Glenbert Croes: mester di e tankinan na RDA operacional pa genera fondo; RDA cu otro ronda pa atrae desaroyadornan pa tereno di refineria

Area di refineria mester bira un zona industrial. Gobierno lo tuma un decision na Augustus kico ta bay pasa cu refineria. Pero e Minister encarga, Glenbert Croes ta consciente cu tempo ta enemigo, ya cu e situacion fisico di e instalacionnan di e refineria ta bayendo atras tur dia. E reefberth 2 cu a cay na Zeewijk ta djis un di e sintomanan di un refineria cu ta hopi bieu y lo rekeri hopi inversion.

Pa tal motibo mes, aunke cu speranza, Minister Croes ta cauteloso pa bisa cu berdad por yega na lanta henter e refineria atrobe. Como tal, e obhetivo ta pa mira ki tur oportunidad mas chikito tin riba e tereno, pa asina amplia e perspectivanan pa actividad industrial cu ta mas sostenibel sin cu mester conta riba un solo actividad.

Quanten Aruba LLC, cu a haya e exclusividad pa por desaroya e proyecto na 2021, no por a cumpli cu tur rekisito. Como tal Refineria di Aruba, RDA a acerca companianan cu a participa na e rondanan den cual Quanten tambe a participa, ademas di otronan, pa mira si tin interes. Asina a logra haci prescreening di e gruponan cu ta inclui invitacion pa reunion, pidi tur informacion, proposicion y e ‘background checks,’ y capacidad financiero.

Entrante diamars te fin di luna lo ricibi bishita di varios grupo interesa y nan lo reuni cu Minister, pero principalmente cu e comision negociador di RDA, pa splica kico ta nan plannan. E gruponan cu tin interes ta varia y no solamente a drenta den contacto directo via RDA, sino tambe via diferente Ministerio.

“Nos lo no conoce un refineria mas estilo di pasado, ya cu e plan di decarbonisacion ta mara na e Acuerdo di Paris 2050. E comision mester tene cuenta e plan aki den su evaluacion y credibilidad, trayectoria, vision, business plan concreto y capacidad financiero verificabel, ya cu ta papia di sumanan cuantioso. E reflexion final ta cu nos meta ta cu nos kier desaroya e area den un zona di energia y industria cu ta cumpli cu National Energy Policy, pero ta habri pa varios proyecto den e zona. E zona por bira uno di desaroyo, unda tin diferente proyecto. Pero nan mester cuadra cu vision di Aruba pa logra metanan pa e Acuerdo di Paris 2050,” Glenbert Croes a bisa. Den e cuadro aki tin companianan tambe cu ta interesa den desmantelacion.

Inversion y tankinan

E retonan ta grandi si. Por ehempel, na e momentonan aki RDA ta invertiendo cu fondonan planifica riba e infrastructura di ‘offloading’ pa combustiblenan cu Aruba mester, manera HFO pa WEB, gasolin, diesel, jet fuel, pa asina por keda suministra tur y percura cu seguridad di energia no ta na peliger. Mescos ta e tankinan. Na e momentonan aki tin algun tanki cu ta certifica pero mester di fondo pa por drecha e otro tankinan.

“Tankinan ta keda necesidad y oportunidad pa actividad economico pa Aruba. Eagle LNG lo yuda cu inversionnan pa nan proyecto, den mehora e infrastructura, mientras cu ta percura pa un zona economico nobo.”

Minister Croes ta enfatisa cu mester bay lihe cu e proceso pa huur e tankinan pa genera fondo.

“A informa mi cu nan ta basta leu den e inversion den infrastructura. Tin diferente compania interesa. RDA y su subsidiario ta interesa den huur tanki cu no por keda para. Hopi no ta certifica y esey ta un di e desafionan. Mester huur esun cu por huur y usa e fondonan pa drecha e otronan.” E Minister a bisa cu e no por bisa cuanto tanki ta den bon condicion y cuanto mester di renobacion.

Kico ta haci Aruba atractivo?

Corsou ta trahando pa atrae inversionista pa su refineria. E refineria na St. Croix a pasa den un renobacion di biyones y a cera su porta despues di apenas algun luna den operacion. “Situacion na Corsou, St.Croix y Aruba no ta diferente. Tur ta purba habri nan refineria,” Croes a reconoce. Pero e Minister ta spera cu segun prijs di petroleo subi, e refineria, na Aruba tambe, lo bira mas interesante for di e punto di bista economico. “Esey ta influyendo e interes ultimo tempo. Pero e no ta bay ta facil, e ta bay ta un desafio. Nos como Gobierno lo evalua diferente proyecto prome cu tuma decision final.”

E Minister a bisa cu un refineria estilo bieu lo no bin mas. “Refineria, si e bin mes, lo mester ta a base di gas. Y si bin otro modalidad cu ta pone nos cumpli cu nos meta di produci hidrogeno, anto esey tambe ta den tapara. P’esey mi ta cautelosamente, pero hopi optimista mirando e diferente señalnan cu nos ta hayando cu nos lo haya gruponan ideal cu proyecto y proposicion ideal pa cumpli cu e vision pa yega na industrianan di energia limpi y sostenibel.”

Riba pregunta di Bon Dia Aruba si e gruponan ta interesa den henter e refineria, Minister Croes a bisa cu e ta un pakete varia. Tin grupo interesa den e waf, otro interesa den desmantela e refineria y otro den cierto parti di e refineria so. “P’esey ta importante pa evalua tur pa na final, e zona di desaroyo di e refineria por bin diferente proyecto den dje. Na final di dia e lo ta interesante, pasobra si uno para, e lo no para tur actividad, manera tabata e caso cu Coastal y Valero (y Citgo).” E Minister ta interesa pa mira kico ta e resultado final di e presentacionnan y e evaluacion na Juli.

Team RDA negotiating committee ta encabeza pa Presidente di Hunta di Directiva di RDA Ricky Lacle y e miembronan ta Gilberto Croes, Director Interino di RDA Renny Arends, consehero huridico mr. Anthony Ruiz y mr. Abelaine Croes Thijsen.