Pa Gabinete Wever-Croes nos muchanan na Aruba tin prioridad, sin laga niun mucha atras. Siman pasa, Premier Evelyn Wever-Croes hunto cu Minister di Asuntonan Social, Glenbert Croes a yega na un solucion pa loke ta trata educacion pa nos muchanan special.

Na e momentonan aki no tin enseñansa avansa pa nos muchanan special. Despues cu nan haci 16 aña y nan caba Scol Dununman, no tin nada pa nan por sigui despues. Esaki, pa e muchanan cu ya a haya educacion caba, por ta devastador y nan lo bay atras. Y pa Gobierno di Aruba esaki no por.

Gabinete Wever-Croes mirando e importancia pa nos muchanan special sigui haya educacion despues cu nan haci 16 aña, a dicidi di bin cu Enseñansa Special Avansa pa nos muchanan despues cu nan sali for di Scol Dununman. E Enseñansa Special Avansa aki yama VSO; Voortgezet Speciaal Onderwijs pa aña escolar 2020/2021. Pa aña escolar 2019/2020 lo tin un areglo transitorio. Bou di e Crisis Plan Social cu ta cay bou di Minister Glenbert Croes, lo percura pa esaki bin na vigor.

Segun e comunicado e motibo pa cua esaki VSO ta cay bou di Crisis Plan Social ta pasobra Gobierno ta kere cu nos muchanan special ta esunnan mas vulnerable den nos sociedad y nos mester protege nan y enforsa nan pa nan por para riba nan mesun pia.

Voortgezet Speciaal Onderwijs lo drenta na vigor e aña escolar 2020/2021. Esaki no por cuminsa cu e aña escolar cu ta bin aki pa motibo cu ta rekeri e tempo pa hinca esaki den otro. Pa e aña escolar aki tin un areglo transitorio na unda cu e muchanan cu a caba Scol Dununman aworaki lo haya enseñansa special transitorio pa un aña na CEDES mientras nan ta warda pa cuminsa enseñansa special avansa na aña escolar 2020/2021.

Premier Wever-Croes a duna di conoce cu VSO no ta solamente pa muchanan cu aworaki a caba Scol Dununman pero tambe pa esunnan cu ya a caba prome cu e muchanan aki y no tawata tin otro enseñansa pa sigui.

Prome Minister Eveline Wever-Croes kier a gradici e comision bou di guia di Hans Geerman y Minister di Asuntonan Social pa tawata asina diligente pa yega na un solucion aworaki temporal pa 1 aña mientras ta traha ariba e plan structural pa nos muchanan special pa aña escolar 2020/2021.

“Cu e VSO aki, nos ta sigur y nos ta confia cu nos ta duna e muchanan special un base mas firme cu nan por para riba nan mes. Pasobra nos hendenan special tambe tin derecho y merece miho oportunidadnan den bida. Nos no a yega ainda unda nos kier ta, pero nos ta riba e bon caminda!”, Premier Wever-Croes a enfatisa.

 

LEAVE A REPLY

Please enter your comment!
Please enter your name here