Dia 13 di juni di aña 2022, un medio di comunicacion a informa cu Sr. Ling Wong, ex-candidato riba lista di partido RAIZ, tabata envolvi den un incidente caminda el a busca un servicio di prostitucion na San Nicolas. El a wordo acusa di haya un servicio y bay sin paga.

Aunke esaki no ta un noticia di interes publico y tampoco ta cay bao un debate publico, pa motibo cu Sr. Wong no ta un politico ni un figura publico y ta un tema cu ta forma parti di e bida priva di un persona, mirando e acusacion serio cu e medio di comunicacion a haci, Bon Dia Aruba a tuma contacto cu Sr. Wong pa dun’e e espacio pa e mes trece su banda di medaya.

Diahuebs ultimo, e medio di comunicacion a bisa cu e dia en cuesiton, pa 3or di marduga polis a haya un keho contra Sr. Wong unda cu supuestamente e tabata haciendo fastioso na un caminda y polis tabata buscando Sr. Wong. Pa cu esaki Sr. Wong a declara na Bon Dia Aruba cu “awendia cu trafico cu ta peligroso, ami ta zorg pa mi ta prome cu 11or na mi cas. Ami no kier ta riba caya despues di 11or mas, kiermen cu ta imposibel cu ami tabata na San Nicolas nunca e dia ey”.

Ayera, otro informacion a bin dilanti tocante e caso aki. E mesun medio di comunicacion a bisa cu e situacion a bira mas serio, y cu segun nan ekipo di investigacion, nan a haya for di nan fuentenan policial cu un number di auto cu ta registra bao nomber di Sr. Wong, pero “cu probablemente no ta Ling Wong den e auto, pero ta e number di dje, ta e number cu ta envolvi den un caso hopi serio di abuso sexual, rape y maltrato di un dama cu ta traha den hanchi na San Nicolas. Polis a bay, a ser informa y a traha rapport di kico a sucede cu e papel cu nos tambe tin, tin cu e number di auto cu e number di 61899 cu ta registra bao e nomber di Ling Wong”.

Respondiendo na esaki, Sr. Wong a splica cu e auto cu e medio di comunicacion ta papia di dje “tin mas cu un siman caba na un garashi na Madiki pa e wordo supla, nan a spuit full, nan a plam’e fo’i otro y e ta eyden”.

Tambe el a señala cu el a tuma contacto cu warda di San Nicolas “y nan no tin niun keho contra mi persona. Un recherche di eynan a papia cu mi y a bisa mi cu nan no tin nada contra mi, esey tampoco ta berdad.” El a bisa cu ningun muhe a bay na warda di San Nicolas y a entrega un keho contra Sr. Wong pa no paga su servicio di prostitucion.

Bon Dia Aruba a puntra Sr. Wong si e lo entrega un keho pa e acusacionnan di e medio di comunicacion y el a afirma cu e no ta bay haci esey. “M’a dicidi caba cu mi no ta bay cana cu e hendenan aki, cu nan ta keda trece otro cos. Nan ta gana cu otro cos riba bo, ami kier pa e cos aki muri y caba na nada.”

Ademas, el a trece dilanti cu ora el a haya sa tur e situacion aki el a yama e doño di e garashi y el a acerca hunto cune na e luga mesora, pa asina wak cu su auto tabata t’ey, “no na San Nicolas. E informacion ey no ta corecto.” Un auto cu manera lectornan por mira riba potret, no ta den condicionnan pa core riba caya.

Sr. Wong el a declara cu “prensa en general mester ta mas cauteloso y mester check bon kico e berdad ta prome cu bo bay publica un cos asina, cu ta atacha e bon nomber di hende. Nos mester di prensa cu mester ta basta sigur kico bo ta bisa y no por gewoon tira cosnan den laira. Hasta nan a bisa cu polis ta busca mi, pero si a bo mes sa unda mi ta biba, con polis no sa y no a bin haya mi akinan? Nan no a bin busca mi na mi cas”, el a finalisa.

Den periodismo, prensa mester busca e otro banda di e medaya miho conoci como “hoor en wederhoor” e principio di mas basico y mas importante den un periodismo etico y profesional. E di dos principio ta e deber di investiga, “onderzoekplicht”. No semper ta facil pa determina exactamente unda e limite entre e informacion bon funda of acusacion infunda ta, esaki ta na base di hurisprudencia di Aruba y Corte Supremo di Hulanda.

Segun Corte Supremo di Hulanda, cu ta wordo aplica na Aruba tambe, ta spera cu un periodista lo investiga minuciosamente e hechonan prome cu publica e noticia. Loke un periodista ta publica mester ta un hecho y den sistema hudicial y derecho constitucional na Aruba, un persona ta inocente te cu ora cu e wordo declara culpabel pa un hues.

Seriedad di acusacion contra un persona tambe ta hunga un rol hopi importante, mientras mas grave e acusacion ta mas cuidadoso mester ta e investigacion periodistico.

 

LEAVE A REPLY

Please enter your comment!
Please enter your name here