Zoraida Konijn, fundador y presidente di Luna Foundation, ta splica den un entrevista tocante e mision di e Luna Foundation, di e fundraiser cu tin aworaki pa recauda fondo pa e fundacion, y di e amor y atencion cu e ta brinda su cachonan, cu ta un parti hopi importante di su bida.

Luna Foundation ta un fundacion cu ta enfoca pa yuda y rescata cachonan cu ta wordo maltrata door di nan doño. Sra. Konijn ta splica, “Nos no ta tuma cachonan di caya. Si nos tuma un cacho di caya ta door cu e tin sarna of e ta na estado y e ta riba caya, e ora nos ta tuma nan, pero nos no ta djis coy cachonan di caya hinca nan riba tereno. Ta door cu hende ta yama nos cu nan a wak bisiña tin cacho mara den higra di solo of cacho super flaco, eseynan nos ta tuma, plus cachonan cu sarna”.

E fundacion ta traha den conhunto cu Centro Control di Cacho. E centro ta contact e Luna Foundation ora cu nan haya cachonan cu sarna pa asina wak si e fundacion por tuma e cachonan of no. “Antes nan tabata pone nan drumi, pero awo ora nan haya nan, nan ta yama nos prome pa nos bisa si nos por tuma nan of no, normalmente semper mi ta tuma nan, mi tin un amor inmenso pa cachonan cu sarna y cachonan bieu”, Sra. Konijn a bisa. “Despues nos ta busca doño pa nan. No ta fasil pero si nos no haya doño no ta problema, nan ta keda ‘kinan, tereno ta suficientemente grandi”.

Luna Foundation a wordo funda tres aña pasa ora cu Sra. Konijn a rescata su prome cacho, Luna, for di e mannan di su doño cu tabata maltrat’e y asina a bira e prome persona na Aruba cu a wordo cera pa maltrata un cacho.

“Luna tabata e prome cacho, segun mi delaster tambe, cu su doño a wordo aresta pa via di maltrato. Door di esey mi a dicidi di habri e fundacion. Mi a dicidí di habri mi mesun fundacion pasobra no tin tanto fundacion cu ta deal cu cachonan grandi, hopi di nan ta puppies so. Ami no ta tuma puppies, nos tin nan, si niun otro fundacion no por tuma nan nos tin nan, pero nos ta un fundacion pa e cachonan maltrata, pero esunnan adulto. Nos ta existi 3 aña, pero nos tereno nos tine un aña y mey”, Sra. Konijn a bisa.

Sra. Konijn tin un amor grandi pa su cachonan, y ta yama nan su “yiunan”, pa e motibo aki e ta splica cu e proceso di adoptacion na Luna Foundation no ta di djis yega wak un cacho y bay cune, e ta un proceso un poco mas largo y personal y tin algun rekisito cu mester cumpli cune.

“Pa adopta un cacho e rekisitonan ta cu nan mester tin un cura cera, si nan tin otro cacho nan mester ta vacuna y nos ta haci bishita na cas. Mi kier sa unda mi cachonan ta bay. Nos no ta manera shelter cu bo ta bay yena formulario, bay cu cacho y ya, no. Prome cu bo bay cu un di mi cachonan mi kier wak unda e ta bay. E vibe mester sinti bon prome bo bay cu nan, pasobra ya, ta mi yiunan nan ta. Mi no a hinca tanto atencion y amor den nan pa nan djis bay unda cu ta”, el a splica.

 

“Nos no ta manera un shelter, nos ta un santuario, nos no ta habri pa publico. Nan mag di bin, pero tin cu traha cita. Bo tin cu yama nos, traha un cita, splica mi pa ki motibo bo kier bin, pasobra no ta djis bin anto cana rond por nada, bo mester tin un motibo pasobra e intencion no ta pa hende sa unda nos ta pa nan bin benta nan cachonan ‘kinan”, el a agrega.

Luna Foundation tin actualmente un fundraiser grandi habri pa recauda fondo pa e fundacion. E ta un fundacion cu ta draai solamente ariba donacionnan y lastimamente esakinan no ta drentando manera antes, Sra. Konijn ta splica; “Turismo a baha, ta slow y nos tin 85 cacho riba tereno. Nos cachonan no ta cachonan di caya, nan ta cachonan cu a wordo maltrata door di nan doño y ta tarda pa nos por haya hende pa nan door cu nan mester di extra atencion”.

“E fundraiser ta conhutamente cu diferente compania y negoshi na Aruba. Nan tur a ofrece pa haci un special weekend getaway y e ta pa 2 persona . E ta bayendo via gofundme, pero mi ta ripara cu no ta tur hende gusta yena nan credit card, dus nos ta bezig ta wak si nos por adjust e y pone paypal, Aruba Bank y na Merca tin Venmo pa tur hende por doe mee pa por gana e premio. E ta mundialmente”, el a bisa.

Inicialmente e fundraiser tabata te cu fin di augustus, pero mirando e problemanan chikito cu e forma di pago, Sra. Konijn a extende e fundraiser te cu fin di september pa duna mas hende e oportunidad pa participa.

Sra. Konijn ta splica cu e fondonan ta pa yuda ariba tereno di Luna Foundation.

“Esunnan cu a bin tereno sa con e fundacion ta ziet eruit. Nos ta bezig pa haci un clinica unda nos por hinca nos mesun un cachonan y unda veterinarionan di afo por bin pa yuda nos.”, el a bisa. “Nos kier traha un seccion pa ora tin mamanan na estado, cu nos por pone nan sin cu e cacho grandinan ta stroba nan. Ora nos tuma cachonan di edad, esunnan echt bieu, mi tin cu hinca nan memey di tur e desordo di e cachonan jong, dus nos kier traha dos diferente seccion pa pone nan. Y tambe pa renoba nos haulanan, nos tin par di haula cu mester pa drecha nan y pa esey mester tur di placa”.