Corte Hulandes a duna orden na Facebook pa combati avisonan fraudulento pa bitcoin, cu ta uza celebridadnan Hulandes sin nan permiso pa promove cryptomoneda.

Magnate di Medionan, John de Mol a trece e caso dilanti cu sosten di otro personalidadnan di television, manera Eva Jinek y Jort Kelder, kende nan cara tambe a ser uza pa promove benta falso di bitcoin.

Mas di 150 persona di nacionalidad Hulandes a wordo convenci pa e avisonan pa cumpra bitcoin y otro cryptomoneda, perdiendo un total di 1.7 miyon euro den e proceso.

Huesnan na Amsteram awo a duna veredicto cu Facebook no por sconde tras di su rol como un plataforma ‘neutral’, y ta bisa cu nan lo ricibi un multa di hasta 1.1 miyon euro, a menos cu e compania tuma accion.

“E compania, cual tin aviso como su forma principal pa genera entrada, ta tuma un rol demasiado activo [pa ta neutral]”, e corte a bisa den un declaracion pa prensa. “Facebook no solamente ta pone e prijs, sino tambe tin un politica activo tocante ki aviso ta aparece riba Facebook y Instagram.”

E costo di filtra avisonan falso no ta un motibo pa no tuma accion, e corte a bisa, y e hecho cu avisonan cu cara di De Mol awo a ser elimina ta demostra cu esaki por wordo haci. “E responsabilidad di Facebook pa su propio plataforma di aviso ta demasiado grandi, y avisonan falso tin demasiado impacto”, e corte a bisa.

Tambe a duna orden na Facebook pa revela e nomber di e persona tras di e avisonan falso na abogadonan di De Mol.

“Mi ta spera cu e decision aki lo hiba Facebook na tuma stapnan lo mas pronto posibel pa asina hende inocente no lo ser gaña mas cu avisonan falso di bitcoin”, De Mol a bisa den un declaracion. “Mi conseheronan legal y ami lo sigui Facebook di cerca pa mira si ta tuma e stapnan necesario.”

 

 

LEAVE A REPLY

Please enter your comment!
Please enter your name here