Cos ta bay di mal en peor den e actuacion di nos ministro encarga cu Labor, Stranheria y Energia. Nos ta apenas algo mas cu mitar aña den e periodo di e gobierno nobo, y ya tin critica pisa riba e maneho di Stranheria, cu hasta a desemboca den un pre-investigacion di Ministerio Publico. Naturalmente mester laga e autoridadnan hudicial haci nan trabao y no specula tocante kico nan ta bay topa durante nan investigacion. Sin embargo, ta keda straño cu Ministerio Publico ta bay actua riba un par di decision mal tuma… Mester tin algo mas; nos lo haya sa despues. Ta mas cu cla awor aki caba cu e problemanan aki ta surgi ora parti di trabao hudicial ta pasa pa man inexperto y personalista, cu mester tabata un advertencia pa su partido, pasobra e ta e unico ministro den historia di Aruba cu no por a cumpli un segundo termino den añanan 90, pasobra Reino a haya cu e tabata inepto pa e posicion. Spera anto cu milagrosamente e ta bay haci su periodo nobo un exito ta realmente demasiado optimista.

Y no ta cos cu nos no tabata sa. Dia 23 di november, cu e gabinete apenas anuncia, e Editorial aki a formula nos preocupacion di e siguiente manera: “Otro muestra di e falta di vision ta e traspaso di Dimas pa ministerio di Labor. E ta zona masha bunita pa bisa cu esaki ta pa agiliza e proceso di otorgamento di permiso, pero e cosnan aki ta separa net pasobra bo kier pa mas par di wowo contempla loke ta pasando. Y esaki ta yama pregunta tambe tocante e otro problema di coordinacion cu a crea awor, unda nos ta bay mira Husticia ta saca stranhero y e otro ministerio ta parti permiso… Tin un motibo pakico no mester separa diferente tarea bao di e mesun ley, den e caso aki e LTU. Den pasado temporalmente e tarea a bay pa otro ministerio (Infrastructura), pa motibo di problema interno den e ministerio e tempo ey. Mientras tanto no ta mira nada ainda di e problema fundamental y esey ta cu mester bin un reorganisacion di e procesonan vital di permiso, y ey ta unda Dimas ta esun mas importante. E impresion general ta keda cu atrobe Aruba ta haya un tremendo pantaya presenta, pero su tras no tin nada sustancial cambiando.”

Si nos analiza bon, tin dos problema na mesun momento. Uno ta cu e mandatario aki den su estilo peculiar di semper ta gusta maneha caso individual, mientras cu esey ta netamente e trabao cu e mester laga e funcionarionan publico haci. Pero aki atrobe nos ta mira e afan di un mandatario cu nunca ta stop di campaña y pesey ta aprecia masha tanto cu hende mester bin rog’e, como ‘last resort’, pa seguidamente e mustra su buena voluntad pa ‘resolve’ e asunto. Problema ta cu e no ta resolve nada, sino ta pega barco cu otronan mester bay regla.

E otro problema ta loke nos a señala na november aña pasa caba, y esey ta cu nos no a mira nada ainda di e cambionan structural cu mester tuma lugar den Dimas, pa mehora servicio na comunidad y sector priva. Loke si el a haci tabata hiba un guera contra e directora, pero esaki tampoco a termina bon pa e mandatario, cu a topa un huez cu si a bis’e loke aparentemente esnan den su alrededor no por o no ta tribi di bis’e. Cu esey lo bay yuda nos no sa, tempo lo mustra.

Refineria, atrobe…?

Cambiando di tema, tin algun movimento den e plannan pa futuro di e tereno di refineria. Gobierno ta anuncia, via e mesun mandatario di ken ta papiando anetriormente, cu Quanten LLC no ta den e wega mas. No cu tabata necesario pa anuncia esey, promer cu aña a bolter ya caba tur esnan cu un conocimento mas cu average di e tema aki tabata sa esey. Interesante ta cu lo cuminza un otro ronda di conversacion cu varios candidato cu ta pretende di tin plan interesante pa cu e facilidadnan.

Kico exactamente esey ta encera nos no sa, pero manera semper nos ta keda contempla e situacion di e sector den nos region, pasobra esey ta un bon indicacion di e grado di realismo di e plannan local. Y esey no ta duna un panorama asina alentador: di e cuatro refinerianan grandi den Caribe, orienta riba exportacion, no tin ningun operando. Esun mas grave, e caso di Aruba, tin mas di 10 aña cera y na merced di biento, solo y salpetro. Ta di spera anto cu entre esnan cu ta bin ofrece nan plan di inversion tin tambe empresa cu tin pensa di haci algo diferente y no bin cu e mesun storia, e mesun ‘cuenta de hadas’ cu nan si ta bay logra rehabilita y opera e refineria. Tin motibo valido, y pa varios decada caba, pakico ta practicamente imposible pa opera un refineria grandi den nos region cu no tin un mercado propio di bon tamaño. Hasta si ta logra rehabilita e refineria, cu varios biyon dollar involucra, ainda bo mester puntra bo mes cu ken bo ta bay bende bo productonan… Nos ta keda cu e impresion cu e refineria ta otro pantaya oportuno pa gaña wowo di hende, mientras gobierno tin varios asunto mas urgente y controversial pa atende.