(NLTimes) – Tras di escena na Den Haag, un gran parti di Tweede Kamer ta considerando medida contra di e partido ultra-derechista populista Forum voor Democratie (FvD). Diamars ultimo, un gran cantidad di president di partido a reuni den un consulta secreto pa asina pone un fin na e ‘undermining democracy’ di FvD, De Telegraaf a reporta.

E reunion tabata un iniciativa di e lider di partido Volt, Laurens Dassen. Pa su persona, e ultimo cu el a tolera ta un video den cual parlamentario Gideon van Meijeren di FvD a expresa e speransa cu un grupo di Den Haag tuma accion pa tira e gobierno.

Lidernan di fraccion di ambos partidonan den oposicion y coalicion tabata presente na e reunion, sinembargo Volt no a revela exactamente ken. No tur partido a keda invita, y no tur partido a acepta e invitacion, segun fuentenan di Den Haag. “Loke ta uni nan ta e preocupacion,” Volt a splica.

Lider di partido FvD Thierry Baudet a nenga cu su partido no ta respeta democracia. Pa cu e reunion, el a argumenta cu “nan kier silencia oposicion.”

Tambe politico Hulandes Geert Wilders di e partido nacionalista y ultra-derechista PVV, ta yama e consulta aki “comportamento totalitario” di parti di e coleganan,” agregando cu nan kier “prohibi opinionnan cu no ta bon bini.”

E partidonan inicialmente no a bisa nada tocante kico a ser trata den e reunion, sinembargo Volt ta nenga cu esaki a ser teni den secreto. Nan a bisa cu e tipo di combersacionnan aki ta tumando luga cu mas frecuencia. E contenido exacto y proposito di e combersacion ta permanece no revela, sinembargo un resultado posibel por ta cu un cantidad di expertonan ta ser invita Tweede Kamer pa un discusion na mesa.

Recientemente na Hembrug den Zaandam, manifestacion a tuma luga den contra di FvD riba diasabra mainta segun NH Nieuws a reporta. E manifestacion a ser causa pa un conferencia plania pa FvD riba diasabra na e sitio aki. Segun un di e manifestantenan, mas o menos 50 persona di e region a reuni na e sitio pa asina expresa nan mes den contra di e yegada di FvD.

E manifestantenan tabata asombra cu e partido nacionalista, ken su lider di partido hopi biaha a expresa su mes cu elogio y di manera positivo na Vladimir Putin, lo scoge un sitio unda cu 400 refugiado di Ucrania a ser ricibi den e temporada aki na e sitio pa e partido su conferencia, segun NH Nieuws.

Participante Willem Croese y manifestante ken ta prefera di mantene su mes anonimo a bisa cu e grupo ta kere cu “no mester tin luga na Zaandam pa FvD su odio, anti-semitismo y e manera con nan ta trata reproteronan, por ehempel.”

Segun Croese, e manifestantenan ta “individuonan di e region di Zaandam, personanan ken ta activo den e area politico y e area social.” E no tabata kier bisa cua organisacionnan a ser representa na e protesta, pa “motibo cu bo ta vulnerabel cu e tipo di personanan aki.”

Erik Schaap di e oficina di asuntonan di discriminacion na e municipalidad di Zaanstreek-Waterland tambe tabata presente na e manifestacion.

Segun Schaap, “claramente un ta un reunion di partido derechista extremista cu ta anti-Islam. Mi por imagina y mi ta hasta sostene e manifestanan aki y e hecho cu nan ta expresando nan mes. E tipo di partidonan aki no ta pertenece na Hulanda,” el a expresa den un entrevista cu NH Nieuws.

Un peticion online contra di e yega di e congreso FvD na Zaandam a ser firma mas o menos 400 biaha.

E vocero di e municipalidad a confirma cu e manifestantenan a indica cu nan lo protesta “contra di e intolerancia y Forum voor Democracy” ora di registra pa e accion. El a bisa cu nan a keda asigna un seccion di e ruta unda cu e bishitantenan di e convencion lo pasa.

LEAVE A REPLY

Please enter your comment!
Please enter your name here