na otro pais, manera Hulanda, unda no ta permiti ni un tosa insistente riba e tribuna. Awor, si nos ta custumbra cu e man los aki caba pa e publico, nos por imagina tambe cu pa acceso na e sala di reunion mes tabatin reglanan bastante los, specialmente ora ta trata prensa.

Esey no ta kita cu un presidente di parlamento por defini regla mas estricto pa prensa. Riba esaki a manda un carta pa prensa en general. Esey no ta problema. Loke ta al caso awor ta sin embargo, cu e periodista en cuestion a haya un prohibicion pa un periodo, pa e incidente specifico na cual nos a referi. Esaki ta trata un prohibicion pa henter e edificio. Nos no ta bay den detaye riba e motibonan pa hacie un prohibicion pa henter e edificio; laga esey den man di hues den e caso awe. Otro cos cu ta den man di hues ta si tabatin un motibo valido pa bin cu un medida di ordo di e indole aki contra e persona. Y seguidamente mester evalua si e medida tuma ta coresponde cu e peso di e mal conducta cometi. Tur esey hues lo dicta.

Loke ta importante aki, pa nos como medio di comunicacion, ta pa enfatisa cu libertad di prensa ta sagrado, y limitacion di esaki mester ta excepcional y argumenta. En todo caso por conclui cu tambe trahadonan di prensa ta obliga di tene nan mes na reglanan di orden di un organisacion unda prensa ta bay haci su trabao. Esey ta conta pa tur luga di sector publico o priva. Di ningun manera e ta asina, y esey tambe ta opinion cu nos ta tende, cu parlamento ta di pueblo y por lo tanto pueblo tin acceso anywhere, anytime. Nos no ta kere cu tin hopi ciudadano cu ta bay apoya e tipo di libertinahe aki. Y nos no ta kere cu algun dia e pensamento aki lo penetra te den sala di corte, unda ‘caya lo ta manda’ na luga di e hues. Unico cos cu por exigi, ta trato igual pa tur hende. Acceso na parlamento no mester ta suheto na privilegio pa esunnan cerca di gobierno. Esey nos mester vigila, semper.

 

You May Also Like

Pasco fiesta di paz? Si nos tur ta contribui…

Nos a caba di celebra e dos dianan clave di aña pa reflexiona riba ...

Maduro ta aumentando represion

Pero no por evita un collapse economico Kico realmente ta bay cambia cerca nos ...

Upgrader di Citgo no ta birando realidad

Awor cu e acuerdonan cu Valero y Citgo Aruba a haci dos aña caba, ...

Caya Grandi no ta depende di klem so

Por lo pronto, prome ministro Eman a posiciona su mes na prome luga pa ...

editorial 2_15_1.jpg

CUANTO HENDE A HAYA TRABAO CABA?

Kico Citgo a haci den casi dos luna… Casi dos luna a pasa y ...