Segun e cifranan cu ta aparece den e publicacionnan periodico di Banco Central di Aruba, den e caso aki den e Tabelnan Mensual (Monthly Tables), por mira cu casi cada luna di 2022 tabatin un adaptacion di e entradanan cu gobierno tabatin den e aña anterior. Esey parcialmente ta un fenomeno normal, unda ciudadano y empresa ta paga durante un cierto aña placa na, por ehemplo impuesto, cu ta keda administra pa e aña corespondiente.
Naturalmente e placa extra ey ta drenta den e aña coriente y ta disponible den e aña coriente bay dilanti.
Den e caso aki, sin embargo, ta trata di adaptacion grandi pa casi tur luna di e aña aki, pa e entrada di gobierno di aña pasa, 2021. E diferencia entre loke tabatin anota na januari 2022, como entrada 2021, ta pa entrada total (Total Revenue) e suma di Afl. 1.086,7 miyon, mientras pa september 2022 e suma total a bira Afl. 2.013 miyon, un diferencia di Afl. 926,3 miyon di aumento di entrada total di gobierno, anota e aña aki. Mientras cu aña no a caba ainda, esaki ta duna caba un suma total na entrada di gobierno nunca antes visto. Ta normal pa nos mira, como maximo, entrada entre 1.400 y 1.500 miyon florin di entrada total.
Pa duna un resumen mas completo, di e suma total aki Afl. 1792,3 tabata entrada total di impuesto (Total Tax Revenue) na september 2022, mientras cu na januari ainda e tabata na Afl. 941,0; un diferencia di Afl. 851,3 miyon. Pues casi henter e suma extra ta procedente di impuesto. Na Loonbelasting a cobra na 2022 Afl. 162,3 miyon pa aña 2021; pa Impuesto di Importacion y Accijnzen e diferencia entre januari y september tabata Afl. 241,9 miyon; mientras na BBO/BAVP a cobra Afl. 267,1 miyon pa 2021, en total Afl. 671 miyon. E restante suma pa completa e Afl. 851,3 miyon ta den otro tipo di impuesto cu no a inclui den e resumen aki.
Den e tabel cu ta sigui aki nos ta duna tambe mas detaye di algun di e tipo di impuesto cu durante transcurso di e 9 luna aki a mustra mas aumento: Loonbelasting, Invoerrechten & Accijnzen y BBO/BAVP.
Tabel 1 aki
Kico a sucede cu cobranza di 2022 mes?
Tabel 2 aki
Riba e tabel aki por mira cu den un comparacion di loke a drenta na 2022 durante e mesun aña, compara cu 2019 (di januari pa september) no ta indica diferencia grandi. E cifranan di 2019 den e siguiente añanan no a conoce cambio grandi tampoco. Den conseho di CAft pa presupuesto 2023 ta maneha, durante e aña aki anto, un cifra di entrada total di gobierno pa 2021 di Afl. 1.091 miyon y pa entrada di impuesto Afl. 993 miyon, pa henter 2021. Tambe ta aparece den e mesun resumen di CAft un total pa 2019 di Afl. 1419 miyon, mientras e total di impuesto ta Afl. 1175 miyon. Banco Central ta duna den su Annual Statistical Digest 2021, publica e aña aki, un entrada total pa 2021 di Afl. 1086,7 miyon y di impuesto Afl. 941 miyon.
Conclusion: nos no tin duda cu e cifranan publica pa Banco Central den transcurso di e promer 9 luna di e aña aki ta basa riba informacin di gobierno mes, y seguidamente Banco Central a haci e adaptacionnan necesario, loke a sucede casi tur luna di e aña aki, pa e entradanan di aña 2021. E ta un entrada extra hopi grandi, cu ta principalmente debi na e impuestonan cu a keda paga e aña aki, pero ta coresponde na aña pasa. Por supone cu pa fin di e aña aki e total extra cobra awor pa aña 2021 ta mas grandi ainda.
Ta parce cu durante e aña aki a tuma lugar un cobranza total di impuesto, cu lo por ta debi na un eficiencia nunca visto den Departamento di Impuesto. Ta di supone cu a su debido tiempo nos lo haya un splicacion di parti di e mandatario responsable con e operacion aki a tuma lugar y si por spera algo similar den transcurso di otro aña, pa e aña coriente, o cu esaki ta un ‘one time event’.
