Nos ta drentando fin di e luna probablemente mas desastroso di historia di nos isla. Nos lo mester bay te na comienso di siglo pasa, tempo cu secura, y por lo tanto hamber, a pone cu un gran cantidad di hende mester a laga nan hogar pa bay traha den cosecha riba otro islanan den nos region.

Of e catastrofe di ciere di Lago, cu a haci un gran parti di nos forsa laboral perde trabao. Miles a bay di Aruba, un parti a bolbe pero hopi di nan a logra haya un lugar di biba cu despues di tempo a bira nan hogar. Nan yiu y nietonan a nace aya y nan ta pasa ultimo fase di bida na otro pais… cos di bida. Por ta cu e biaha aki e emigracion lo t’ey pero den menor grado pasobra tur parti di mundo ta hayando golpi. Asina mes, nos ta coriendo riesgo di perde nos mihor hendenan, cu tur consecuencia.

Esey ta loke por bay sucede awor atrobe, si nos no atende e asunto cu e diligencia pero mas cu tur cos e cautela cu e merece. E parti facil di loke mester sucede a tuma lugar caba, esey ta pasa e presupuesto pa e aña aki pa nos haya acceso na ayudo financiero grandi, cu nos mester, sin duda algun. Pero ora nos hay’e, kico ta bay pasa? Con pa dal e stapnan corecto den esaki?

Pregunta tocante combati coronavirus:

  • Nos ta atendiendo e crisis di salud aki di e manera corecto? Of nos ta tardando pa tuma medida, mirando cu awor e virus a drenta hospital y comunidad caba? Pakico a tarda tanto cu vigilancia mas estricto riba e personanan cu tabata bolbe cas di exterior, cu a haya orden pa tene cuarentena pero no tabatin follow up?
  • Nos mester bay paga pa e personanan cu a bay di Aruba na momento cu e crisis tabata aki caba y nan no a tuma e cos aki na serio y awor nos mester ‘rescata’ nan?
  • Nos ta mira cu tin negoshi cu no ta haci caso y ta sigui traha cu full personal na pia di trabao, otronan cu ta busca proteccion pa cliente y empleado. Nos mester pasa pa un lockdown completo, cu solamente empresa clave por keda habri?
  • Kico mester haci cu e personanan cu no ta tende y ta keda desafia orden di autoridadnan? Si nan bira malo, nan kier prioridad si na e apenas manyen di cama di ICU y aparato di respiracion cu nos tin pa 120.000 persona?
  • Atrobe esnan cu ta cuida curpa y ta keda cas mester paga pa esnan cu no ta tende?

Tocante e Plan di Rescate:

  • Si tin Afl. 214 miyon pa paga 25.000 hende desemplea o cu salario reduci, anto tin placa pa tres o cuatro luna. Kico ta bay sucede despues? Ta pensa riba esaki caba, si e crisis dura mas largo?
  • Ta djis parti placa pa hende por usa pa cuminda o otro cos segun nan parecer, anto despues? Ta duna hende pisca, o ta siña hende pisca tambe?
  • Ki garantia nos tin di un administracion adecua di e 25.000 peticionarionan aki? E ta sigur dos biaha mas cu por ehemplo DPL ta maneha pa aña. Awor den tempo record mester atende 25.000? Ki garantia tin cu no lo tin corupcion, di ambos banda?
  • Nos ta bay paga un gran parti di poblacion pa sinta na cas so? No tin plan kico ta e trabaonan publico y/o social cu por haci a cambio di entrada pa sobrevivi?
  • Pa loke ta e fondo pa empresa chikito y mediano: tin un plan caba ki sector ta priorisa? Ta duna por ehemplo prioridad na empresa cu por gana divisa o ta yuda reduci necesidad di usa divisa pa importacion?
  • Ta bay yuda empresa chikito y mediano sobrevivi e crisis aki, dunado nan e sosten necesario?
  • E fondo di Afl. 40 miyon ta suficiente pa loke mester haci? Kico ta e criterionan pa haya acceso na e fondo? Con ta garantisa cu e no ta bira un asunto di ta mas cerca di e partidonan politico na mando pa por haya participacion?
  • Por structura ATA su gastonan di tal manera cu ta haci mas uso di comunicacion digital y ta baha asina gastonan den exterior?
  • Ta bay bin den forma husto, adaptacion, ahustacion y cooperacion colectivo? Ta refiriendo aki na e organo mas halto den nos pais, te na e homber o muhe humilde.

Nos no ta haci tur e preguntanan (y mas) djis pa critica. Pa yega na solucion conhunto nos mester comunica. Nos ta aprecia bo contesta riba nos pagina di Facebook o na e-mail di Bon Dia Aruba: bondia.aruba@ gmail.com, of bishitando nos website bondia.com.

LEAVE A REPLY

Please enter your comment!
Please enter your name here